زاری كرمانجی – سۆران :
سەرۆككۆمارى توركیا، دوای كۆتاییهاتنی كۆبوونەوەی حكومەتەكەی، لە بارەی پرسی دانانی قەیووم بۆ شارەوانیی ناوچەی ئەسەنیورت لە ئیستەنبوڵ و شارەوانییەكانی مێردین، ئێلهـ و خەلفەتی لە باكووری كوردستان ڕاگەیاند “ئەو سەرۆك شارەوانییانەی لابراون تیرۆریست و جوداخوازن،” ڕەجەب تەییب ئەردۆغان، سەرۆكی توركیا دوای ماوەیەك لە بانگەشەكردن بۆ ئاشتی نێوان تورك و كورد و نواندنی نەرمی بەرامبەر بە پرسی كورد، جارێكی تر هەڵوێستەكانی توندتر كردەوە بە تایبەت دوای لابردن و دوورخستنەوەی سێ سەرۆك شارەوانی كورد لە پۆستەكانیان و دانانی قەیووم لە جێگایان.
دوێنێ یەكشەممە 10ـى تشرینی دووەم، ئەردۆغان دوای كۆتاییهاتنی كۆبوونەوەی حكومەتەكەی گووتی “مەرجی لە پێشینە و یەكەمی دیموكراسی، ڕەتكردنەوەی تیرۆر و هەڵچنینی دیوارێكی ئەستوورە لەنێوان خۆت و تیرۆردا.”
سەرۆككۆماری توركیا سەبارەت بە بڕیارەكانی ئەم دوایەی وەزارەتی ناوخۆی وڵاتەكەیەوە بۆ دوورخستنەوەی سێ سەرۆكی شارەوانی كورد و دانانی قەیووم، ڕایگەیاند”ئەوانە سەرۆكی هەڵبژێررا و نین، بەڵكوو لەلایەن پەكەكەوە دەستنیشان كراون و لەبری خزمەتكردنی شارەكانیان، خزمەت بە پەكەكە دەكەن.”
هەفتەی ڕابردوو لە بڕیارێكی وەزارەتی ناوخۆی توركیا، هەریەك لە سەرۆك شارەوانییەكانی مێردین، ئێلهـ و خەلفەتی لە باكووری كوردستان لە پۆستەكانیان دوورخرانەوە و لە جێگایاندا قەیووم دانران. ئەمەش ناڕەزایی و نیگەرانی ئەندام و لایەنگرانی دەم پارتی لێكەوتەوە و هاووڵاتییانی كورد لە 47 پارێزگای باكووری كوردستان و توركیا ڕژانە سەر شەقامەكان و لە هەندێك شوێنیش گرژیی و ئاڵۆزیی بەدوای خۆیدا هێنا، لە لایەكی تریشەوە لایەنگرانی جەهەپە و پارتی دەم، چالاكیی مانەوەیان لەبەردەم باڵەخانەی شارەوانییەكان دەستپێكردووە و سوورن لەسەر بەردەوامیدان لە ناڕەزایەتییەكانیان دژی دانانی قەیووم.
