پشتیوان كەریم – زاری كرمانجی :
نەوت فرۆشێكی سەنتەری قەزای ناوەندی سۆران، لە بارەی دابەزینی نرخی نەوت بۆ زاری كرمانجی دەڵێت:” ئەمڕۆ نرخی نەوتی سپی ماڵان بەراورد بە هەفتەی ڕابردوو بە جێگیری ماوەتەوەو بەهاكەی بە هیچ شێوەیەك ڕووی لە بەرزبوونەوە و نزمبوونەوە نەكردووە.”
لە بارەی نرخی جۆرەكانی نەوت لە بازاری ئیدارەی سۆران، مەغدید ئۆمەراوەیی ئەوەشی خستە ڕوو:” لە ئێستادا نرخی یەك بەرمیل نەوتی بێجی عێراقی بە 265 هەزار دینارە و نرخی یەك بەرمیل نەوتی بازیانیش بە 255 هەزار دینار مامەڵەی پێوە دەكرێت، هاوكات نرخی یەك لیتر نەوتیش بە 1200 دینار دەفرۆشرێت.”
وا بڕیاربوو لەگەڵ دابەشكردنی نەوتی ماڵان، نرخی نەوت لە بازاڕ دابەزێت، هۆكاری دانەبەزینی نەوت لە بازاڕدا هەروەكو ئۆمەراوەیی باسی دەكات :” كەمی هاوردەكردنی نەوتی سپی لە عێراق هۆكارێكە بۆ دانەبەزاندنی، بەڵام هاتنی ئەو نەوتەی كە لە ئێستادا لە ڕێگەی بریكارەكانەوە دابەش دەكرێت، ئەگەر كوالێتیی باش بێت و بكەوێتەوە بازاڕ نرخی نەوتی سپیش لە بازاڕی ئازاد دابەزین بە خۆی یەوە دەبینێت.”
