رێبوار حەمەلاو شوانی
تادێت ناوچەکە زیاتر پێدەنێت قۆناغێکی نوێی و چاوەروانی گۆرانکاری و پێشهاتی نوێی لە نەخشەی سیاسیی دەکرێت ، ئەوەش دەرخەری ئەو راستییەیە کە هەرێمی کوردستان و سەرکردایەتیی بارزانی ، رۆڵێکی گرنگ و کاریگەری وەک ئەکتەرێکی نادەوڵەتیی لە نێو هاوکێشەکاندا و بەتایبەتی بۆ سەقامگیری و ئاشتی دەبێنێت و زۆرێک لە سەرکردەکانی ناوچەکە و جیهانیش بۆ چەندین پرسی گرنگ بۆ سیاسەت و دیپلۆماسی و بۆچوونی ژیرانەی بارزانی و هەرێمی کوردستان دەگەرێنەوە .
دیدار وکۆبوونەوەی مەسروور بارزانی ،سەرۆکوەزیرانی کوردستان لەگەڵ ڕەجەب تەیب ئەردۆغان و هەروەها هاکان فیدان ، وەزیری دەرەوەی تورکیا ، ئاماژەیەکی روونە بۆ تاوتوێکردنی چەندین پرسی گرنگ و ستراتیژی لە رووی سیاسی و ئابووری و ئەمنی لە سەر ئاستی ناوچەکەدا و ئینجا ئێستا و ئایندەی پرسی کورد لە رۆژئاڤا و باکووری کوردستان و بەهێزکردنی پەیوەندییەکانی نێوان هەولێر و ئەنقەرە و ئینجا پیشهاتەکانی ئەم دواییەی عێراق و بەتایبەتی پرسی هەناردەکردنەوەی نەوتی هەرێمی کوردستان کە ماوەی 20 مانگە بە سیاسەتێکی ناڕەوا و بۆ مەرامێکی سیاسی دژ بە هەرێمی کوردستان راگیراا ،کە لە سەر ئاستی ناوچەکە ئەو دیدارە واتا گرنگی سەنگ و پێگەی هەرێمی کوردستان لە سەر ئاستی رۆژهەڵاتنی ناوەڕاستدا ، کە ئەمەش لە گفتوگۆکان لەگەڵ سەرکردایەتیی تورکیا وەک کارەکتەرێکی سەرەکی ئەم ناوچەیە مامەڵەی لەگەڵ دەکرێت .
لە هەمانکاتیشدا ، بۆ دوژمنان و دۆستانیش دەرکەوتووە کە بە بێ رۆڵ و پێگەی گەلی کورد ئەستەمە هاوسەنگی لە رۆژهەڵاتی ناوەڕاست دروست بێت ، بەتایبەتی کە توورکیاش ناتوانێت بە بێ هەرێمی کوردستان ، پرسی کورد چارەسەر بکات . هەروەها سەردانی مەسروور بارزانی لە کاتێکی هەستیاری وەک ئێستادا گرنگ وستراتیژییە ، چونکە دەتوانێت ڕۆڵی زۆر گرنگ لە سەر پرۆسەی چارەسەری گەلی کورد لە باکوووری کوردستان و رۆژئاوای کوردستان ببینێت و بەڕێگەی پێشنییاری چارەسەری بۆ دۆزی کورد .
بەتایبەتی دوای هەوڵە بەردەوامەکانی سەرۆک بارزانی و سەرۆکی هەرێم و سەرۆکی حکوومەتی کوردستان لە ماوەی رابردوو لەگەڵ هێز ولایەنەکانی رۆژئاڤا و باکووری کوردستان لە پێناو بەرژوەندییە باڵاکانی لەگەڵ کورد و پڕۆسەی ئاشتی و چارەسەریش لە ناوچەکە ، ئاماژەیەکی روونن بۆ گرنگی و سەنگ و پێگەی سەرکردایەتیی سیاسی هەرێمی کوردستان لە ناوچەکەدا .
هەروەها پێشوازیکردنی هاکان فیدان ، وەزیری دەرەوەی تورکیا لە نێو ماڵەکەی خۆیدا ، ئاماژەیە بە پەیامێکی روون و ئاشکرا ، كە بە بێ چارەسەری دۆزی کورد لە رۆژهەڵاتی ناوەڕاست ئەستەمە ئاشتی و سەقامگیری لە ناوچەکەدا فەراهەم بێت و بێتەدی ، بۆیە ، پەیامی کۆبوونەوە و گفتوگۆکان ئەوەیە دەبێت لەگەڵ کورد کێشەکان چارەسەر بکات و هەرێمی کوردستانیش کارەکتەرێکی گرنگ و رۆڵی سەرەکی لەو بارەیەوە دەبینێت وەک چۆن لە چەند ساڵی رابردووش هەوڵی گرنگ و باشی بۆ چارەسەری پرسی کورد لە باکوورو رۆژئاڤای کوردستان داوە و بەردەوامیش بووە .
بەدڵنییاییەوە ، مەسروور بارزانی ، نەک هەر دەتوانێت رۆڵی گرنگ و ستراتیژی بۆ ئاشتی و چارەسەری پرسی کورد ببینێت ، لەهەمانکاتیشدا سەرکردایەتیی تورکیا متمانەیەکی تەواویان بە بارزانی هەیە ، بەتایبەتی کە تورکیا باش دەزانێت ناتوانێت پرسی کورد بە بێ بارزانی و هەرێمی کوردستان چارەسەر بکات .
لە هەمانکاتیشدا ، تورکیا پێی وایە کە پەکەکە و پەیەدە و هەسەدە پلان و فەرمانەکانی ئێران دژ بە تورکیا جێبەجێ دەکەن و دەبێت دەستبەرداری ئەم سیاسەتە بن کە مەترسییە بۆ سەر بەرژوەندییەکانی ئەنقەرە لە ناوچەکەدا.
بەشێوەیەکی گشتی دەتوانین بڵێن کە، ئەم دیدارەی نێوان مەسروور بارزانی و ڕەجەب تەیب ئەردۆغان و هاکان فیدان ، گرنگی و بایەخی زۆری لە سەر ئاستی ناوچەکە هەیە ، بەتاییەتی لە بوارەکانی سیاسی ئابووری و ئەمنیی و ئاشتیی و ئەم پێشهاتە نوێیانە کە پەیوەستن بە چارەسەری دۆزی کورد و ئەم هەماهەنگییە دەتوانێت زیاتر ببێتە هۆکاری سەقامگیری لە ناوچەکەدا ، لە هەمانکاتیشدا ئەم دیدارە بەڵگەیەکی گرنگە لە پەیوەندییەکانی نێوان تورکیا و هەرێمی کوردستان کە نموونەیەکی جوانی حکوومڕانییە بۆ ئاشتی و ئارامی و پێکەوەژیان لە رۆژهەڵاتی ناوەڕاستدا .
