مەهدی محەممەد – زاری كرمانجی :
لەسەر دەستپێشخەریی نوسەرێكی كوردی دانیشتووی ستۆكهۆڵمی پایتەختی سوێد، رووفاتی خانمە هونەرمەندی كورد (ئایشە شان) لە گۆڕستانی بێكەسانی پارێزگای ئیزمیری توركیاوە دەگوازرێتەوە بۆ ئامەدی باكووری كوردستان .
ئایشە شان بە هۆی تووشبوونی بە شێرپەنجە لە ساڵی 1996 كۆچی دوایی كرد، لەبەر ئەوەی هیچ كام لە ئەندامانی خانەوادەكەی ئامادە نەبوون تەرمی ئەم خانمە هونەرمەندە وەربگرن، ناچار لە گۆڕستانی بێكەسانی ئیزمیر ئەسپاردەی خاك دەكرێت .
دوای ماوەیەك، حەسەن ئاكباڵ، نووسەری كوردی باكووری كوردستان و دانیشتووی وڵاتی سوێد، هەڵدەستێ بە گواستنەوەی تەرمی ئایشە شان بۆ گۆڕستانێكی دیكەی پارێزگاكە و لەسەر گۆڕەكەی ناو و زانیاریی رۆژبوون و كۆچی دوایی ئەو هونەرمەندە دەنووسێ و پاراستن و خزمەتكردنی گۆڕەكەی لەئەستۆگرتووە.
ئێستاش ئاكباڵ پێشنیاری گواستنەوەی گۆڕی ئایشە شانی بۆ ئامەدی كوردان كردووە.
لەمبارەوە عەبدولرەحمان ئاكبوڵوت، پارێزەری حەسەن ئاكباڵ لە تۆڕی كۆمەڵایەتیی ئێكس بڵاویكردەوە”پێویستە گۆڕی ئایشە شان، شاژنە بێ تاجەكەی میوزیكی كوردی، لە ئیزمیرەوە بگوازرێتەوە نیشتمانی دایكی كە ئامەدە.”
خانمە هونەرمەندی گەورەی كورد (ئایشە شان) ساڵی 1938 لە ئامەدی باكووری كوردستان چاوی بە ژیان هەڵێناوە و سەرەتا بەهۆی قەدەغەی زمانی كوردی، بە توركی گۆرانی دەگوت
ئایشە شان بە هۆی كاری هونەرییەوە، ماڵباتەكەی دژی وەستاونەتەوە و ناچار بووە شارەكەی خۆی جێ بهێڵێت و لە ساڵی 1963 روو بكاتە ئیستەنبووڵ و لەوێ لە كۆنسێرت و ئاهەنگەكاندا گۆرانیی بە كوردی و توركی بڵێت .
ساڵی 1979 دەهێتە باشووری كوردستان و دواتر لە رادیۆی كوردیی بەغدا لە ژێر ناوی (ئایشانا عەلی) گۆرانیی دەگوت و چەندین كۆنسێرتی لە شارەكانی بەغدا، موسڵ، هەولێر و دهۆك سازكردووە .
دوای گەڕانەوەی بۆ توركیا و لە شاری ئیزمیر نیشتەجێ دەبێت و دوا ساتەكانی ژیانی خۆی لەو شارە بەسەر دەبات دواجار بە هۆی تووشبوونی بە شێرپەنجە لە رۆژی 18ـی 12ـی 1996 كۆچی دوایی كرد و وەسیەتی كردبوو لە شوێنی لەدایكبوونیدا بنێژرێت، بەڵام ماڵباتەكەی ئامادەنەبوون وەسیەتەكەی جێبەجێ بكەن.
