مەهدی محەممەد – زاری كرمانجی :
لە ڕاگەیاندراوێكی هاوبەشدا، 68 ڕێكخراوی مافی مرۆڤ و ژنان داوای هەڵوەشاندنەوەی سزای لەسێدارەدانی پەخشان عەزیزی چالاكوانی كوردی خەڵكی مەهاباد دەكەن و ڕادەگەیەنن “پەخشان ژیانی خۆی تەرخان كردووە بۆ بەرگریكردن لە ژنانی لاواز و بەرەوپێشبردنی یەكسانی لە كۆمەڵگاكەیدا.”
ڕێكخراوەكان جەخت لەوە دەكەنەوە لەسێدارەدانی پەخشان نەك هەر هێمای نادادپەروەرییەكە كە قەرەبوو ناكرێتەوە، بەڵكوو كپ كردنی دەنگێكی ژیانە بۆ گۆڕانكاری و پێشكەوتن.
ڕێكخراوەكان لە ڕاگەیاندراوەكەیاندا، داوا لە كۆمەڵگەی نێودەوڵەتی و حكومەتەكان و دامەزراوەكان و ڕێكخراوەكانی داكۆكیكار لە مافی ژنان دەكەن، بەپەلە ڕێوشوێن بگرنە بەر بۆ ڕێگریكردن لەسێدارەدانی پەخشان عەزیزی.
ڕێكخراوەكان جەخت لەوەش دەكەنەوە كە بەكارهێنانی سزای لەسێدارەدان دژی چالاكوانانی مافەكانی مرۆڤ و مافی ژنان شەرمەزارییە بۆ هەموو مرۆڤایەتی و داوای وەستاندنی ئەم كارەساتە دەكەن.
ڕۆژی چوارشەممەی ڕابردوو دادگای باڵای كۆماری ئیسلامی ئێران سزای لەسێدارەدانی پەخشان عەزیزی پەسەند كردووە و برای ئەو زیندانییەش ڕایگەیاندووە سزای پەخشان ڕەوانە بەشی جێبەجێكردنی زیندانەكە كراوە.
پەخشان عەزیزی چالاكوانی كوردی ڕۆژهەڵاتی كوردستان، مانگی حەوتی ساڵی ڕابردوو لە لایەن لقی 26ی دادگای ئینقلابی ئیسلامی تارانەوە بە سەرۆكایەتی ئیمان ئەفشار بە تۆمەتی “بەغی” و شۆڕشی چەكدارانە لە ڕێگەی ئەندامێتی لە پارتێكی كوردی دژبەری ئێران، سزای لەسێدارەدانی بەسەردا سەپێنراوە.
ئەو ڕێكخراوانەی واژۆیان لەسەر ڕاگەیاندراوەكە كردووە پێكهاتوون لە دامەزراوەی عەبدولڕەحمان برومەند، ناوەندی داكۆكیكارانی مافی مرۆڤ، كەمپینی ئازادكردنی زیندانیانی سیاسی لە ئێران، ڕێكخراوی هاوار، هەڵمەتی جیهانی بۆ ڕاگرتنی لەسێدارەدانەكان لە ئێران، تۆڕی جیهانی بۆ ئازادی ژیانی ژنان ، تۆڕی جیهانی بۆ ئازادی زیندانیانی سیاسی لە ئێران، كۆمیتەی نێودەوڵەتی دژ بە ئەشكەنجە، مافی مرۆڤ بۆ هەمووان لە ئێران، دامەزراوەی ئیسماعیل خویی، كوردپا، ڕێكخراوی ژنانی ڕۆژهەڵات، ڕاگرتنی توندوتیژی دژی ژنان و یەكگرتوویی بۆ ئێران.
