“تا ئێستا بەغدا یەك لیتر نەوتی رەوانەی هەرێم نەكردووە”

پشتیوان كەریم- سۆران:
ئەمیر سەلیم، بەڕێوەبەری نەوت و كانزاكانی ئیدارەی سۆران، لە دیدارێكی زاری كرمانجی دا، باس لە گرنگی كردنەوەی بەڕێوەبەرایەتییەكەیان و كێشە و گرفتەكانیان دەكات، دەشڵێت، پشكنین و چاودێری تەواوی جۆرەكانی سووتەمەنی دەكەین كە دەهێنرێنە سنوورەكەمان.
ئەمیر سەلیم، بەڕێوەبەری نەوت و كانزاكان لە ئیدارەی سۆران بە زاری كرمانجی راگەیاند:” لە بەردەوامی كردنەوەی بەڕێوەبەرایەتییە گشتییەكان لە ئیدارەی سۆران، بەڕێوەبەرایەتی نەوت و كانزاكان كرایەوە، لەسەرەتادا چەند كێشەیەكمان هەبوو، بەتایبەتی لە رووی كەمی میلاكات، بۆ چارەسەركردنی كێشەكە لە وەزارەتی سامانە سروشتیەكان و بەڕێوبەرایەتی نەوت و كانزاكانی هەولێر فەرمانبەر هەیە، دانیشتووی سنووری ئیدارەی سەربەخۆی سۆرانن، بە بڕیاری سەرپەرشتیاری ئیدارەی سەربەخۆی سۆران و بە هەماهەنگی وەزیری سامانە سروشتییەكان دەگوازرێنەوە سۆران، بەڵام بەشێك لەوانە ئەو پسپۆریەیان نییە كە پێویستمان پێیەتی، بەمەش كارمەندان بەشێوەی گواستنەوە لە چەند فەرمانگەیەكی دیكە دەبێت، ئەگەر گرفتی میلاكاتمان پڕنەبووەوە ئەوكات پسپۆرییەكان بەشێوەی گرێبەست دادەمەزرێنین، هەروەها جگە لە میلاكات پێویستیمان بە تاقیگە دەبێت، هەوڵدەدەین لە داهاتوودا تاقیگەی تایبەت لە ئیدارەی سۆران دابمەزرێنین، بە مەبەستی پشكنینی كواڵێتی سووتەمەنی، لەگەڵ چەند پێداویستییەكی دیكەی تایبەت بە ئیش و كاری بەڕێوەبەرایەتیەكەمان.
سەبارەت بە پرسی دابەشكردنی نەوتی سپی بەسەر هاووڵاتییاندا، بەڕێوەبەری نەوت و كانزاكانی ئیدارەی سۆران، ئاشكرای دەكات: ” ئیدارەی سۆران زیاتر لە 84 هەزار خێزان لە خۆدەگرێت، لەگەڵ كۆكردنەوەی پارە لە رێگەی بریكارەكانی خۆراك، هەر خێزانێك بەرمیلێك نەوتیان بەسەر دابەش دەكرێت، بەڵام ئەو نەوتەی ئێستا دابەشی دەكەین لە ناوچە شاخاوییەكانەوە دەستمان پێ كردووە، ئەمەش پاڵپشتی حكوومەتی هەرێمە بۆ هاووڵاتییان، چونكە تا ئێستا بەغدا یەك لیتری رەوانە نەكردووە، ئەم نەوتەش كە دابەش دەكرێت، كواڵێتی بەرزە و پشكنینی بۆ كراوە، هەر هاووڵاتییەكیش گومانی لە خراپی نەوتەكە یان لە پێوەرەكە هەیە با ئاگادارمان بكەنەوە”.
لە بارەی پرسی دابەشكردنی غاز لە رێگەی كۆبۆن، ئاماژەی بەوەكرد:” هاووڵاتی وەك پێویست سوومەند نابێت، بەڵام هەوڵدەدەین نەبێتە قەیران و ئەو سیستەمە هەڵبوەشێتەوە، چونكە لە بەرژەوەندی گشتی هاووڵاتیاندا نییە و دەبێت رێكارێكی گونجاوتر بدۆزرێتەوە، بۆ دابەشكردنی غاز بەسەر هاووڵاتییان و شوێنە گشتییەكان”.
بەڕێوەبەری نەوت و كانزاكان لە ئیدارەی سۆران، ئەوەشی گوت:” هیچ وێستگەیەك بەنزینی بۆ ناهێت تا ئەو كاتەی لە تاقیكردنەوەكە دەرنەچێت و بەبێ پشكنین دابەش ناكرێت، پشكنینی بەنزینەكەش دەنێرینە تاقیگەی ناوەندی هەولێر، هیوادارین لەمەودوا تاقیگەی پشكنینی سووتەمەنی لە سۆران بكرێتەوە، بەشێوەیەكی گشتی ئێستا كواڵێتی بەنزینەكە باشە و شۆفێران گلەییان نییە، نرخەكەش روو لە دابەزینە”.