بەبڕی ملیارێك و 600 ملیۆن دینار باڵەخانەیەكی مۆدێرن تایبەت بە بەشی پەرستیاری دروست دەكەین

زاری كرمانجی-مێرگەسۆر:
د. تاڵب شێروانی، ڕاگری پەیمانگەی تەكنیكی مێرگەسۆر، لە چاوپێكەوتنێكی تایبەتدا لەگەڵ هەفتەنامەی زاری كرمانجی ئاشكرای كرد: ئامانجی پەیمانگەكەمان دەرچووی شارەزای بەرزە بۆ بازاڕی كار، هەر بۆ ئەو مەبەستە لە هەوڵداین چەند بەشێكی دیكە بكەینەوە. دەشڵێ: ڕەزامەندی وەرگیراوە بەبڕی ملیارێك و 600 ملیۆن دینار باڵەخانەیەكی مۆدێرن تایبەت بە بەشی پەرستیاری دروست دەكەین.
قەزای مێرگەسۆر، پێنج ناحیە و سەدان گوند لە خۆ دەگرێت، ناحیەكان بریتین لە بارزان، گۆڕەتوو، مەزنێ، پیران و شێروان مەزن، خەڵكی ئەو شارۆچكەیە بە زاراوەی بادینی كرمانجی سەروو قسە دەكەن.
ڕاگری پەیمانگەی تەكنیكی مێرگەسۆر، گوتی: پەیمانگەی تەكنیكی مێرگەسۆر دامەزراوەیەكی ئەكادیمی زانكۆی پۆلیتەكنیكی هەولێرە لە هەرێمی كوردستان، ئەم پەیمانگەیە لەلایەن وەزارەتی خوێندنی باڵا و توێژینەوەی زانستی حكوومەتی هەرێمەوە بە فەرمانی وەزاری ژمارە 1673 لە بەرواری 17/10/2019 دانپێدانراوە و یەكەم خولی وەرگرتنی قوتابییان لە ساڵی 2021 بوو.
د. تاڵب شێروانی، ڕاگری پەیمانگەی تەكنیكی مێرگەسۆر، دەشڵێ: ئامانجی پەیمانگەی تەكنیكی مێرگەسۆر دابینكردنی دەرچووی شارەزای بەرزە بۆ پێداویستییەكانی بازاڕی نیشتمانی و نێودەوڵەتی و ئامادەكردنی قوتابییان بە لێهاتوویی تەكنیكی بەرز بۆ بازاڕی كار، تا ئێستا 101 قوتابی لە پەیمانگەكەمان دەرچوونە، كۆی گشتی قوتابییانی ئەم ساڵ بە هەردوو قۆناغەكەوە كە لە پەیمانگەكە دەخوێنن 185 قوتابی دەبن، ئەو قوتابییانەی لە پەیمانگەی تەكنیكی مێرگەسۆر دەخوێنن 80%ی قوتابی دەرەوەی قەزاكەن.
ڕاگری پەیمانگەی تەكنیكی مێرگەسۆر، زیاتر دەڵێ: پەیمانگەكە پێنج بەش لە خۆ دەگرێت، لەوانە بەشەكانی تەكنیكی وەرگێران، كارگێری كار، پەرستاری، ڕووەكە پزیشكییەكان، پەروەردەكردنی هەنگ، جگە لەو بەشانەی كە هەمانە هەوڵدەدەین چەند بەشێكی دیكە بكەینەوە، هەروەها دەمانەوێت زیاتر گرنگی بەو بەشانە بدەین كە بۆ دەڤەرەكە سوودمەندن.
