زاری كرمانجی- سۆران:
بەڕێوەبەری گشتی دیوانی وەزارەتی ناوخۆ لەبارەی دانانی كامێراكانی تیژڕەوی لە كۆنگرەیەكی رۆژنامەوانی روونكردنەوەیدا و گووتی ” كامێرا بۆ سزادانی هاووڵاتییان دانانێین، بۆ ئەوەش نییە پارە بە كۆمپانیا یا حكومەت بدەین، مەبەست لێی پاراستنی گیان و ماڵی هاووڵاتییانە”.
د.هێمن میرانی بەڕێوەبەری گشتی دیوانی وەزارەتی ناوخۆی حكومەتی هەرێم لەكۆنگرەیەكی ڕۆژنامەوانیدا رایگەیاند “رۆژانە بە رووداوەكانی هاتوچۆو كەسێك یا دوو كەس گیان لەدەستدەدەن، نزیكەی 18 كەسیش بەهۆی سەركێشییەوە برینداردەبن، بۆیە وەزارەتی ناوخۆ ناچارە دەست بۆ هەموو ئەو ڕێنماییانە ببات كە هەن لەكوردستان و بیانخاتە بواری جێبەجێكردنەوە لەپێناو سەلامەتی هاووڵاتییان”.
زیاتر روونیكردەوە” شەقامی خێراو شەقامی نوێ لەهەرێمی كوردستان دروستدەكرێت، ئەگەر كامێرا نەبێت، بەدڵنیاییەوە ژمارەی ئەو كەسانەی گیان لەدەست دەدەن زۆر زیاتر بەرز دەبێتەوە”.
باسی لەوەش كرد “وەك حكومەت ئەركمانە سەرو ماڵی هاووڵاتییان بپارێزین، جگە لەو قوربانییە گەورە گیانیانە، رۆژانە زیانێكی ئێجگار گەورە بەر داهاتی هاووڵاتییان و داهاتی نیشتمانی دەكەوێت، هەر ئۆتۆمبێلێك تووشی رووداوی هاتووچۆ دەبێت، بەلای كەم 10 هەزار دۆلار لەسەر گیرفانی هاووڵاتی دەكەوێت، ئەمەش دواجار بەزیانی داهاتی ئەم وڵاتەیە، هەركەس بریندار دەبێت و دەبرێتە نەخۆشخانە، لەماوەی تەنها كاتژمێرێكدا 800 دۆلار لەسەر حكومەت دەكەوێت، ئەمە جگە لەكارەساتێكی گەورەی كۆمەڵایەتی كە بەسەر خێزانەكانی ئەم وڵاتەدا دێت”.
لە بەشێكی قسەكانیدا هێمن میرانی پەیامێكی ئاراستەی هاووڵاتییان كرد و گووتی” تكایە گوێ لەو لایەنانە مەگرن كە دەیانەوێت بەموزایەدە بەسەر ئێوەدا بكەن و دەیانەوێت بەهاندانی هاووڵاتییان و بەلاڕێدا بردنی هاووڵاتییان، هەوڵی بوون بەپەرلەمانتاری بدەن”.
