هەژار حەكیم: راگەیاندن وەك ئامرازێك بەكاردەهێندرێت بۆ بەدەستهێنانی پارە و لایك و كۆمێنت

مستەفا دۆلەمەری- سۆران:
لە میانەی بەشداری كردنی لە پڕۆگرامی بەهرەی رادیۆی زاری كرمانجی، هەژار حەكیم، رۆژنامەنووس و راگەیاندنكار، تیشكی خستەسەر پەرەسەندنی میدیا، لە رێگەی ئامێری زیرەك بەتایبەتی مۆبایل، هەروەها مەترسی و كاریگەرییەكانی ئەو ئامێرە پێشكەوتووانەی بە خێرایەكی زۆر دەخرێنە بازاڕەوە.
ئەو راگەیاندنكارە، رایگەیاند: ” لە ئێستادا ئینتەرنێت یان تۆڕی جاڵجاڵۆكە هەموو جیهانی تەنیوە لە دواین لێكۆڵینەوەكان دەڵێن 95% بەكارهێنەرانی مۆبایل گەنجن، بۆیە ئەو مەترسییەی كە لە كۆمەڵگە هەیە زیاتر لەسەر گەنجانە، رۆژهەڵاتی ناوەڕاست یەكێك بوو لەو وڵات و ناوچانەی كە لەناكاو ئامێرەكانی تەكنەلۆژیا و سەتەلایەتی پێ گەیشت، دوای ساڵی 2003 لە عێراق و هەرێمی كوردستانیش پاش پرۆسەی ئازادی عێراق، بەتایبەتیش دوای ساڵ 2007 مۆبایل كەوتە نێو كۆمەڵگە، ئەم مەترسییە بووە هۆی نەبوونی هۆشیاری، ئەمەش وایكرد كاریگەریەكی خراپ لەسەر بەكارهێنەراندا دروست بكات، لە دەوڵەتانی رۆژئاوا پێش ئەوەی ئامێرێك یان ئامرازێك بخرێتە بازاڕەوە، هەڵمەتی هۆشیاركردنەوە بۆ دەكەن، بەڵام لە كوردستاندا ئەو مەترسییە لەسەر گەنج دروست بوو.
دەشڵێت:” لە ئێستادا راگەیاندن دەستەڵاتی یەكەمە لەبەر ئەوەی سۆشیاڵ میدیا، یان كامێرای مۆبایلەكان بوون، بەپێ شارەزایان 90% هۆكاری سەرنەكەوتنی دۆناڵد ترەمپ لە سەرۆكایەتی ئەمەریكا بڵاوبوونەوەی ئەو گرتە ڤیدیۆیە بوو كاتێك پۆلیسێك چۆك لەسەر شانی رەش پێستێك دادەنێت تا دەخنكێت، ئەمەش بووە هۆی ئەوەی كە خۆپیشاندانێكی بەرفراوان لە رەش پێستەكان دژی سپی پێستەكان لە ئەمەریكا دروست ببێت و رەش پێستەكان ئامادە نەبوون دەنگ بە دۆناڵد ترەمپ بدەن، دواجار بووە هۆی ئەوەی كە سەرنەكەوێت.
ئاشكراشی كرد:” میدیای ئۆپۆزسیۆن ئیتر جێگای نابێتەوە لەبەر ئەوەی ئێستا خەڵك هۆشیار بۆتەوە، بەڵام گرنگە كە راگەیاندنێك دروست بێت سەر بە دەستەڵات بێت، رەخنەگر بێت لە پێناوی چارەسەری كێشەكان و خەڵكی تر، تا كەس بەناوی ئۆپۆزسۆنەوە خۆیان نەكەن بە خاوەنی ئەزموون و دەستەڵات لە هەرێمی كوردستان و خەمخۆری خەڵك، لە كاتێكدا ئاراستەكردنی كۆمەڵگە و رەخنەگرتن تەنیا بۆ بەلادانی كۆمەڵگەیە، دەوڵەتانی ناحەزی كورد خەڵكێك هاندەدەن پەیامێكی دژ بە دەستەڵات و خەڵك بڵاو بكەنەوە، بەناوی ئەوەی كە ئەم میدیاییە ئۆپۆزسیۆنە”.
هەژار حەكیم، هێمای بۆ ئەوەش كرد: ” بەشێك لە راگەیاندنی كوردی راگەیاندن وەك ئامراز بەكاردەهێنن بۆ بەدەستهێنانی پارە و لایك و كۆمێنت، ئەمەش مەترسییە لەسەر كۆمەڵگە و خەڵك، ئەگەر سەیری ئامارەكانی بەكارهێنانی مۆبایل بكەین، ئەوا لە ساڵی 2000 زیاتر لە ٦،٥ ملیار بەكارهێنەری هەبووە لە ئێستادا كە ساڵی 2022ـە، شەش بلیۆن بەكارهێنەری مۆبایل لە جیهاندا هەن، پێشبینی دەكرێت بۆ ساڵی 2025 ژمارەی بەكارهێنانی مۆبایلی زیرەك بگاتە حەوت بلیۆن بەكارهێنەر، ئەمەش یەكێكە لە مەترسییە هەرە گەورەكان”.