بەهۆی پاڵەوانێتییەكانی كانگ فۆتوا، لەسۆران رۆژ بە رۆژ شوێنكەوتووانی ئەو یارییە زیاتر دەبن

“چەند جارێك داوامان كردووە، بەڵام تا ئێستا لەنێو پڕۆژەكانی ئیدارەی سۆران، هیچ پڕۆژەیەكی وەرزشی نییە”

سەردار قازی ـ ئیدارەی سۆران:

پێنجەیەمین پاڵەوانێتی كانگ فۆ توا بەبەشداری پتر لە 70 یاریزان و لەسەر ئاستی خانمان و پیاوان دەستیپێكرد.
بەبەشداری پاڵەوانانی وڵاتی ئێران، عێراق و۱۳ یانه و هۆڵ لە هەرێمی كوردستان بەرێوەچوو.
چوارەمین ساڵە لەسەر یەك سۆران باوەش بە پاڵەوانێتیێكی گەورەی كانگ فۆ توا دەكاتەوە، بەو هۆیەوە ساڵ دوای ساڵ رێژەی ئارەوومەندانی ئەم یارییە روو لەهەڵكشانن.
رۆژی یەكەمی پاڵەوانتێیەكە پڕیبوو لە هەیەجان و كێبڕكێی نایاب، ئەنجامی چاوەڕواننەكراو.
یاریزانەكان بەگوێرەی كێشیان پۆڵینی سەر ئاستە جیاوازەكان كرابوون، لەكێشی 54كگم محەممەد گۆران سەركەوتنی بەدەستهێنا، رامی رزگار لەكێشی 56 كگم، بەیار دیار لە 61 كگم، شازاد ئیبراهیم كێشی 65، محەممەد بەهجەت ـیش لەكێشی 67.
لەكێشی 80 كگم عەبدولفەتاح كە لەشاری تكریت بەشداری كرد یارییەكەی بردەوە، ئاكام ئاراس لەكێشی 54. هۆڵی تایگەر لەكەركووك براوەی كێشی 60 كگم بوون كاتێك هەردوو یاریزان، بارزان ئەحمەد و كارزان عەبدولرەحمان بردنەوەیان تۆماركرد. لەكێشی 100كگم ـیش وەزیر عەبدال لەهۆڵی جاگواری سۆران یاریی بردەوە. كێشی 90 كگم یش بۆ هەمان هۆڵ بوو و محەممەد ساڵح بردیەوە، لەكێشی 71 كگم جیهان جندۆ، كە لەشاری سنەی رۆژهەڵاتی كوردستان بەشداری كردبوو یارییەكەی بردەوە.
لەسەر ئاستی خانمان و لەكێشی 55 كگم فریشتە دانا لە نیهایەت دوڵەمەری بردەوە و بووە پاڵەوانی پشبێنی زێڕین.
رۆژی دووەمی پاڵەوانێتی كێبڕكێیەكان K1 و MMA بوون لەسەر ئاستی خانمان و پیاوان، ژمارەیەك رووبەرووبوونەوەی پڕ لەچێژی بەخۆیەوە بینی.
لەپۆڵینی K1: لەكێشی 56 ئاكام ئاراس لەكەركووك، عەبدولواحید ئازاد لەكێشی 58 لەزاخۆ، بارش عارف كێشی 60 لەسۆران، عومەر ئیبراهیم 60 لەكەركووك، لەكێشی 63 سەردار عەبدوڵڵا لەكەركووك، كێشی 65 كارزان رەحمان لەكەركووك، كێشی 67 ئەحمەد فەخرەددین لەهەولێر، دڵشاد نەجات كێشی 68 لەسلێمانی و محەممەد بارزان لەسۆران، كێشی 70 رەزا فەخری لەئێران، 73 ئادەم مەحموود لەسۆران و كێشی 75 تاڵب خەلیل لەسۆران.
لەسەر ئاستی خانمان لەكێشی 65 ئیلیكا ئارام بووە خاوەنی پشبێنی زێڕین.
لەكێبڕكێی MMA، خەڵاتی كێشەكانی 57و 67 بۆ سەیدسادق بوو كاتێك سالار سیروان لە 57 و پابەند باقی، لە كێشی 67 توانیان پشبێنی زێڕین مسۆگەر بكەن.
سەید مهرشاد ئیسترابادی لەوڵاتی ئێران، بووە براوەی كێشی 70 كگم، كێشی 71 ـش سەیدساقییەكان كۆنتڕۆڵیان كرد و بووە بەشی وشیار عەبدوڵڵا.
