زاری كرمانجی-سۆران
ڕاگەیاندنی وەزارەتی دارایی و ئابووری هەرێم بڵاوی كردەوە: ” دوای سەردانی تیمی تەكنیكی وەزارەتی دارایی و ئابوری هەرێمی كوردستان بۆ بەغدادو بردنی لیستی مووچەی مانگی كانونی یەكەم بۆ وەزارەتی دارایی حكومەتی فیدراڵ، دوای هەوڵە بەردەوامەكانیان لە گەڵ فەرمانگە پەیوەندیدارەكانی وەزارەتی دارایی عێراق، تیمی تەكنیكی وەزارەتی دارایی هەرێمی كوردستان سەركەوتووانە توانیان كێشەی گواستنەوەی پارە لە تەرخانكراوەكانی پشكی هەرێم بۆ زیادكردنی بڕی تەرخانكراو بۆ مووچە چارەسەر بكەن”.
لە ڕاگەیاندراوەكەی وەزارەتی دارایی و ئابووری هەرێمی كوردستان، ئاماژەش بەوەكراوە: ” ڕۆژی دووشەممە ( ٢٠٢٤/١٢/٩ ) لەلایەن بەڕێوبەرایەتی گشتی بودجەی وەزارەتی دارایی عێراقەوە فرمانی گواستنەوەكە دەرچوو”.
ئەوەش خراوەتەڕوو: ” تیمەكەمان بەبەردەوامی لەسەر هێڵە بەمەبەستی بەدواداچوون بۆ جێبەجێكردنی بڕیارەكەو گەیشتنی پارەكە بەمەبەستی چارەسەركردن و پڕكردنەوەی ئەو كورتهێنانەی بۆ مووچەی هەرێم لەلایەن وەزارەتی دارایی عێراقەوە دروست كراوە.
