رێبوار حەمەلاو شوانی
ساڵانێکە نەیارانی کوردستان جۆرها سیناریۆ و پیلان تاقی دەکەنەوە لە پێناو لاوازکردن یانیش ئەگەر بۆیان بکرێت نەهێشتنی قەوارەی هەرێمی کوردستان و لە باربردنی دەستکەوتەکانیان ، هەڵبەتە بەکارهێنانی ئەو پیلانگێری و خەونانە زۆرجاران بە شێوەی ناڕاستەوخۆ و هەندێک لایەنی لاواز لە ڕووی نیشتیمانپەوەری و کوردپەوەری و بەهۆی پێشخستنی بەرژوەندی کەسی و حزبیانەوە نەیارانی کوردستان توانیوویانە تا رادەیەک بە خەون و مەرامەکانیان بگەن ، ئەویش بەرێگەی زیانگەیاندن بە بیروباوەری کوردپەوەری و نیشتیمانپەوەرییەوەیە ، یانیش بەکارهێنانی جۆرها کارتی گوشاری وەک دادگە و هێزی سەربازی و دارایی و ئابوورییەوە ، بەڵام خۆشبەختانە بوونی حزبێکی بەهێز و سەرکردایەتییەکی ژیرانە و گەلێکی خۆڕاگر ڕێگەی نەداوە خەونی ناحەزانی ئەم گەل و نیشتیمانە بێتەدی.
بۆیە، ئیتر کاتی ئەوە هاتووە مامەڵەیەکی واقیعیانە لە گەڵ هێز و لایەنەکان بەشدار لە پرۆسەی سیاسی هەرێمی کوردستان بکرێت و ئەوەی لەماوەی 5 خولی پەرلەمانی و 9 کابینەی بەڕێوە چوو ئیتر دووبارە نەبێتەوە واتا هەر حزب و لایەنێک بە قەد قەبارە و کورسییەکانی خۆی ، ئەوەش تەنها لە پێناو بەهێزترکردنی پایەکانی حکوومرانی و بەهێزترکردنی قەوارەی هەرێمی کوردستان .
هەر ئەوەش وایکرد پارتی دیموکراتی کوردستان لە ماوەی هەڵمەتی هەڵبژاردنەکانی پەرلەمانی کوردستان و پێشتریش سەرۆک بارزانی ڕاشکاوانە نەخشەڕێگەیەکی نوێی لە پێناو داهاتوویەکی باشتر و پڕ دەستکەوتر و کوردستانێکی بەهێزتر خستە رووی کە پێکهاتووە لە ( یەک هەڕێم ، یەک پەرلەمان ، یەک حکوومەت و یەک هێزی پێشمەرگە)، هەڵبەت ئەم نەخشە و پلانە ستراتیژییە لە پێناو بەرژوەندییە باڵاکانی گەل و نیشتیمانە کە سەرۆک بارزانی لە پەرۆشی و خەمخۆریان بۆ ئێستا و ئایندەی کوردستان پێشنیاری کردووە و ئەوە هەنگاوێکی زۆر گرنگ و مێژووییە بەدڵنییاییەوە رەزامەندی وڵاتانی زڵهێز و دۆستانی گەلی کوردیشی پێوە دیارە وەک چۆن لە رابردوو جەختیان لە سەر بوونی کورستانێکی بەهێزتر وپشتیوانیکردنی دەکردەوە .
بۆیە، ئیتر کاتی ئەوە هاتووە بە رژدی و ڕەچاوی بەرژوەندییەکانی گەل و نیشتیمان بکرێت و چونکە ئیتر لە دوای 20ی ئۆکتۆبەری 2024 وە بۆ هەمووان ر وون بۆوە کە هەرێمی کوردستان چووە قۆناغێکی نوێی و جیاوازەوە و جارێکی تر دیموکراسی و ئازادی و پارێزەری قەوارەی هەرێمی کوردستان سەرکەوت و شەرعییە و شکۆ بۆ پەرلەمان و هەرێمی کوردستان و دامەزراوەکانی بە شێوەیەکی گشتی گەڕایەوە .
زۆر گرنگە و دەبێ پەلە بکرێت لە پێکهێنانی کابینەی دەیەم ، حکوومەتی هەرێمی کوردستان و هەموو ئەو نەخشە ڕێگە و بنەمایانەی کە سەرۆک مسعود بارزانی پێشنیاری بۆ کردووە ، بە پێی ماف و کورسی هەر حزب ولایەنێک ڕەچاوی ژمارەی دەنگ و متمانەی خەڵکی کوردستان بکرێت . بۆیە ، ئێستا هەموو خەڵکی کوردستان چاوەروانی کوردستانێکی سەقامگیرتر و گەشەسەندووتر و تەبا دەکەن لە پێناو بونیاتنانی کوردستانێکی بەهێزتر دا .
