مەهدی محەممەد – زاری كرمانجی :
ڕۆژنامەی عەرەب لە ژمارەی ئەمڕۆی خۆیدا، راپۆرتە هەواڵێكی لە ژێر ناونیشانی ئەمەریكا پێچەوانەی خواستەكانی توركیا، هێزەكانی لە سووریا زیاتر دەكات، بڵاو كردووەتەوە و ڕایدەگەیەنێت “ئەمریكا بە هیچ شێوەیەك خواستی كشانەوەی نییە لەو وڵاتە.”
سەرچاوەیەك لە ڕوانگەی سووریی بۆ مافەكانی مرۆڤ، بە ڕۆژنامەكەی ڕایگەیاندووە”فڕۆكەیەكی بارهەڵگری ئەمریكی لە سەربازگەی خەراب جیری گوندەواری ڕومێلانی سەر بە پارێزگای حەسەكە نیشتووەتەوە و چەك و تەقەمەنی و پێداویستییە لۆجستییەكانی تێدا بووە و لە ئاسمانیشەوە بە فرۆكەی دیكە چاودێریی پرۆسەكەیان كردووە،”
سەرچاوەكە ئەوەشی گوتووە “پێشتریش فڕۆكەی بارهەڵگر، هەمان سەربازگەیان بەكارهێناوە و هاوكارییەكانیان گەیاندووەتە ڕۆژئاوای كوردستان.”
لوید ئۆستن وەزیری بەرگریی ئەمریكا، چەند رۆژێك بەر لە ئێستا ڕایگەیاند كە هەستیان بە جموجۆڵی داعش كردووە لە ناوچەكەدا و پێیان وایە بەدوای هەلێكدا دەگەڕێن بیقۆزنەوە.