شاخەوان برایم عەبدوڵڵا
بەبێ بەشداریی كورد، دیالۆگی نیشتمانیی سووریا دەستیپێكرد، لەكاتێكدا كورد وەك پێكهاتە، پێكهاتەیەكی دیار و گرنگیی وڵاتەكەن و لە بابەتی سەربازیشەوە خاوەن هێز و چەكدارن، سەرەڕای ئەوەش بەشدار نین لە دیالۆگەكەدا.
ئەو دیالۆگە كاتێك بەبێ بەشداریی كورد دەكرێت، پەیامێكی ڕوونە لەمەودوا دۆخی كورد لەو وڵاتەدا باش نابێت و ڕەنگە هاوشێوەی سەردەمی ڕژێمەكەی بەشار ئەسەدی لێ بێتەوە، ئەگەر خراپتریش نەبێت. دەكرێت جۆرێك حساب نەكردنیش بێت بۆ كورد!
هەر چوار وڵاتەكە، توركیا، ئێران، عێراق، سووریا، نایانەوێت ئەزموونێكی نوێی كوردی هاوشێوەی هەرێمی كوردستان لە هیچ یەكێك لەو وڵاتانەدا دووبارە ببێتەوە، ئەگەر ئیرادەی بەهێزی هەولێر نەبووایە، دەمێكە بوو ئەوەی هەرێمی كوردستانیش گرفتی گەورەی بۆ دروست دەبوو، تەنانەت هێرشی سەربازیش كرایە سەر كورد و پێشمەرگە بۆ ئەوەی قەوارەی هەرێمی كوردستان هەڵبوەشێننەوە.
سووریای نوێ، لەلایەن یەكێك لەو چوار دەوڵەتەوە دیزاینەكەی دانراوە و بۆ داهاتووش هەر ئەو وڵاتە پرۆژەی سووریای نوێ بەڕێوە دەبات، دەكرێت بڵێین دەوڵەتی ناو دەوڵەتیش، یان ئەوەی پێی دەگوترێت حەوشەی پشتەوە! لەو سۆنگەیەوە دۆخی كورد لەو وڵاتەدا باش نابێت، زەحمەتە لە دەستووری نوێدا هیچ ماددەیەكی كوردییانە بە كورد بدرێت كە خاك بۆ كورد جیا بكاتەوە و بڵێن ئەوە ناوچەیەكی كوردستانییە و لەلایەن كوردان خۆیانەوە بەڕێوە دەبردرێت، هیوادارم من هەڵە بم!
زۆر باسی تەبایی و یەكڕیزیی كورد لە سووریا دەكرێت، ئەوە لە چەندین خاڵدا، یەكێكیانە، گریمان كورد یەكڕیزیش بوون، ڕاستە ئەوە گرنگە، بەڵام هەموو شتیش نییە، كاتێك سووریای نوێ نەیەوێت دان بە مافە دەستوورییەكانی كورددا بنێت و داوای هەڵوەشاندنەوەی هێزە سەربازییە كوردییەكان بكات و قەوارەیەكی كوردی دانیپێدا نەنرێت، دیسانەوە بۆ كورد باش نابێت.
لەو دۆخەدا ڕەنگە بكەونە نێو دۆخی شەڕەوە، ئێ ئاشكرایە لە شەڕدا كورد براوە نابێت، بۆچی؟ سووریای نوێ لەلایەن یەكێك لەو چوار دەوڵەتەوە پاڵپشتی و چەكدار دەكرێت بە پێشكەوتووترین جۆرەكانی چەك، لەڕووی قانوونیشەوە دەوڵەت دەتوانێت چەك بە دەوڵەتێكی تر بدات، كەواتە سووریا بەهێز دەكرێتەوە.
بەهێزبوونەوەی سووریا، بەهیچ شێوەیەك بۆ كورد لە هیچ پارچەكانی تری كوردستان باش نابێت، ئەویش دەچێتە نێو چوارچێوەی بەرژەوەندیی ئەو وڵاتانەی ترەوە كە كوردیان بەسەردا دابەشكراوە، كەواتە ئەحمەد شەرعیش نایەوێت كورد لە سووریا خاوەن مافی نەتەوەیی بن و خاكیان بەپێی دەستوور دیاری بكرێت، بۆیە هەتا ئێستا هیچ ئاماژەیەكی باشی نەداوە، ڕاستییەكەی دەیانەوێت كورد لە بۆتەی سووریایەكی نوێدا، وەك هاووڵاتی بتوێننەوە، لە چوارچێوەی هەموو شتێكی سووریای عەرەبیدا نەك سووریای پێكهاتەكان.
نابێت ئەوەمان لەبیر بچێت، ئێستا وڵاتی دیكەش بەرژەوەندییان لە سووریادا هەیە، وەكوو ئیسرائیل و ئەمەریكا، كورد زۆرجار دڵی بەوە خۆش دەكات كە ئەو وڵاتانە شتێك بۆ كورد بكەن و بڵێن، بەڵام وێنە گەورەكە واتە سیاسەتی ئێستای سووریا ئەوەیە، سووریای فەرمی نایەوێت هیچ كیانێكی كوردی لە وڵاتەكەدا دروست بكات، هەتا ئەو ئەمری واقیعەی هەیە، دانی پێدا نانێت!
