” هەر جارێك بۆ كارێكی پێویست روو لە شار بكەین ئەوا بڕێك پارە بۆ توندو تۆڵكردنەوەی ئۆتۆمبێلەكانمان خەرج دەكەین “

بەڕێوەبەری ناحیەی خەلیفان: هەوڵدەدەین لە نزیكترین كاتدا دەست بكرێت بە چاككردنی رێگای ئەو گوندانە

سۆران سرێشمەیی- خەلیفان:

دانیشتوانی حەوت گوندی دۆڵی بیاو لە سنووری ناحیەی خەلیفان، داوای قیرتاوكردن و چاككردنی رێگاكەیان دەكەن و دەڵێن” رێگاكە ژمارەیەكی زۆر گوند لێی سوودمەند دەبن، دۆڵی “بیاو” بە دیوی قەندیل و ناوچەی بادینان و دۆڵی “نەقەب” دەبەستێتەوە هەروەها رێگاكە بۆ گوندەكانی بەری نزاری دەڤەری بارزانیش دەچێت، لە ئەگەری چاك نەكردنی رێگاكە، رەنگە گوندەكان بەتەواوی چۆڵ بكرێن، بەڕێوەبەری ناحیەش، موژدە بە خەڵكی دەڤەرەكە دەدات.
سەردار فەقێ دانیشتووی گوندی بەوركانی دۆڵی بیاو بەزاری كرمانجی گووت:” سەرەتای رێگاكە لە گوندی بەوركان بە درێژی زیاتر لە ١٠ كیلۆمەتر دەست پێدەكات لە گوندی بێخمە و ماڵەموس كۆتایی دێت، هەروەها جگە لەمە گوندەكانی كونە سیخوڕ، ساوا، دۆڵە تێسوو، بێكە، دەكەونە سەر رێگاكە، دانیشتووانی ئەو گوندانە بەدەست خراپی ڕێگاكەیان دەناڵێنن و هیچ كەڵكی هاتووچۆی تێدا نەماوە، بۆیە داواكارین لایەنی پەیوەندار ئاوڕێك لەو رێگایە بداتەوە و چارەسەری بنەڕەتی ئەو گرفتەمان بۆ بكات.”
نەجات عوسمان، هاوڵاتی گوندی “ساوا”، یەو پێشمەرگەیە، ئاشكرایكرد:” بەهۆی خراپی رێگاكە لە ساڵانی ڕابردوو ژمارەیەكی زۆر لە دانیشتوانی گوندەكان بەرەو سۆران و خەلیفان كۆچیان كردووە و گەر وا بڕوات گوندەكانی دیكەی ئەو ناوچەیە بەتەوای چۆڵدەكرێن، چونكە هەر جارێك بۆ كارێكی پێویست روو لە شار بكەین ئەوا بڕێك پارە بۆ توندو تۆڵكردنەوەی ئۆتۆمبێڵەكانمان خەرج دەكەین و زیانی ماددیمان پێدەگات، هەروەها لەبەئەوەی گوندەكان دەڕوانە سەرئاوی رووبارو زێی گەورە، ناوچە دەوڵەمەندە بە بەروبوومی سامانی ماسی و خەڵكەی بە كشتوكاڵكردنی جۆراوجۆروە خەریكن، لە وەرزی هاوین بەهۆی خراپی رێگاكە و تەپو تۆزی زۆر ناتوانین بەرهەمەكانمان بگەینە بازاڕ و ساخی بكەینەوە، چونكەتا دەگات خراپ دەبێت، هەروەها لە زستانیش ئاستەنگی هاتووچۆمان بۆ درووست دەبێت، بەتایبەت لە كاتی بارینی بارانی بەخوڕ و بارینی بەفری زۆر.”
جەمال نەبی، موختاری هەردوو گوندی”بێخمەو دۆڵەتێسوو”، باس لە گرنگی رێگاكە دەكات و بۆ زاری كرمانجی ئاماژەی بەوەكرد:” جیا لەوەی حەوت گوند دەكەونە سەرئەو رێگایە، هەروەها ناوچەیەكی ستڕاتیژیە و دۆڵی بیاو بە گوندەكانی دۆڵی نەقەب و ناحیەی دینارتە لە لایەك و قەندیل و دەڤەری بادینان لە لایەكی دەبەستێتەوە، جگە لەمە لقێكی رێگاكە بەرە و گوندەكانی بەری “نزار”ی دەڤەری بارزان دەچێت و دۆڵی بیاو بەو گوندانە دەبەستێتەوە.”
موختار، روونیشكردەوە:” چەندین جار لە رایەڵەی جیاوازەوە داوای چاككردن و قیڕتاوكردنی ئەو رێگایەمان لە بەرپرسانی حكوومی و حزبی ناوچەكە كردووە، بەڵام تا ئێستاش بێ وەڵام ماوەتەوە، كۆتا جار نزیك بە دوو هەفتە لەمەوبەر بەناوی دانیشتوانی هەر حەوت گوند، بە واژۆی موختاری سەرجەم گوندەكان نووسراوێكمان ئاڕاستەی ئیدارەی سۆران كرد، تێدا داوامان كردووە هەوڵی جدی بدرێت بۆ چاككردنی رێگای گوندەكانی بەری چەپی دۆڵی بیاو، هیوادارین ئەو جارە داواكەمان نادیدە نەگیرێت و لەو دۆخە خراپە دەربازمان ببێت.”
لە بارەی داواكاری دانیشتوانی بەشێك گوندەكانی دۆڵی بیاو. هەڵكەوت وەڵاشی بەڕێوەبەری ناحیەی خەلیفان بە بەوەكالەت بە زاری كرمانجی راگەیاند:” لە ١٥ ئایاری ئەمساڵ، سەرپەرشتیاری ئیدارەی سۆران بە یاوەری بەڕێوەبەری رێگاوبانی سۆران لە سەردانێكی مەیدانی بۆ دۆڵی بیاو لە نزیكەوە ئەو رێگایەی بەسەر كردەوە و دەستبەجێ داوایكرد، دەرخستەی بۆ بكرێت و لەگەڵ وەزارەتی پەیوەندیدار هەماهەنگی بكرێت، چونكە بەهۆی درێژی ڕێگاكە دیارە خەرجیەكی زۆری دەوێت و رەزامەندی وەزارەتی ئاوەدانكردنەوەشی پێویستە.
بەڕێوەبەری ناحیەی خەلیفان، گووتیشی:” هەوڵدەدرێت لە نزیكترین ماوەدا، دەست بكرێت بە جێبەجێكردنی پڕۆژەكە و چاككردنی رێگای ئەو گوندانە، كە بێگومان سوودی زۆری بۆ دانیشتوانان لە هەموو روێكەوە دەبێت”.