هەكار گەردی، یەكێك لەپاڵەوانە دیارەكانی MMA بووە پاڵەوانی كێشی 75، هاوكات كێشی 79 ـش بۆ قەڵا و منارە بوو كاتێك زەمەن ئیسماعیل توانی دەستەبەری بكات. كێشی 90 دا پێوانەی ئەم پاڵەوانێتیە بوو، فەرید قەهرەمانی توانی لەسوودی خۆی پشبێنەكە یەكلایی بكاتەوە.
لەسەر ئاستی خانمان جۆناز فایەق، بووە پاڵەوانی كێشی 60 كگم.
جارێكی تر سۆران پاڵەوانی هونەرە جەنگییەكان بوو، پاڵەوانانی توانیان زۆرترین خەڵات لەسوودی خۆیان یەكلایی بكەنەوە.
11 یاریزانی سۆران لەسەر ئاستی جیاواز خەڵاتی یەكەمیان پێدرا، بەوهۆیەش بوونە پاڵەوان، شەش یاریزانی هەولێر یەكەم بوون و لەپلەی دووەمی پاڵەوانێتی هاتن.
یاریزانانی شاری كەركووك و وڵاتی ئێران 5 دانەیان لەیەكەم بوون، و لەپلەی سێیەمی پاڵەوانێتی هاتن.
دوای ئەوانیش سەیدساق بە3 یەكەم، سلێمانی و زاخۆ یەكی یەك یاریزانیان یەكەم بوو لەپلەكانی چوارەم و پێنجەم هاتن.
كێبڕكێی ئەمساڵیش لەسەر سێ خەڵاتی جیاواز بوو، بەشێكیان لەسەر مەدالیای ئاڵتوونی و بەشێكی دیكە لەسەر پشبێنی زێڕین، بەشێكی هەڵبژێردراویش كە خاوەنی 3 پشبێنن لەسەر تانجی زێڕین یارییان كرد.
جەبار بابیەزدین، سەرۆكی رێكخراوی كانگ فۆ توای كوردستان و سەرپەرشتیاری گشتیی پاڵەوانێتیەكە، بەشێكی وردەكارییەكانی پاڵەوانێتی بۆ زاری كرمانجی دەخاتە روو:” ئاستەنگی زۆر لەبەردەماندا هەبوون، بەتایبەت ئەو دۆخە نالەبارەی ئێران بووە هۆی ئەوەی، ژمارەیەكی زۆر یاریزانی دیار نەتوانن گەشتی هەرێمی كوردستان بكەن و لەپاڵ پاڵەوانانی ئێرە ركابەری بكەن. ئەمما سەرەڕای ئەوانەیش توانیمان پاڵەوانێتی 2022 بەسەركەوتوویی تێبپەڕێنین، راستە بەشێوەیەكی چاوەڕواننەكراو پاڵەوانەكانی سۆران، نەیاتوانی بردنەوە دەستەبەربكەن، بەڵام شاری سۆران لەریزبەندی یەكەمی پاڵەوانێتیەكە دابوو.”
جەبار، گلەیی لە ئیدارەی سەربەخۆی سۆران دەكات و دەڵێت:” لەسۆران ژمارەیەكی زۆر پڕۆژە لەسێكتەره جیاوازەكان چونەتە واری جێبەجێكردن، بەڵام جێگەی نیگەرانیە چەند جارێك سەردانی سەرپەرشتیاری ئیدارەی سەربەخۆی سۆران ـمان كردووە، و كۆمەڵێك پڕۆژەی وەرزشیمان لەپێناو گەنجان پێداوە، ئەمما تا ئێستا كاری لەسەرنەكراوە.”
درێژەی پێدەدات:” داوا لە بەڕێزیان دەكەم، هاوكارمان بێت بۆ دروستكردنی هۆلێكی تایبەت بەمەڕاسیمە وەرزشییەكان، بۆ ئەوەی بتوانین هونەری شارەكەمان بەدەرەوە بناسێنین، پاڵەوانێتی گەورەتر بەئەنجام بگەیێنین.”
لەدوا ئاخاوتنەكانیدا سەرۆكی رێكخراوی كانگ فۆ توا ئاماژەی بەوەدا، كە راستە پاڵەوانێەی ئەمجارە لەئاست خواستی شوێنكەوتووانی نەبووە، بەڵام دڵنیایی دەدەن كە پاڵەوانێتییەكانی داهاتوو بەدڵی ئەوان دەبێت و خواستی حەژیكەرانی هونەرە جەنگییەكان لەسەرووی هەموو شتێكی دیكەوە دەبێت.