د. تاڵب شێروانی، ڕاگری پەیمانگەی تەكنیكی مێرگەسۆر، دەڵێت: قەزای مێرگەسۆر پێویستی بە هەندێك بەشی دیكەی زانستی هەیە، بۆیە چاوەڕوانی پێكهێنانی كابینەی دەیەم دەكەین بۆ ئەوەی ستافێك بۆ ئێمە بگوازرێتەوە بۆ ئەوەی هەندێك بەشی دیكەی زانستی بكەینەوە، بۆ ئەو مەبەستە پلانمان داناوە، بەشێكی پڕۆگرامسازی بكەینەوە، كە ئێستا بۆ كردنەوەی ئەو بەشە ئامادەكاری دەكەین، چونكە بەشێكی سەردەمیانەیە و هەلی كاریش دەڕەخسێنێت بۆ دەرچووانی ئەو بەشە، لەگەڵ ئەوەی یەكەم ناوەندی ئەكادیمینە لە هەرێمی كوردستان، كە هەر بەشێكی نوێ بكەینەوە ڕای شارەزایانی بازاڕی كار و كەسانی پسپۆر وەردەگرین، وەكو فیدباكێك بۆ پێداویستییەكانی ناوچەكە، لەسەر ئەو بنەمایە بەشی نوێ دەكەینەوە، ئەو دوو بەشەی ئەمساڵیش كراونەتەوە پەروەردەكردنی هەنگ، ڕووەكە پزیشكییەكان ڕاپرسیمان لەسەر ئاستی كوردستان ئەنجام دا، دواتر ئەو دوو بەشەمان كردنەوە، دەڤەری بارزان لە زۆر بواری دیكە دەوڵەمەندە، هەوڵمانداوە لە بواری توێژینەوەی زانستی سەنتەرێك بكەینەوە، هەر كاتێك لەڕووی ماددیەوە لە تواناماندا بوو و ستافێكی شارەزا و پڕۆفیشناڵمان بۆ دابین كرا، باڵەخانە و كەمپی ئێمە فراوان بوو سەنتەرێكی زانستی بۆ توێژینەوە دەكەینەوە، بەتایبەتی لە كاری زانستی لەوانە لە بواری ژینگە، كشتوكاڵ و پزیشكی، هەتا لە بواری نەتەوەیی و مێژوویی، بەڵام كردنەوەی ئەو سەنتەرە دەگەڕێتەوە سەر ئەوەی تا چەند پلانە ستراتیژییەكانمان جێبەجێ دەكرێن.
د. تاڵب شێروانی، ڕاگری پەیمانگەی تەكنیكی مێرگەسۆر، جەختی لەوەشكردەوە: پەیمانگەی تەكنیكی مێرگەسۆر، یەكەم دامەزراوەی ئەكادیمی خوێندنی باڵایە لە ناوچەكە، هەر لە كاتی كردنەوەی پەیمانگەكە ڕاستەوخۆ قوتابی لە پەیمانگەكە بە كواڵیتییەكی باش وەرگیران، سەرباری فێركردن و توێژینەوەی زانستی ئەركی سێیەمان لە زانكۆ جێبەجێ كردووە، كە ئەو ئەركە زانستییە خزمەتكردنە بە كۆمەڵگە، كەرتی كشتوكاڵ، پەروەردە و تەندروستی، بۆ نموونە كردنی سمپزیۆم، ووركشۆپ، دەیان سیمینار، كوڕبەند و كۆنفڕانس، لە بواری نەتەوەییدا پەیمانگەی تەكنیكی مێرگەسۆر هەمیشە لایەنێكی تایبەت بووە كە بیرمان لە بواری نەتەوەیی و مێژوویی كە قوتابییەكانی خۆمان تێدا پەروەردە كردووە و كار و چالاكی گەورەمان لەو بوارەدا ئەنجام داوە، لە داهاتوودا پلانمان هەیە كەمپسی پەیمانگە فراوانتر بكەین، بۆ ئەو مەبەستە ڕەزامەندی ئەنجوومەنی وەزیران وەرگیراوە بە بڕی ملیارێك و 600 ملیۆن دینار باڵەخانەیەكی مۆدێرن تایبەت بە بەشی پەرستیاری دروست دەكرێت، كە لە داهاتوویەكی نزیكدا دەكەوێتە بواری جێبەجێ كردنەوە.
ڕاگری پەیمانگەی تەكنیكی مێرگەسۆر، ئەوەشی گوت: ئەو كارە گرنگ و ستراتیژیانەی كە لە ڕابردوو كردوومانە بۆ پاڵپشتی نووسینگەی مەلامستەفا بارزانی دەگەڕێنەوە، كە پاڵپشتی نووسینگەی بەڕێزیان گرنگە و لە داهاتووشدا گرنگ دەبێت، بۆ ئەوەی خزمەتێكی باشتر لە بواری ئەكادیمی، زانستی پێشكەشی ناوچەكە و كوردستان بكەین، ئەوەش وای كردووە كە ئێمە كواڵیتی خوێندن باشتر بكەین و لە خزمەتی كۆمەڵگەدا بین بەشێوەیەكی گشتی”.