مەهدی محەممەد – زاری كرمانجی:
ڕێكخراوی مافی مرۆڤی هەنگاو بڵاوی كردەوە، ئافرەتێكی خەڵكی شاری ئیلامی ڕۆژهەڵاتی كوردستان لەلایەن هاوسەرەكەیەوە كوژرا.
بەپێی ڕاپۆرتەكەی هەنگاو، دوێنێ سێشەممە (زارا شەهبازی) تەمەن 28 ساڵ، كە لە تەمەنی 14 ساڵییەوە بە زۆر بە شوو دراوە، بە هۆی كێشە و ناكۆكی بنەماڵەیی لەلایەن هاوسەرەكەیەوە كوژراوە.
قودرەت حەیدەری زادە، فەرماندەی پۆلیسی ئیلام ڕاگەیاند “بكوژ تەمەنی 32 ساڵە و دوای ئەنجامدانی تاوانەكە هەڵاتووە و هەوڵەكان بۆ دەستبەسەركردنی ناوبراو دەستی پێكردووە.”
بە پشتبەستن بە ئامار و بەڵگەكانی ڕێكخراوی مافی مرۆڤی هەنگاو، ساڵی ڕابردوو تەنیا لە پارێزگای ئیلام 9 حاڵەتی ژنكوژی تۆماركراوە.
