هەوڵدەدەین بنكەی چاودێری كۆمەڵایەتی لە خەلیفان و سیدەكان بكەینەوە

پێویستە سەنتەرێكی راهێنان و چارەسەری بۆ نەخۆشی ئۆتیزم و نەخۆشییەكانی دیكە بكرێتەوە

موڕشید برادۆستی – سۆران:

لە دیمانەیەكی هەفتەنامەی زاری كرمانجیدا، توران خدر بەڕێوەبەری چاودێری و گەشەپێدانی كۆمەڵایەتی ئیدارەی سۆران، باس لە كار و چالاكی و پڕۆژەكانیان دەكات و دەڵێت:” سەرقاڵی تۆمار كردنی كەمئەندامانین و ناوی هەزار كەسمان بەرز كردۆتەوە تا وەك كەم ئەندامی نوێ دابمەزرێن و بەردەوامین لە تۆماركردنیشییان .
توران خدر، بۆ زاری كرمانجی گووتی:” لە سنووری ئیدارەی سۆران، 4570 كەس بە فەرمی ناویان لای ئێمە تۆمار كراوە وەك تالاسیما، نابینا، شەلەل دەماغ، كورتەباڵا، بیركۆل، ئۆتیزم و جەستەیی ئەمانە و بەسەر چەند جۆرێكی دیكە دابەش كراون، مانگانە ئەوانەی هیچ موچەیەكی دیكەیان نییە 150 هەزار دینار وەردەگرن، ئەوانەی فەرمانبەریشن لە هەمان كات كەمئەندامیشن 100 هەزار دینار وەك موچەیان پێدەدرێت .
توران، ئاشكراشی كرد:” دووای ئەوەی كە حكوومەت چاكسازی و پاكسازی لە زۆربەی وەزارەتەكان دەستپێكرد، ئێمەش وەك بەڕێوەبەرایەتی چاودێری كۆمەڵایەتی، لە ڕێگەی چەند لیژنەیەكەوە تەواوی ئەو كەمئەندامانەكان دووبارە لیژنەییان پێكرایەوە و پێداچوونەوەیان بۆ كرا، بە شێوەیەكی گشتی سەرووی دوو هەزار كەس ناوەكانییان ڕەشكرایەوە، ئەمەش بە هۆی ئەوەی رێنمایەكان نەیان دەگرتەوە و یا رێژەی پێویستی كەمئەندامییان بە دەست نەهێنابوو.
دووپاتی كردەوە:” ماوەی چەند ساڵێك بوو، دامەزراندن و تۆمار كردنی كەمئەندامان راگیرابوو، خۆشبەختانە حكوومەتی هەرێمی كوردستان لە ئێستادا رەزامەندی دەربڕیووە، بۆ دامەزراندنی هەزار و سەد كەمئەندام بۆ ئیدارەی سۆران، ماوەی دوو مانگە، سەرقاڵین بۆتۆمار كردنی ناوی كەمئەندامان و هەماهەنگی تەواویشمان لەگەڵ وەزارەت هەیە، لە قۆناخی یەكەمدا، ناوی ئەو كەمئەندامانەمان بەرز كردۆتەوە و دراون بە لیژنەی پزیشكی، كە پێكهاتوون لە شەلەل دەماخ، بیركۆل، تاڵاسیما، مەنگۆڵ، شەكرە بۆ مناڵانی خوار تەمەن 18 ساڵ، كورتەباڵا، هیمو فیلیا، ئۆتیزم، ئەوانەی بە تەواوی كەمئەندام بن و لە لیژنەی پزیشكی دەربچن، بە دڵنیایەوە وەك كەمئەندام تۆمار دەكرێن و دادەمەزرێن، كەم ئەندامانی جۆری جەستەی و نابیست و نابینا هەوڵدەدەین رەزامەندی ئەوانیش وەرگرین و سود مەند ببن .
