لە توركیا؛ لە ماوەی 40 رۆژ 104 ژن كوژراون

رۆژنامەیەكی توركی : كوشتنی ژنان لە توركیا بووەتە دیاردە

مەهدی محەممەد – زاری كرمانجی :

رۆژ بە رۆژ رووداوەكانی كوشتنی ژنان لە توركیا زیاتر دەبێت و رێكخراوەكانی ژنانیش هۆشداری دەدەن ئەگەر كوشتنی ژنان بەو شێوەیە بەردەوام بێت، ئەم وڵاتە دەبێتە مەیدانی قڕ كردنی ژنان، لە ئامارێكی رۆژنامەیەكی توركی تەنیا لە ماوەی 40 رۆژ 104 ژن بە دەستی پیاوان كوژراون.
رۆژنامەی (ئەڤرەنسەل) توركی بڵاوی كردەوە “لە ماوەی 40 رۆژدا 104 ژن بە دەستی پیاوان كوژراون،” دەشڵێت “بەگشتی لە 10 مانگی رابردووی ئەمساڵدا 357 ژن بە دەستی پیاوان لە توركیا كوژراون.”
دواین رووداوی كوشتن، ئافرەتێكی تەمەن 43 ساڵ بوو بە ناوی (لەیلا ئوران) كە تەرمەكەی لە نێو ماڵەكەی خۆیدا بە سەربڕاوی دۆزرایەوە.
رێكخراوەكانی ژنان نیگەرانن بەرامبەر بە زیادبوونی رووداوەكانی كوشتنی ژنان و هۆشداری دەدەن ئەگەر كوشتنی ژنان بەو شێوەیە بەردەوام بێت، دوای چەند ساڵی تر رێژەی ژنان لەم وڵاتە بە تەواوی كەم دەبێت و توركیاش دەبێتە وڵاتى ژن كوژان.