ن/ غیاس خالد زێباری
پشتی ئەنجامدان و سەرکەفتنا ڕاپرسیا سەرخۆبوونا کوردستانێ لرۆژا ٢٥/٩/٢٠١٧ و پڕانیا خەلکێ کوردستانێ بریارا بەلێ بۆ سەرخۆبوونا کوردستانێ دای، نەیار و دوژمنێن کورد و کوردستانێ بڤێ بریارا ئێکگرتیا خەلکێ کوردستانێ دلتەنگ و نەڕحەت بووین، ل پیلانەکێ د گەڕیان بۆ تێکدانا وێ ئێکگرتنا کوردستانێ ب خەلک و دەستهەڵاتڤە، مخابن هەر زۆی دڤی پرۆژێ خۆدا سەرکەفتن، دەمێ زۆربەیا بریار بدەستێن ئێکەتیا نشتیمانیا کوردستانێ رێکەفتنەکا نهێنی و پیلانگێری لگەل حەشدا شەعبی و حکومەتا ئیراقێ واژوو کری بۆ رادەستکرنا کەرکووکێ و دەڤەرێن کوردستانی یێن دەرڤەی ئیدارا هەرێما کوردستانێ و نەهێلانا قەوارێ سیاسی و کارگێری یێ هەرێما کوردستانێ و لرۆژا ١٦ ئکتۆبەرا هەمال سال ئەو پیلانا خیانەتکاری کەفتە د وارێ بجهئینانێ و فەرماندێن پێشمەرگەهی یێن سەر ب ئێکەتیا نشتیمانی فەرمانێن حزبا خۆ بجهئینان و بەرژەوەندێن نشتیمانی کرنە قوربانی بەرژەوەندێن وان بەرپرسێن خۆ و کەرکووک رادەستی چەکدارێن حەشدا شەعبی و میلیشیایێن هەڤپەیمانێن وان یێن هندەک وەڵاتێن هەرێمی کر و ئەڤ خیانەتا وان بوویە ئەگەرێ داگیرکرنا نیڤەکا ئاخا کوردستانێ .
هێزێن داگیرکەر بڤێ چەندێ غرۆر بوون و هێزێن خۆ بۆ داگیرکرنا هەولێر و دهوکێ ژی لڤاندن، هەر وەکی کەس نیە رێکێ لێ بگریت .
هەرچەندە شیانێن هێزێن داگیرکارا بەرامبەر شیانێن پێشمەرگەهێن کوردستانێ یێن بن فەرمانا پارتی دیموکراتی کوردستان و حزبێن هەڤپەیمانێن وێ نە دهاتنە بەڕاووردکرن ، لێ ب فەرمان و رێنمایی و پشکداریا راستەوخۆ یا سەرۆک مسعود بارزانی، ب ووڕە و هەستا نەتەوی و درۆشمێن شۆڕەشێن ئیلۆنێ و گوڵانێ لرۆژا ٢٠ ئکتۆبەرێ و رۆژێن دیفڕا ل پردێ و سحێلا و مەحموودیێ و تلسقۆف، سنوور بۆ دانان و د شەرێن دژواردا چەندین داستانێن هەرە مەزن تۆمارکرن و دربێن مەزن ل لەشکرێن داگیرکارا دان و نەچار کرن بێژن ستاپ ..! و کون مشک لێ کرنە قەیسەری و جیهان بڤان سەرکەفتنێن پێشمەرگەهێن کوردستانێ حیبەتی بوون، حکومەتا ئیراقێ نەچارکر بخۆدا بچیتەڤە و دەست ب دیالۆگ و دانووستاندنا بکەت .
ئەڤ خۆڕاگری و قارەمانیێن پێشمەرگەهێن کوردستانێ بوونە ئەگەرێ مانەڤە و پاراستنا هەرێما کوردستانێ وەکی قەوارەیەکێ سیاسی و کارگێریێ دەستووری و یاسا ل ئیراقا فیدڕال و هەڵوەشاندنا وێ پیلانا خیانەتکاری و دوژمنکاریا پشکەکا لایەنێن سیاسییێن ئیراقێ یێن دەستهەڵاتدار و هندەک وەڵاتێن هەرێمی و وان سەرکرێن ئێکەتیا نشتیمانی بۆ ژناڤبرنا قەوارێ هەرێما کوردستانێ دارشتی و سەنگ و پێگەهێ هەرێما کوردستانێ لسەر ئاستێ جیهانێ پاراست .
هنێرا ڤان سەرکەفتنا بۆ سەرۆک بارزانی و پارتی دیموکراتی کوردستان و وان فەرماندە و پێشمەرگەهێن وان داستانا دزڤریت ئەوێن ژیانا خۆ ئێکستیە د مەترسیان دا بۆ پاراستنا ژین و ژیارا خەلکێ کوردستانێ و قەوارێ هەرێما کوردستانێ کۆ هیڤی و ئارمانجا هەر کوردەکێ نشتیمان پەروەرە .
پێتڤی یە ئەڤ دەهــ رۆژێن داویا چریا ئێکێ ئەوێن پێشمەرگەهێن کوردستانێ ئەڤ داستانە تێدا تۆمارکرین بفەرمی ببنە دەهکێن خۆڕاگری و سەربلندیێ و هەر سال بفەرمی بهێنە ساخکرنەڤە و چالاکیێن جودا جودا یێن لەشکری و ئەدەبی و رەوشەنبیری و ڤەکۆلینێن تایبەت لسەر بهێنەکرن و ئەنجامدان .
