ئیسرائیل لە نامەیەكدا هەڕەشە لە عەسائیب و بەدر و چوار میلیشیای دیكەی عێراقی دەكات

زاری كرمانجی – سۆران :

وەزیری دەرەوەی ئیسرائیل، لە نامەیەكدا كە ئاراستەی سەرۆكی ئەنجوومەنی ئاسایشی سەر بە ڕێكخراوی نەتەوە یەكگرتووەكانی كردووە، هەڕەشە لە چەند میلیشیایەكی عێراقی دەكات و بە پێشێلكردنی یاساكانی نێودەوڵەتی تۆمەتباریان دەكات .
زاری كرمانجی دەقی نامەكەی لە ئاژانسی (باسنیوز) وەرگرتووە و جارێكی تر بڵاوی دەكاتەوە .

دەقی نامەكەی وەزیری دەرەوەی ئیسرائیل بۆ ئەنجوومەنی ئاسایشی نەتەوە یەكگرتووەكان :

بۆ بەڕێز باڵیۆز باربرا وۆدوارد، سەرۆكی ئەنجوومەنی ئاسایش، نەتەوە یەكگرتووەكان، نیویۆرك.
ئەم نامەیە دەنووسم، بۆ ئەوەی گوزارشت لە دڵەڕاوكێی قووڵی خۆمان بكەین سەبارەت بەو هەموو هێرشە چڕانەی لە ئەیلوولی 2024ەوە لەلایەن میلیشیاكانی سەر بە ئێران لە عێراق دەكرێنە سەر ئیسرائیل.
ئەو هێرشانە پێشێلكاریی ڕوونن لە ڕێككەوتننامەی نەتەوە یەكگرتووەكان و یاسای نێودەوڵەتی، كە دەبنە هۆی گرژیی ترسناك و هەڕەشە لە سەقامگیریی ناوچەكە و ئاسایشی نێودەوڵەتی دەكەن.
دوای ئەو هێرشە تیرۆریستییەی حەماس لە 7ی تشرینی یەكەمی 2023 كردییە سەر ئیسرائیل، میلیشیاكانی سەر بە ئێران وەك (كەتائیبی حیزبوڵڵا، عەسائیبی ئەهلی حەق، نوجەبا، كەتائبی سەید ئەلشوهەدا، ئەنساڕوڵا ئەلئەوفیا، بەدر و … هی دیكە) سەدان فڕۆكەی بێ فڕۆكەوانی جۆری شاهد و هی دیكە، لەگەڵ مووشەكی كرۆز لە جۆری (Raad 351)یان تەقاندووە.
ئەو هێرشانەی لەلایەن میلیشیاكانی سەر بە ئێران، ژێرخان و ناوچەی مەدەنی و بنكەی سەربازییان بۆردوومان كردووین، ئەگەرچی هەندێك لەو فڕۆكە بێ فڕۆكەوانانە و مووشەكانە تێكشێنران، بەڵام هەندێكیان بوونە هۆی زیانی گیانی و زیانگەیاندن لەناو خاكی ئیسرائیل، وەك هێرشەكەی 3ی ئەیلوول، كە هێرشێكی فڕۆكەی بێ فڕۆكەوان لە عێراقەوە كرایە سەرمان، یەكێكیان بەهۆی بەرگریی ئاسمانی تێكشكێنرا، بەڵام ئەوەی دیكەیان بەر بنكەیەكی سەربازی كەوت لە باكووری ئیسرائیل و بووە هۆی كوشتنی دوو سەرباز و برینداربوونی 24 سەربازیی دیكە.
ئەوەی باسمان كرد، ئاماژەیە بۆ ئەوەی كە ئەو میلیشیایانە بەشێكن لە هێزەكانی (حەشدی شەعبی)، كە تۆڕێكی سەربازییە و دەوڵەتی عێراق بەڕێوەی دەبات و لەژێر فەرمانی ئێرانیشدا كار دەكەن.
بەپێی یاسای نێودەوڵەتی، حكومەتی عێراق بەرپرسیارە لە ڕێگریكردن لە بەكارهێنانی خاكەكەی بۆ هێرشكردنە سەر وڵاتانی دیكە، ئیسرائیل داوا لە حكومەتی عێراق دەكات پابەند بێت بە بەڵێنەكانی و گرتنە بەری ڕێوشوێنی بەپەلە بۆ ڕێگریكردن لەو هێرشانە.
لەژێر ئەو ڕۆشنایییە، دەمەوێت ئەوە دووپات بكەمەوە، كە ئیسرائیل مافی ئەوەی هەیە بەپێی مادەی 51 لە ڕێككەوتننامەی نەتەوە یەكگرتووەكان بەرگریی لە خۆی بكات و هەموو ئەو ڕێوشوێنە پێویستانە بگرێتە بەر، بۆ پاراستنی خۆی و هاووڵاتییانی لە دژی هەر هێرشێكی لەلایەن میلیشیاكانی سەر بە ئێران لە عێراق دەكرێتە سەری.
بەگوێرەی ئەمە، داوا لە ئەنجوومەنی ئاسایش دەكەم، ڕێوشوێنی بەپەلە بگرێتە بەر بۆ دەستنیشانكردنی ئەو بارودۆخانە و پابەندبوونی حكومەتی عێراقیش مسۆگەر بكات بە پابەندبوونەكان بەگوێرەی ڕێككەوتننامەی نەتەوە یەكگرتووەكان ژمارە 1546، كە داوای قەدەخەكردنی هاتووچۆی تیرۆریستان دەكات لە و بۆ عێراق، هەروەها چەكداركردنی تیرۆریستان و پاڵپشتیكردنیی مادییان قەدەخە دەكات.
سوپاستان دەكەم ئەگەر ئەم نامەیە وەك بەڵگەنامەیەكی فەرمی لە ئەنجوومەنی ئاسایش بڵاو بكرێتەوە.

جەدعۆن ساعر

وەزیری دەرەوەی ئیسرائیل