سەرۆکی دەستەی ناوچە کوردستانییەکانی هەرێم وەڵامی راگەیەندراوێکی وەزارەتی دەرەوەی تورکیای دایەوە و رایگەیاند” ئەوانەی بۆ سەرژمێری گەڕانەوە کەرکوک خەڵکی رەسەنی شارەکەن”.
فەهمی بورهان، سەرۆکی دەستەی ناوچە کوردستانییەکانی دەرەوەی ئیدارەی هەرێم گووتی” ئێمە وەک نەتەوەی کورد سوپاسگوزارین هەر لایەنێک پێمان بڵێت کێ کەرکوکی نییە بەپێی یاسا و دەستور با دووری بخەینەوە، ئەوەی کە دەگووترێت ئەوانەی رۆشتوونەتە کەرکوک، خەڵکی شارەکە نین، نادەستووری و نایاساییە”.
ئەوەشیخستەڕوو” کەرکوکییەکان لەو رۆژەدا نیشانیاندا کە بەپێی یاسا خاوەنی ئەو شارەن”.
فەهمی بورهان ئاماژەی بەوەشکردووە” حزبی بەعس و دیکتاتۆرییەت نەیتوانی خۆشەویستی کەرکوک لە ناخی کەرکوکییەکاندا بهێننە دەرەوە، ئێستا قورسە بە میزاجێکی شەخسی و سیاسەتێکی شۆڤێنی بهێنێتە دەرەوە”.
وەزارەتی دەرەوەی تورکیا لە راگەیەندراوێکدا باسی لەوەکردبوو، ئەو کەسانەی لە رۆژانی سەرژمێرییدا لە هەرێمی کوردستانەوە چوونە کەرکوک، خەڵکی شارەکە نەبوون.
