رێبوار حەمەلاو شوانی
لە ماوەی چەند ساڵی رابردوو، ئەوەی بە وردی سەرنجی لە سەر درا بێت ، ئەوەیە ، کە دوژمنانی ئەم گەل و قەوارەیە ، لە یەک کات و ساتدا هەولێری پایتەختی کوردستان و پارتی دیموکراتی کوردستان کە دامەزرێنەر و پارێزەری دەستکەوتەکانێتی بە جۆرەها پیلان ،سیناریۆ ،قەیرانسازی ، گەمارۆ و چەکێک پەلامار داوە ، چونکە خەونی دوژمنان وداگیرکەران بەدیهێنانی مەرامە تایبەتییەکانیان و ناچارکردنی گەلی کورد بووە بۆ خۆچەماندن بۆ جێبەجێکردنی نەخشەکانیان لە ناوچەکەدا .
لە ماوەی ساڵانی 2011 بە ئێستای 2025 ، وردبوونەوە لە هەنگاو بەهەنگاویی ئەو کارتە فشارە دەرکی و ناوخۆیانە ، ئیتر هەر لە خۆپیشاندان و ناڕەزایی ساختە بگرە ، تا بەکارهێنانی چەند چین و توێژێکی ناو هەندێک لایەنی لاواز و قورمیشکراویی بێگانە و نەیارانی کوردستان ، تا دەگاتە دروشمی برۆخێت و سووکایەتیکردنی بە رەمز و شکۆمەندییەکان و خەبات و پێشمەرگە و شەهیدان ، ئینجا پیلانی برسیکردن و بڕینی قووت و مووچەی کوردستان تا هێرش و پەلاماردانی سەربازی و بەکارهێنانی جۆرها چەک و مووشەک و ئینجا ئاگرتێبەردانی سەروماڵی کاسبکاران و تیرۆر و ئاژاوەنانەوە وڕفاندن و دەیان کاری تێکدەرانەی دیکە ، کە مەرام تێیدا تێکدانی سەقامگیری و ئاسایش و ئارامی هەرێمی کوردستان و بەتایبەتی هەولێری پایتەخت و پارتی دیموکراتی کوردستان و خەونی لەباربردنی ئەم قەوارەیە .
خۆپیشاندان و ناڕەزایی و مانگرتن داواکاری رەوایە و شارستانیانە و دیموکراسیانە ، بوونی ئۆپۆزسیۆنێکی بونیاتنەر کە تێیدا پایەکانی حکوومرانی بەهێز بکات و چاودێرییەکی ورد و تەندروستانە لە سەر دامودزەگان بکات زۆر رەوا و تەندروستە، بەڵام لێرەدا پرسیارێک دێتە ئاراوە کە سەماکردن بە سازی دوژمنان ونەیارانی کوردستان دەچێتە چوارچێوەی مانگرتن و ناڕەزایی دەربرین؟ ، ئایا بردنی زانیاری و سیخوریکردن بۆ نەیارانی کوردستان بەمەبەستی لێدانی سەنگ و پێگەی هەرێمی کوردستان دەچنە چوارچێوەی ئۆپۆزسیۆن بوونەوە ؟ بە شان و باڵ هەڵدا گووتنی دیکتاتۆر و ستەمکار و میلیشیا لە یاسا دەرچوو کە خەون و هەموو مەرامەکانیان تێکدانی نێوماڵی کوردستانییە دەچێتە چوارچێوەی مانگرتن وخۆپیشاندان و داواکردنی مافی مامۆستا ؟ سووکایەتی کردن بە مێژوو و سەروەرییەکان و سفرکردنەوەی خەبات و بەرخودان و پێشمەرگە و شەهیدان و سەروەرییەکانی ئەم گەل و قەوارەیە دەچێتە چوارچێوەی ئۆپۆزسێۆنبوونێکی نیشتیمانپەوەری و کوردپەوەرەوە ؟
هەموو ئەم پیلان و سیناریۆانە لەکاتێکدایە ، کە ئەوانەی کە لە عێراق و دەرەوەی سنوورەکان خەونی لە باربردنی هەرێمی کوردستان و تێکدانی رەوشە ئارام و سەقامگیر و گەشەسەندووەکەی دەبینن ، خۆیان لە خراپترین رەوشی سیاسی و ئەمنی و لە پەلەقاژەی مردن دان ، چونکە دوای گۆرانکارییەکانی ناوچەکە و تێکشکانی هیلالی شیعی و بەرەی موقاوەمەی شکستخواردوویان ، تاکە شوێن کە دڵیان خۆشکردووە هێرش وپەلاماری بدەن بەڵکو قەرەبوونی پووکانەوە و ریسواییەکانیان بکەن هەرێمی کوردستانە وەک دوورگەیەکی ئارام و سەقامگیر لە ناوچەکەدا .
