” كێشەی زۆرمان بۆ هاتۆتە پێش بەتایبەتی لەكاتی تاوانی كوشتن”
” ئەو تاوانبارانەی زیندانی دەكران پێیان وابوو سوچی ئێمەیە”
ئا/ گولستان بەهجەت
زیبا مەلا عەبدوڵلا ساڵی 1984 لە وڵاتی ئیران گەورە بووە، قۆناغی ناوەندی هەر لەوێ تەواو كردووە، دوای گەڕانەوەی بۆ كوردستان درێژەی بە خوێندن داوە . دوای تەواو كردنی قۆناغەكانی خوێندن چووەتە كۆلێژی پۆلیس ساڵی 2008 پلەی مولازمی وەرگرتووە، سەرەتای كاركردنی لە بەرێوەبەرایەتی بەرگری شارستانی سۆران بووە، دواتر لە ساڵی 2011 لە بەڕێوەبەرایەتی تووندوتیژی خێزانی لە سۆران ئەركی پێ سپێردراوە و تا ئێستا بەردەوامە.
موقەدەم زیبا لە سەرەتای قسەكانیدا بۆ زاری كرمانجی ئاماژەی بە ڕۆڵی خێزاندا بۆ سەركەوتنی هەر خاتوونێكی خاوەنكار، ئەو گووتی ” خێزان ڕۆڵێكی گرینگ دەبینێت بۆ پەروەردەكردن و هاندانی منداڵ، بۆ خوێندن بێت یا هەر كارێكی دیكە، دوای ئەوەی بڕیارمدا بچمە خوێندن بە راوێژكردن لەگەڵ خێزانەكەمان، بە تایبەتی بەهۆی ئەوەی لە منداڵی باوكم لە دەستدا بوو، چونكە یەكێك بووە لە هاورێیانی بارزانی نەمر بۆ یەكێتی سۆڤێت، خێزان ڕۆڵی هەبووە لەسەر ژیانم و دوای رەزامەندی ئەندامانی خێزانم چوومە كۆلێژی پۆلیس، ئەگەر پاڵپشتی ئەوان نەبایە زۆر قوورس دەبوو بۆم، ئەو كاتەی من كۆلێژی پۆلیسم تەواو كرد لە قەزای سۆران تەنها 3 ئەفسەری پۆلیس هەبوون، بەڵام تێبینیم كرد زۆر كەس لەوانەی ئێمەیان دەبینی كەیف خۆشبوون بەوەی من چوومەتە كۆلێژی پۆلیس و دەیانگووت ئێمەش كچەكانمان دەنێرین”.
موقەدەم زیبا لە بارەی ئەو كێشانەی رووبەڕووی بوونەتەوە لە كاتی ئەركەكەیدا گووتی” بە دڵنیاییەوە ئەركی پۆلیسایەتی بێ كێشە نابێت چ بۆ ئافرەت یا پیاو، منیش رووبەڕووی كێشە بوومەتەوە بەتایبەتی لە كاتی لێكۆڵینەوەكان و بەدواداچوونی تاوانەكان، یا وردبینی لە رووداوەكانی كوشتن، یا كاتێك كەسێك بەهۆی سەرپیچی و تاوانەوە زیندانی دەكرا دەیان خستە ئەستۆی ئێمە، بۆیە كێشە دروست دەبوو، بەڵام كێشەكان ئەوەندە گەوەر نەبوونە و توانیومە بەسەریان زاڵ بم”.
هاوسەر و منداڵ هەمیشە لەماڵەوە چاویان لە دایكە بۆ ئەوەی هەم سۆزی دایكایەتی هەمیش نازی پیاوەكەی هەڵگرێت، ئەمەش بۆ ئافرەتی خاوەنكار هەندێكجار كۆسپ دروستدەكات، زیبا عەبدوڵلا لەمبارەیەوە دەڵێت” من خێزاندارم و دوو منداڵم هەیە، بەڵام هیچ كاتێك هاوسەر یا منداڵەكانم رێگر نەبوونە لەبەردەم كارەكانم بە پێچەوانەوە هەمیشە پشتگیرییان كردووم، بە تایبەتی هاوسەرم لە كاتی بەشداری كردنم لە خولەكانی تایبەت بە ئەركەكەم لە دەرەوەی شار هەمیشە هاوكارم بووە بۆیە لێرەوە سوپاسیان دەكەم، منیش هەمیشە هەوڵم داوە بابەتی ئەرك و كاری دەرەوە تێكەڵ بە ناو خێزانم نەكەم و هەم دایكێكی باش بم هەمیش هاوسەرێكی ئەركناس “.
وەك باس دەكەن، خاتوو زیبا چەندە لە كارەكانی جددی و تووندە لە ماڵەوەش وایە، لەمبارەوە دەڵێت” سیلكی پۆلیس وایە كە دەبێ لە كارەكان جددی بیت، ئەم جددییەتە لە كارەكان بۆ درێژ مەودا كاریگەری لەسەر مرۆڤ دادەنێ و فێری كردووم لە ماڵەوە جددی بم. بەڵام بەو مانایەی نا كە بێزاریان بكەم، یا كاریگەری لەسەر ژیانمان هەبێت، تەنها بۆ زوو ئەنجام دانی كارەكانی ماڵەوە توند و جددیم” .
بنەماكانی ئافرەتێكی سەركەوتوو چین و چی بكات تا بتوانێت ببێتە خاوەن بڕیاری خۆی، موقەدەم زیبا لە وەڵامدا دەڵێت” كارێڵ رۆجارس دەروونناسی ئەمریكی، پێیوایە هەموو مرۆڤێك كە لە دایك دەبێت كۆمەڵێك سیفاتی خۆڕسكی تێدایە، كە پێكهاتووە لە جوولەی جەستە و پێكهاتە عەقڵییەكان. ئەگەر ئەم سیفاتانە بەكار بێنێت دەتوانێت بە شێوەیەكی باش خۆی بناسێت و توانا دیار و شارەوەكانی هەست پێبكات، بۆیە پێویستە ئافرەتیش خاوەن بڕیار بێت و رێگە نەدات هەموو كەس لە جیاتی ئەو بڕیار بدات، لە هەندێك حاڵەتدا ژن یا پیاو پێویستە راوێژ بكەن بۆ سەركەوتنی زیاتر لە كارەكانیان”.
لە وەڵامی ئەو پرسیارەی كە دەگووترێت، ئافرەتان لە پیاوان هەست ناسكترن،
موقەدەم زیبا گووتی ” ئەگەر ئافرەت خاوەنكار بێت زیاتر دەتوانێت پشت بە خۆی ببەستێت، ئەوش وادەكات لە رووبەڕوو بوونەوەی كێشەكان چ لە ماڵ یا ناو كۆمەڵگە یا شوێنی كار خاوەن بڕیار بێت، بۆیە بڕوام بەوە نییە هەستی ئافرەت لە هی پیاو ناسكتر بێت، كۆمەڵگە لە دوو رەگەز پیكهاتووە، نێر و مێ هەر دووكیان تەواوكاری یەكترین، پێموایە پێویستە ئافرەتان ساردی و گەرمی بچێژن بۆ ئەوەی ببنە كەسێكی سەركەوتوو”.
