ئیسماعیل ئیبراهیم
كۆبوونەوەكانی شاندی پارتی لەگەڵ لایەنە سیاسیەكانی كوردستان، لەم دۆخەی ئێستای هەرێمی كوردستان پێیدا گوزەر دەكات هەنگاوێكی زۆر پێویستە، لەبەر كۆمەڵێك بابەتەوە كە لە خوارەوە ئاماژەیان پێ دەدەم.
یەكەم: ناوەڕۆك و مەبەستی كۆبوونەوەكان چۆن لە راگەیاندن قسەی لەسەر دەكرێت، ئەمە بابەتێكی دیكەیە، بەڵام پێم وایە ئەم گەڕەی سەردانی كردنانە پەیوەندی بەو گوشارە نالۆژیكی و ناعەقلانییانەیە كە یەكێتی دەیخاتە سەر كابینەی 9ی حكومەتی هەرێمی كوردستان، بە تایبەتی دوای ئاشكرا بوون و تێوەگڵانی بەرپرسانی باڵای یەكێتی لە تەقینەوەكان و تیرۆر كردنی كارمەندانی دژە تیرۆر لە هەولێر.
دووهەم: رێگری كردنی كابینەی 9ی حكومەتی هەرێمی كوردستان لە مافیاكانی سنووری سلێمانی كە لە ناوچە سنوورییەكان بە بێ گوێدان بە یاسا دەستیان بەسەر داهاتی حكومەت داگرتووە و بە مەبەستی كەسی و گرووپی بەكاریان دەهێنن.
سێهەم: سنوور دانان لەو كارە قێزەونانەی ژمارەیەك لە بەرپرسی باڵای یەكێتی بە ئاگاداری سەركردایەتی سیاسی دەیكەین و زیان بە ئاسایش و شكۆی هەرێمی كوردستان دەگەینن.
چوارەم: سنوور دانان بەوەی كە لایەنێكی سیاسی دەستی بەسەر شارێك یا دەڤەرێكدا گرتووە و رێگە نادات حكومەت كاری خزمەتگوزاری بكات و زەوی و زاریان تاڵان فرۆش كردووە.
پێنجەم: دەبێ ئەو بابەتەی پێی دەگووترێت هێڵی تەماسی دێگەڵە كۆتایی بێت، حكومەت و هەموو لایەنە سیاسییەكان ئازاد بن لە هەر شوێنێكی ئەم نیشتمانە كاری سیاسیی لە چوارچێوەی پاراستنی ئاسایشی نەتەوەی و یەكتر قبوڵ كرد بكەن.
شەشەم : كۆتایی هێنان بەو گوشارەی بەهۆی كێشەی سیاسی دوو لایەن كاردانەوەی لەسەر كار و پڕۆژە چاكسازییەكانی كابینەی 9ی حكومەت دروست دەكرێت.
حەفتەم: ئیتر دەبێ كۆتایی بەو بەرهەم هێنانەی تیرۆری فكری لە سنووری زۆنی سەوز بهێندرێت كە هەندێك لایەن بە مەرامێكی قین لە دڵانە لە دژی باقی لایەنەكانی دیكەی كوردستان دەیكات.
هەشتەم: دەبێ كۆتایی بەو هزرە پوچەڵە بهێندرێت كە كابینەی 9 بە مەبەست خزمەتی دەڤەری سلێمانی و هەڵەبجە و ئیدارە سەربەخۆكانی گەرمیان و راپەڕین ناكات، لە كاتێكدا یەكێتی بە ” عەنتەری ” دەستی بەسەر داهات و زەوی و زاری ئەو سنوورەی گرتووە و تاكە لایەنی رێگرە لە گەشە پێدان و گەیاندنی خزمەتگوزارەییەكان و هۆكارەكانیشی دەخاتە ئەستۆی حكومەت.
نۆیەم: یەكێتی دوای كۆچی فەخامەتی مام جەلال، دەستی بۆ كۆمەڵێك بابەتی مەترسیدار برد كە ئاسایشی نەتەوەییان خستە مەترسییەوە، وەك خیانەتی 16ی ئۆكتۆبەر، داواكردنی ژمارەیەك لە ئەندامانی سەركردایەتی بۆ بڕینی مووچە و بوددجەی هەرێم، هەوڵدان بۆ جیاكردنەوەی سلێمانی لە هەرێم، دروستكردنی دووبەرەكی و لێكترازانی لایەنە سیاسییەكانی كورد.
دەیەم: ئێستا یەكێتی سیاسەتی هی خۆم دەخۆم هی تۆش بۆ خۆم، دەنا كیانی سیاسی هەرێمی كوردستان دەخەمە بەردەم 16ی ئۆكتۆبەرێكی دیكە، دەبێ كۆتایی بەم سیاسەتە چەوتە بهێندرێت.
لەم سۆنگەیەوە پێویستە نەك تەنها پارتی بەڵكو هەموو لایەنە سیاسییەكانی دیكەی هەرێمی كوردستانیش بچنە ژێر باری چارەسەر كردنی ئەم دۆخەی یەكێتی دروستی كردووە، هەروەها پێویستە تەواوی كونسوڵگەرییەكان و نوێنەری وڵاتان لە هەرێمی كوردستان و عێراق لەم دۆخەی یەكێتی دروستی كردووە ئاگادار بكرێنەوە.
ئەركێكی نیشتمانی و ئەخڵاقیش دەكەوێتە ئەستۆی كادیرە ژیرەكانی ناو یەكێتی، تا بەرگری لەم سیاسەتە هەڵەیەی حزبەكەیان نەكەن و بە پێچەوانەوە گوشار لەسەر سەركردایەتی حزبەكەیان بكەن، سەردەمیانە و دووربینانە بڕیار بدەن و هەنگاو بهاوێژن تا یەكێتی بگەڕێننەوە بۆ یەكێتییەكەی سەردەمی مام.
