زاری كرمانجی:
رۆژنامەی سۆزجوی توركی لە بابەتێكیدا باس لە گەڕانەوەی ترەمپ دەكات بۆ كۆشكی سپی و لە زاری جەنەڕاڵێكی خانەنشینی توركیاوە دەڵێت، ”ترەمپ رێ بۆ دروستبوونی دەوڵەتێكی كوردی خۆش دەكات”.
لە رۆژنامەكەدا هاتووە، عوسمان پاموكئۆغڵو جەنەڕاڵی خانەنشینی توركیا لەپای ئەو پاڵپشتیانەی كە ئێستا لە توركیا هەیە بۆ ترەمپ، ئاماژە بەوە دەكات نابێت خەیاڵ پڵاو بن، بۆ پاڵپشتیكردنی ئەم بۆچوونەشی دەڵێت، ”سەیری ئەو كادرانە بكەن كە بۆ كابینەكەی دەستنیشانی كردوون، لە دژی توركیان، لە پاڵپشتی ئیسرائیلیشدان دەبن.”
بەشێك لەو كاندیدانەی ترەمپ بۆ پلە و پۆستە باڵاكانی ئیدارەكەی دەستنیشانیكردوون، پێشتر بەرگرییان لە كورد كردووە و هاوسۆزی دۆزی كورد بوون، لە دژی ئێران و توركیاش قسەیان كردووە. یەكێك لەوانە مایك واڵتزە كە وەك راوێژكاری ئاسایشی نینشتیمانی دەستنیشانكراوە و پێشتر بە یەپەگەی گوتووە، باشترین هاوپەیمانمانن.
هاوكات ترەمپ ماركۆ روبیۆ، سیناتۆری فلۆریدای وەك پاڵێوراوێكی پۆستی وەزیری دەرەوەی دەستنیشانكردووە، كە پێشتر گوتوویەتی’كاتی دروستبوونی دەوڵەتی كوردییە.”
چاوەڕوان دەكرێت دۆناڵد ترەمپ، سەرۆكی هەڵبژێردراوی ئەمریكا ماركۆ رۆبیۆ سیناتۆری فلۆریدا بۆ پۆستی وەزیری دەرەوەی ئەمریكا كاندید بكات، كە چەندین جار هەڵوێستی لەسەر كورد هەبووە و بەئاشكراش داوای سەربەخۆیی كوردستانی كردووە.
جەنەڕاڵە خانەنشینەكەی توركیا دەڵێت: ”خەونی ئەمریكا و ئامانجی سیاسییەكەی ئەوەیە لە رۆژهەڵاتی ناوەڕاستدا لەنێو ئێران و عەرەبەكاندا دەوڵەتێكی كوردی قوتكاتەوە، بۆ ئەمەش لە عێراق 10 هەزار و لە سوریا 70 هەزار كەسی چەكدار كردووە، بایدن یاری بە دۆخەكە دەكرد، ترەمپ كەسێكی سترێسە، رێگەی پێ دەدات.