لە بارەی لیژنەی پزیشكیش، گووتی:” لیژنەی پزیشكی بینینی كەمئەندامانی نوێ لە هەولێرە و هێشتا نەتوانراوە بهێندرێتە سۆران، تەنها لە سەنتەری پارێزگاكانە، بۆیە داوا لەو كەسانە دەكەین كە ناویان بەرز كراوەتەوە سەردانی لیژنەی پزیشكی بكەن لە هەولێر .
بەڕێوەبەری چاودێری و گەشەپێدانی كۆمەڵایەتی ئیدارەی سۆران، ئاماژەشی بەوەدا:” ئۆتیزم لە سۆران بەرەو هەڵكشانە و ڕۆژ بە ڕۆژیش لە زیاد بووندایە، بۆیە پێویستە سەنتەرێك تا دوو سەنتەر بۆ ڕاهێنان و چارەسەری بۆ ئەو نەخۆشییە و نەخۆشەكانی دیكە بكرێتەوە، چونكە ئەو نەخۆشییانە درێژخایەنن و بارگرانین بۆ دایك و باوك و كاریگەری لەسەر بار و دۆخی داراییان دەكات، داواكاریمان پێشكەش كردووە بۆ كردنەوەی سەنتەری ڕاهینانی ئۆتیزم و نەخۆشیە درێژخایەنەكان .
توران خدر، لە بارەی موچەی چاودێری خێزانیش، دەڵێت:” لە دووای دروست بوونی قەیرانی دارایی، بە بڕیارێك موچەی سەرجەم ئەو كەسانە ڕاگیرا لە چاودێری خێزان سودمەند ببوون كە ژمارەیان نزیكەی چوار هەزار كەس بوو، خەڵكی زۆر پێویستی تێدایە، هەر كاتێك بار و دۆخی حكوومەت باش بێت، پێدانی موچە لە پێشینەی كارەكانی وەزارەتی كار و كار و باری كۆمەڵایەتییە . .
ناشی شارێتەوە، میلاكی بەڕێوەبەرایەتییان كەمە و بەهۆی گرفتی میلاكات زۆربەی جار كاریگەری دەكاتە سەر ئیش و كارەكانمان، دەڵێ” لە بەڕٍێوەبەرایەتییمان و بە هەرسێ بنكەی قەزاكانیشەوە، تەنها 60 فەرمانبەرمان هەیە، ئەمەش رێژەیەكی زۆر كەمە، بەشێك لە فەرمانبەرانیش داوای گواستنەوەی راژە دەكەن بۆ وەزارەتەكانی دیكە و بەڕێوەبەرایەتییەكان، چونكە موچەی وەزارەتی ئێمە و دەرماڵەكان لەگەڵ وەزارەتەكانی دیكە جیاوازە و كەمترە .
توران خدر بەڕێوەبەری چاودێری و گەشەپێدانی كۆمەڵایەتی ئیدارەی سۆران، ئەوەشی خستەڕوو:” بەهۆی زۆری رێژەی كەم ئەندامان و دووری ناوچەكە لە سۆران، داوامان كردووە بنكەیەكی چاودێری كۆمەڵایەتی لە ناحیەی خەلیفان و سیدەكان بكرێتەوە، تا ئاسانكاریش بۆ كەم ئەندامان دروست ببێت.
لە بارەی كردنەوەی ماڵی داڵدەدانی ئافرەتان لە سۆران، توران خدر، دەڵێت” ماڵی داڵدەدانی ئافرەتان یەكێكە لە پێویستییەكانی ئیدارەی سەربەخۆی سۆران، بە داخەوە ماوەی چەند ساڵێكە داوا دەكەین تا ئێستا نەكراوەتەوە، لە كاتێكدا ڕێژەیەكی زۆری ئافرەت بەهۆی كێشەی كۆمەڵایەتی لە هەولێرن، ئەگەر شوێنێك لە سۆران هەبێت و گیانیان بپارێزرێت بێگومان سۆران باشترە و لێی دەمێننەوە”.