” ئافرەتی کورد لە ئافرەتانی دونیا بە تواناتر و بیر جوانترن”
” شەوانە لە ماڵی خۆم خولم بۆ منداڵان كردۆتەوە”
ئا/ گولستان بەهجەت:
هەوارگە کەریم ڕەشید ساڵی ١٩٨٧ لەناوچەی گەرمیان هاتۆتە ژیان، پاش ئاوارەبوونیان ساڵی ١٩٩١ لە هەولێر گیرساوەتەوە هەر لەوێش بڕوانامەی دیبلۆمی لەپەیمانگای هونەرە جوانەکان بەشی مۆسیقا بەدەست هیناوە، لەوێ دەستی بە چالاکی کردووە لەیەکێ لە قوتابخانە ناحکومییەکان، ساڵی ٢٠١٣ وەک مامۆستا لە سنووری بەڕێوەبەرایەتی پەروەردەی چۆمان دەست بەکار بووە. مامۆستا هاورگە، بە كۆمەڵێك بەهرە و توانای زۆر تایبەتە دەستی داوەتە خزمەت كردن.
وەك خۆی بۆ زاری كرمانجی گووتی ” وێنە و راگەیاندن، موسیك و ژینگە پارێزی، هەموویانم خۆش دەوێ و هەوڵ دەكەم بەهۆیانە خزمت بكەم و خولیای زۆربەی ئەو بوارانەم و ناتوانم یەکیان لەوانی تر جیا بکەمەوە، هەموان گرێدراوی یەکن، ژینگەو سروشت پێکەوە تابلۆیەکن و مۆسیقاش لەناو بنەماڵەکەم بۆتە بەشێک و ڕاگەیاندن بەشیکە لە هونەر و حەزی منداڵیم، لەگەل ئەوەش ئارەزووی گەشت و چوونە شاخ بەشێکە لە ژیانم واتە هەمووان منیان دروستکردووە بێ هەریەک لەمانە من هەست بە لەنگی دەکەم”.
زۆرجار یەك وێنە دەتوانێت دەخری زۆر بابەتی هەستیار بێت و كۆمەڵێك پەیامی لە پشتە ئەو پێی وایە ئافرەتی كورد توانیویەتی لە وێنەكێشان بگاتە ئاستەی گەیاندنی پەیام و گووتی” ئافرەتی کورد هیچ جیاواز نیە لە ئافرەتانی دونیا و بگرە بەتواناترو بیر جوانترە، نموونەی ئافرەتی نیگارکێشی جوانمان هەیە توانیویانە تابلۆکانیان پڕ بکەن لە چیرۆک و دیاردەی سەردەمیانە، بەتایبەتی لەڕێگەی ڕەنگ و فڵچەوە، بەس تا ئێستا زەمینە سازی وانەکراوە، وەرزانە یا ساڵانە بتواندرێت کارێک بۆ ئەو خانمە دەستڕەنگینانە بکرێ تا بتوانن لە رێگەی تابلۆ چیرۆکەکانی خۆیان بگێرنەوە”.
مامۆستا هاوارگە سەرسامە بە وێنەكێشێكی دیار كورد و دەڵێت” مامۆستا (قەرەنی جەمیل) لای من زۆر تایبەتە رەنگدانەوەیەکی جوانی هەیە، بەداخەوە ئێستا باری تەندروستی ناجێگیرە و هیوادارم خوا شیفای بدات”.
مامۆستا هاورگە لە دریژەی قسەكانیان گووتی ” لە سنووری ئیدارەی سەربەخۆی سۆران جگە لەپەیمانگای هونەرە جوانەکانی رواندز هیچ کولێژێکمان نیە، تا دەرچوانی پەیمانگای هونەرە جوانەکان بتوانن درێژە بەخوێندن بدەن، چەن ساڵێکە داوامان کردووە، ئەمە وای کردووە دەرچوانی بەشەکانی (شانۆ، موزیک، وێنەکێشان)پسپۆڕی خۆیان بگۆڕن،پێویستە بیر لە کردنەوەی ئەم زانکۆیە بکرێتەوە لە ئیدارەی سەربەخۆی سۆران، تا درێژە بەخوێندنی خۆمان بدەین، من یەکێکم لەو کەسانەی لە ٢٠١٥ داوا دەکەم بەڵام نەمتوانیوە”.
نەشی شاردەوە ” رۆژانە گوێ لە هەموو ئەو میوزیک ژەنە کوردانە ئەگرم کە رەسانەیەتی موزیکی کوردیان پاراستووە بێ جیاوازی”.
ژینگە پارێزی لای مامۆستا هەوارگە، تایبەتمەندی خۆی هەیە و لە وێنەكێشان رەنگی داوەتەوە، ئەو لەمبارەوە گووتی ” ژینگە پارێزی گرنگترین بەشی ژیانمە لەسەرجەم ئەو وێنانەی سەر دیواری قوتابخانەکان، گووتنەوەی وانەی هونەریش ڕەنگی داوەتەوە، بگرە لەسەر بەشێک لەقوتابییەکانم تەواو بۆتە فکرەو ئیشی لەسەر دەکەن و پاشان تابلۆ و کارەکانیان لەناو سروشت و فیستیڤاڵەکانی ساڵانە لە باڵەکایەتی دەکری نمایش دەکەن”.
شەوانە ماڵی مامۆستا هاورگە دەبێتە پۆڵی قوتابخانەیە و ئەو منداڵانەی حەزیان لە فێربوونی وزێنە كیشانە سەردانی دەكەن، ئەو لەمبارەیەوە گووتی ” لەبەر نەبوونی شوێن و کاتی گونجاوی قوتابی یا ئەو منداڵانەی حەزیان لە وێنەکێشان کردووە لە ماڵی خۆم شەوانە لە7ی ئێوارە تا 10ی شەو کۆمەڵە قوتابییەکم هەبووە خولی فیربوونم بۆ رەخساندوون،پاشان سەرجەم کارەکانیانم بۆ کردوونە پێشەنگا و دڵخۆشم کە منداڵێک لەسەر دەستی من و لە ماڵی من رەنگ و فڵچەکانی هەڵدەپچڕی و تابلۆکەی بەنیوە دەکا و شەوێکی تر لە هەمان كات دەگەرێتەوە بۆ تەواو کردنی”.
