محەمەد ئامۆكەیی- زاری كرمانجی:
لە وەرزشوانەوە بۆ بواری نواندن و میدیایی پۆڵی حەوتەمی بنەڕەتی دەبێت لە قوتابخانە یەكەم نمایشی شانۆی ئەنجام دەدات و تا دەبێت بە ئەستێرەیەكی درەوشاوە و لە سەر ئاستی وڵاتان بەشداری پێشبڕكێ دەكات و خەڵاتی فێستڤاڵ بەدەست دێنێت، هەوار فارس، لەساڵی 1992 لە شاری هەولێر لە دایكبووە، دەرچووی پەیمانگای هونەرە جوانەكانی كەركوك بەشی نواندنە و ئێستا پەیامنێرە لە دەزگای میدیایی كەركوك لە دیدارێكی زاری كرمانجی بۆچوونی خۆی لەسەر بواری راگەیاندن و كاری شانۆی دەردەبڕێت.
هەوار فارس، باس لەیەكەم كاری نواندی دەكات و دەڵێت: دەستپێكی كاری هونەریم ساڵی 2007 بوو ئەوكاتە خوێندكاری قۆناغی حەوتەمی بنەڕەتی بووم لە خوێندنگەی هۆزانی كچان، بەشی چالاكی و هونەری قوتابخانەكان ساڵانە فێستیڤاڵی سازدەكرد منیش لە دوو قۆناغی جیادا بە پشتیوانی م. عەزیز عومەر ئاشنای نێو دونیای شانۆبووم، لە دوای دەرچوونم لەقۆناغی نۆ، خاڵی خوالێخۆشبووم م. نیزامەدین) فۆڕمی پەیمانگای بۆ وەرگرتم، بەهۆی ئەوەی من ساڵانێكی زۆر وەرزشكاربووم و یەكێك بووم لە وەرزشكارە دیارەكانی كەركوك، بەشی شانۆم هەڵبژارد چونكە پەیمانگای وەرزشی لە كەركوك نەبوو، بیرمە ئەوكاتە یەكێك لەمامۆستاكانی پەیمانگا وتی ئێمە وەرزشی شانۆمان هەیە و ئەتوانی بێیتە ئەو بەشە، منیش لێی نەوەستام و لە ساڵی ٢٠١٠ەوە بووم بە خوێندكاری قۆناغی یەكەمی بەشی شانۆ”.
ئەو شانۆكارە روونی دەكاتەوە” لەماوەی پێنج ساڵی خوێندنم لە پەیمانگای هونەرە جوانەكان لە دەیان كاری هونەری بەشداریم كردووە، یەكەم كاری نواندنم لە قۆناغی یەكەم، شانۆی مامۆستابوو نووسینی یۆژین یونسكۆ و كۆتا كاریشم لە پەیمانگا لە قۆناغی پێنجەم نمایشی شانۆیی ( ژنە گۆرانی بێژی كەچەڵ ) بوو، جگە لە نمایشەكانی نێو پەیمانگا لە چەندین فێستیڤاڵی نێودەوڵەتی بەشداریم كردووە لە شانۆی هۆڵ و شانۆی سەرشەقام” .
هەوار شانۆ بە واتای راستگۆیی و مرۆڤدۆستی و رەوشت بەرزیی ناودەبات وەك خۆی دەڵێ” ئەگەر ئەم سێ بنەمایەت تێدابەدینەكرا ئەستەمە شانۆكارێكی باشبیت و بتوانیت گرینگی شانۆ بخەیتەڕوو، شانۆ خۆبەختكردن و خۆتەرخانكردنی دەوێت تاكو بتوانیت لە ڕێگەی هونەرەكەتەوە شانۆی كوردی بە گەلانی جیهان بناسێنیت “.
هەوار فارس، جەخت دەكاتەوە لەوەی هەندێ شانۆكاری گەنج توانیویانە ئاستی شانۆ بەرەو باشی ببەن، گووتیشی” شانۆی كوردی لە ئێستایا لەسەر دەستی چەند شانۆكارێكی گەنج و بە ئەزموون لە ئاستێكی باشدایە، ئەگەر نەبێت بە وەسف و پیاهەڵدان ئێمە وەك گروپی شانۆیی هەوار لە ئێستادا لەگەڵ وڵاتانی ئەوروپی و عەرەبی لە فێستڤاڵە نێودەوڵەتییەكانی دەرەوە ململانێ دەكەین و شانۆیی كوردیانیان پێدەناسێنین، لەو پێناوشدا چەندین خەڵاتمان بەدەستهێناوە، یەكێكی دیكە لەو نمایشە سەركەوتوانەی كە لە چەند مانگی رابردوو لە چەند پارێزگایەكی كوردستان بینیمان و ئاستێكی زۆرباش و بینەرێكی بێ شوماری هەبوو( دوا ڕۆژەکانی بابلۆ) بوو ئەتوانم بڵێم شانازیەکی دیکە بوو بۆ شانۆی کوردی.
