ئاسۆ حاجی
بە پێوەری كوردەواری و بە لۆژیكی سەردەمیانەش دەرئەنجامی كارەكانت لە كۆتایی وەدیار دەكەوێت، كورد دەڵێت:”جوجكە لە ئاخیرێ پایزێ دەژمێردرێن”. لۆژیك و زانستی سەردەمیانەش ئەوە بە دەستەواژەی دیكە دووبارە دەكەنەوە:”ئەنجام گرنگە”.
ئەوەی مەسرور بارزانی لە سەرەتای دەست بەكاربوونی كابینەی نۆیەم گۆتی، دەرئەنجامەكی ئێستا وەدیار دەكەوێت، مەسرور بارزانی گوتی:”یەك هەرێمی كوردستان و یەك حكومەتی كوردستان”. ئەو دروشمە ڕووبەڕووی زۆر ئاڵانگاری بۆوە، تا ئەو ڕادەیەی چەند جارێك شاباشی كۆتایی هاتنی حكومەت و هەڵوەشانەوەی قەوارەی دەستوری كوردستان دەكرا. زۆر جاری دیكەش حوكمڕانی مەسرور بارزانی بە تاكڕەو و سەردەمی تاریك و دەستی ئاسنینی ئەمنی پێناسە دەكرا. بەڵام دەرئەنجامەكەی چیە؟
دەرئەنجام ئێستا لە سەروبەندی پێكهێنانی كابینەی دەیەم بە تەواوی ڕوون و دیارە وەك ڕۆژی ڕۆناك. ڕكابەرە سیاسیەكانی مەسرور بارزانی بە تایبەتی سەرۆكی یەكێتی نیشتیمانی كوردستان بەڕێز بافل تاڵەبانی و كاك قوبادی برای كە جارێكی دیكە دەبێتەوە جێگری مەسرور بارزانی، هاتبنەوە سەر هەمان باوەڕ و بۆچوون، كە پارتی بەدیلی یەكێتی نیە و یەكێتیش بەدیلی پارتی نیە، بەڵكو هەردووكیان تەواوكەری یەكترن. نەك بە دابەشكردنی كوردستان بۆ دوو زۆن، نەك بە دابەشكردنی كوردستان بەسەر دوو ئەجێندای ئیقلیمی و نێودەوڵەتی. بەڵكو بە یەكخستنی قەوارەی دەستوری كوردستان بە هەموو پێكهاتە سەربازی و ئابوری و دارایی و كۆمەڵایەتی و فەرهەنگیەكانیەوە. خۆشبەختانە ئەو دیسكۆڕسەی مەسرور بارزانی بۆتە دیسكۆڕسی ئێستای بافل تاڵەبانی و قوبادی برای. ئەوەش وەك ئاماژەیەك بۆ دەستپێكردنی قۆناغێكی تازە و گەش لە كوردستان ئاماژەی بۆ دەكرێت، كە ئومێدی گەڕانەوەی هەیمەنی كوردستان بۆ سەر كەركوك و ناوچەكانی دیكە دابڕاو لە كوردستان دەكرێت.
هەموو ئەوانە گرەوی مەسرور بارزانی بوو لەگەڵ سەخترین و دژوارترین ئالنگاری، كە وەدیهێنانیان بەبێ كۆدەنگی و یەك گوتاری كوردستانی ئەستەم بوو، كە ئێستا ئاماژەكان پێچەوانە دەڵێن و ئەگەری وەدیهێنانیان مومكینە، چونكە كوڕانی تاڵەبانی بەخۆیان بانگەشەی هەمان شت دەكەن. بۆیە دەتوانین بڵێین مەسرور بارزانی گرەوەكەی بردەوە، بەبێ ئەوەی بەرامبەرەكانیشی بدۆڕێن.
