ریًبوار حەمەلاو شوانی
هەموو ئەو رووداو و پێشهاتانەی كە لەڕووی سەربازی ،سیاسی ، ئابووری و دیپلۆماسییەوە لە ناوچەكە و جیهاندا ڕوویاندا ، ئاماژەیەكی روونن بەوەی كە رۆژهەڵاتی ناوەڕاست چاوەروان و زەمینەسازی گۆرانكاری ڕیشەی دەكرێت ، بەتایبەتی بۆ هەرێمی كوردستان و ئەنجامدانی پرۆسەی هەڵبژاردن لە قۆناغێكی سەخت و هەستیاری ناوچەكەدا رووداوێكی گرنگ و مێژوویی بوو لەكاتێكدا ناوچەكە و جیهان بە قۆناغێكی سەخت و هەستیاردا تێپدەپەڕێت و نەیارانی كوردستان خەونی لاوازكردنی و نەهێشتنی قەوارەی هەرێمی كوردستانیان دەبینی گەلی كوردستان بە دەنگ و متمانەبەخشینەوەیان بە سیستەمی سیاسی و ئەزموونی هەرێمی كوردستان و بەتایبەتی پارتی دیموكراتی كوردستان وەك هێزێكی گەورە و بەرپرسیار لە قۆناغە سەختەكاندا ، ئەو رەوایەتی تەواویان بە سیستەمی دیموكراسی هەرێمی كوردستان بەخشیووە و خەونی ناحەزانیان گەلی كوردیان شكست پێهێنا و لە سەر ئاستی ناوچەیی و نێودەوڵەتیی جارێكی تر سەلمێنرا كە چەندە سیستەمی دیموكراسی و پێشكەوتن و گەشەی بەخۆوە بینیووە و لە هەمانكاتیشدا چەندە كاریگەری و رۆڵیان لە سیاسەت دانان و یاسا دانان بۆ داهاتووی ئەم ئەزموونە دەبێت ، لە ناوچەیەكی دا كە رۆژ بە رۆژ كێشە و ئاڵۆزییەكان زیاتر دەبن و هەرێمی كوردستانیش بە سیاسەت و دیپلۆماسی ژیرانە مامەڵەیەكی سەركەوتوو لەگەڵ جەمسەربەندییەكان و سیاسەتی ناوچەیی و نێودەوڵەتی دەكات كە جێگەی ڕەزامەندی وپەسەندە.
لە سەر ئاستی ناوچەیی و نێودەوڵەتییەوە ، لەگەڵ ئەوەی كێشەكانی گۆرانی كەشوهەوا كاریگەری نەرێنیان جێهێشتووە و بێ چارەسەری ماونەتەوە ، ئەوەش زیانی گەورەی گیانی ومادی بەدوای خۆی جێهشتووە ، ئەمە ناوچەكە و جیهان بە كۆمەڵێك كێشەی تر تێدەپەڕێت بەتایبەتی بەردەوامی كێشە ئاوارەبوون ، زیادبوونی رێژەی ماددەی هۆشبەرەكان و چارەسەرنەكردنی زۆرێك لە پرس و كێشە سیاسییەكان و نەبوونی هیچ پلانێك بۆ دوا رۆژ ئاماژەیەكی روون بە سەرهەڵدانی ململانی و كێشەی زۆر لە ناوچەكە و جیهاندا .
هەروەها رووداو و پێشهاتەكانی رۆژهەڵاتی ناوەڕاست كە سەرەتاكەی لە 7ی ئۆكتۆبەری 2023 دەستیپێكرد ، چاوەروان دەكرێت بە بەرفراوانبوونی جەنگە لە یەمەن و عێراق و ئێرانیش خولێكی تر هێرشی كتوپڕ و چاوەروانكراو لە ناوچەكە بێتە ئاراوە و ببێتە سەرەتای ئاگرێكی تازە و لە ناوچەكەدا و تەواوكاری ئەو نەخشەیەی كە بر|یاری لە سەر دراوە ، بەتایبەت كە چەندین سەركردە و فەرماندەی باڵای حزبولا و سوپای پاسداران و حەماس و گروپ و میلیشیاكانی تر بوون بە لەدەستدانی هەژموونی و باڵادەستی ئێران و لە دەستدانی هیلالی شیعی و بەرەی موقاوەمەی شیعی كە زیاتر لە چوار دەیە بوو خەونیان پێوە دەبینی ئاماژەن بە بەردەوامی گرژی و ئاڵۆزیییەكان و پێچەوانەبوونی و باڵادەستی ئیسرائیل لە ساڵی 2025 دا .