ئەوەتا شاراوە نییە، ئەوەی زیاتر لە 10 ساڵە مووچە و بودجەی خەڵکی کوردستانی بڕیووە ، دەسەلاتە فاشیزمەکانی بەغدایە، ئەوەی هاوبەشی و بڕگەکانی دەستووری پێشێڵکردووە و پابەندی دەستوور نابێت و ماف و شایستەداراییەکانی خەڵکی کوردستان نانێڕێت بەغدا و هەمان ئەو تاقم و گروپە میلیشیا تیرۆریستانەن کە ئەمڕۆ دێنە ژێر خێوتەکە و بۆ مەرامی شووم و خەونی نەزۆکیان شانوگەری و پیلانگێری دەکەن .
ئەوەی ستایشی دیکتاتۆر و فاشیزمە مەزهەبیی و تایفییەکانی دوێنی و ئەمرۆی عێراق بکات و پەلاماری خەبات و بەرخودانی گەلەکەمان بکات ، ئەوە ئاماژەیە بە بەزاندنی هەموو هێڵە سوورەکان و جاشایەتییەکی قێزەوەن و بەزاندنی هەموو هێڵە سوورەکانی ئەم گەل ونیشتیمانە و کاتی سنووردانانە و بێدەنگ بوون لێیان مەترسیدارە .
دەبێ ئەو راستییەن بڵێن کە ، لەکاتێکدا گۆرانکارییەکان دەرفەتێکی گونجاو بۆ گەلی کوردی هێناوەتە ئاراوە و داگیرکەران و نەیارانی کوردستان درکیان پێکردووە ، کاتی ئەوەیە کە کورد لە سەرئاستی هەر چوار پارچەی کوردستان بە هوشیاری و ژیرانەوە مامەڵە بکەن ، وریا بن لە پیلانگێری و هەوڵی دروستکردنی لێکترازانی نێوماڵی کوردستانی و بەڵارێدا بردن و سەرقاڵکردنی کورد بە بابەتی ناڕەوا و قەیرانسازی ساختەوە .
پێوست بوو ئەوانەی کە دەڵێن مافمان خوراوە ، بزانن کێ مافەرەواکانی گەلی کورد پێشڵکردوو ە و بودجە و مووچەی کوردستان نانێرێت ، دەبوو ناڕەزایی و مانگرتن و خۆپیشاندان لە دژی پێشێڵکارییەکانی بەغدا بووایە ، عێراقێک کە زیاتر لە یەک سەدەیە بە هەزاران کوردی تەنها بەهۆی کوردبوون و داواکاری مافەرەواکانی بە کوشندەترین چەک و ئەنفال و کۆمەڵکوژی و تیرۆر لە ناوبردووە ، دەبێت ئەو راستیەش لە بیر نەکەین ، کە ئەگەر خەبات و تێکۆشانی پارتی و هێزە نیشتیمانییەکانی تر نەبووایە ، ئەوە ئەمڕۆ بابەتێک بەناوی قەوارەی هەرێمی کوردستان وئازادی و دیموکراسی بوونی دەبوو .
ئەوەی بینراوە و سەرنج دەردێت ئەوەیە کە ،دوژمنان و نەیارانی ئەم گەل و نیشتیمانە رووی تیرە ژەهراویی وپەلاماردانەکانیان بەرەو رووی پارتی و بارزانییە ، چونکە باش دەزانن کە پارتی دیموکراتی کوردستان ئەو هێز نەتەوەیی ونیشتیمانی و کۆڵنەدەرەیە کە لە سەر هیچ فشار و گەلەکۆمەکی و پەلاماردانێک سازش لەسەر ماف و خاکی کوردستان ناکات ، بۆیە، سەرۆک بارزانی و پارتی گەورەترین بەربەستن لە بەردەم بەجێگەیاندنی پیلانگێری و مەرامەکانیان دژی کوردکوردستان و هەڵبژاردنی 20ی ئۆکتۆبەری 2024 و سەرکەوتن و متمانەی ملیۆنی جەماوەری کوردستان بە پارتی وەڵامێکی گونجاوە و خەونی نەیارانی پارتی و هەولێریش هەرگیز نایەتەدی و بەدڵنییاییەوە ئەو رۆژەش نزیکە تا سەروەری و ئازادی بۆ دەڤەری سلێمانی قۆرخکراوی دەستی میلیشیا و گروپە لەیاسادەرچووەکان و دەزگەهەواڵگری و مافیاکان بگەڕێتەوە رزگاری بێت.