ئەو گۆرانكارییانە بۆ عێراق ساڵێكی پر ئاستەنگ و كێشە دەبێت ، لە رووەوە بوونی دەیان گروپی و میلیشیایی ودەستوەردانی دەرەكی و نەبوونی سەروەری وادەكات كە ڕووبەڕووی كێشە و هەرەشە و مەترسی زۆر ببێتەوە ، بەتایبەت لە رووی ئەمنی و سەربازی و ئابوورییشەوە و بە ئامانجگرتنی گروپ و میلیشیاكانی حەشدی سەر بە ئێران لە لایەن ئەمەریكاو ئیسرائیل و هاوپەیمانانەوە چاوەروانكراوە ، چونكە ئەوە دەبینرێت كە ، عێراق و گروپ و میلیشیاكان لە عێراق كۆتا جەبهەی بەرگریكردنی تارانە لە ناوچەكەدا و بەردەوامی هێرش میلیشیاكان بۆ سەر ئیسرائیل و هاوپەیمانانی لە ماوەی رابردووشدا ، وایكردووە كە بەمەترسی وهەرەشە رژد ببینێت ئەوەش هیچ ڕێگەیەكی دیكەی جگە لەناوبردنیان نەهێشتۆتەوە و بەتایبەت ئەو چەكدار ومیلیشیایانە كە بەشێك بوون لە هیلالی شیعی تارانی و بەرنامەی ئێران لە رۆژهەڵاتی ناوەڕاستدا .
بەتایبەت كە ، شكستی هەژموونی چەندین ساڵەی شیعە هەر لە فەلەستینەوە تا لوبنان و سووریا و یەمەن و عێراقەوە و جێگرەوەی لەلایەن گروپێكی سوونەی میلیشیاییەوە كە توركیا و وڵاتانی عەرەبی سوننە پشتیوانیان دەكەن ، هیچ ڕێگەیەكی تر لە بەردەم ئێران و عێراق بۆ خۆرادەستكردن و كۆتایی هێنان بە هەژموونی شیعی و هەر بۆیە ، گرتنەبەری سیاسەتی پەراوێز خستنی دەسەڵاتدارانی شیعی لەماوەی 22 ساڵی رابردوو بەرامبەر بە سوننەكان و دەرەكردنیان لە پرۆسەی سیاسی واد ەكات كە گۆرانكارییەكان لە عێراقیشدا چاوەروان كراو بن .
بۆ هەرێمی كوردستانیش كە خاوەن قەوارەیەكی یاسایی و دەستوورییە و هەمیشە سیاسەت و دیپلۆماسییەكی هاوسەنگ لە سەر ئاستی ناوخۆیی و ناوچەكە و نێودەڵەتی پەیڕەو دەكات ، لە ئێستاشدا كە هەنگاوەكان بەرەو پێكهێنانی كابینەی دەیەمە، دەخوازێت گشت هێزولایەنە كوردستانییەكان بەڕەچاوگرتنی ئەو پێشهات و گۆرانكارییانە و هەنگاونان بەرەو داهاتوویەكی باشتر ، هەمیشە بەرژوەندییە باڵاكانی گەل و نیشتیمانەكەیان پێش هەموو بەرژوەندییەكی كەسی و حزبی بخەن و هەم لە پێناو پارێزگاریكردن لە ئەزموون و قەوارەی هەرێمی كوردستان و هەمیشە لە پێناو سوودمەندبوون و دەستكەوتی زیاتر لەو رووداو وگۆرانكارییانەی كە ناوچەكە و جیهاندا روودەدەن و چاوەروان كراون.
