زاری كرمانجی :
ئەمڕۆ چوارشەممە 19ی ئۆكتۆبەر، مەسرور بارزانی سەرۆكی حكومەتی هەرێمی كوردستان، ستراتیجی وەرچەرخانی دیجیتاڵی راگەیاند.
ئەمەش دەقی گوتاری سەرۆكی حكومەتی هەرێمی كوردستانە:
بەناوی خوای گەورە و میهرەبان
ئامادەبووانی بەڕێز
بەیانیتان باش
بەختەوەرم ئەمڕۆ لێرە پڕۆژەیەكی گرنگی دیكە ڕادەگەیەنین، ئەویش ستراتیجی وەرچەرخانی دیجیتاڵییە كە بەشێكە لە پرۆسەی چاكسازییەكانی كابینەی نۆیەمی حكومەتی هەرێمی كوردستان لە بواری بەدیجیتەڵكردنی خزمەتگوزارییە گشتییەكان و هەنگاونان بەرەو حكومەتی ئەلیكترۆنی.
لێرەدا بە پێویستی دەزانم دەستخۆشی لە فەرمانگەی تەكنەلۆجیای زانیاری حكومەتی هەرێمی كوردستان بكەم بۆ ئامادەكردنی ئەم ستراتیجییەو كاركردنی بەردەوام و بێ وچان لە پرۆسەی بەدیجیتەڵكردن. هەروەها زۆر سوپاسی هاریكاری و هەماهەنگیی شانشینی یەكگرتوو و بەتایبەتی كونسوڵی گشتیی بەڕێز دەیڤد هانت و تیمەكەی دەكەم كە ڕۆڵێكی گرنگییان هەبوو لە بەرهەمهێنانی ئەم ستراتیجیە و هاوكاریكردنی نووسینگەكەم لەو بوارەدا.
ئێمە ئامانجمان لەم ستراتیجییە، ئەوەیە كە لە دوو تا سێ ساڵی داهاتوودا، واتا تا كۆتایی ساڵی 2025 ، حكومەتی هەرێمی كوردستان، ببێتە یەكێك لە سەرلیستی حكومەتەكانی ناوچەكە لە بواری بەدیجیتەڵكردن و حكومەتی ئەلیكترۆنی . بۆ ئەم مەبەستەش، نەخشەڕێگەیەكمان هەیە كە دەستمان بە جێبەجێكردنی كردووە. ئەم نەخشەڕێگەیە، هاوكاری و ئاسانكارییەكی زۆر پێشكەشی فەرمانگەی تەكنەلۆجیای زانیاری و نووسینگەی سەرۆك وەزیران دەكات بۆ ئەوەی دەستنیشانی ئەو كار و پڕۆژە خزمەتگوزارییانە بكەن كە گرنگن و كاری لە پێشینەن بۆ ئەنجامدانیان.
لە مانگی هەشتی ئەمساڵ ، سیستەمی دیجیتاڵی مۆڵەتی شوفێری لە هەرێمی كوردستان بۆ یەكەمین جار كارا كرا. پاشان لە مانگی نۆدا، داتا سەنتەری ناوەندیی حكومەتی هەرێمی كوردستانمان لە فەرمانگەی تەكنەلۆجیای زانیاری كردەوە كە هەنگاوێكی گرنگ بوو بە ئاراستەی بنیاتنانی ژێرخانێكی دیجیتاڵی لە هەرێمی كوردستان. هەروەها خزمەتێكی زۆری دامەزراوەكانی حكومەتی هەرێمی كوردستان دەكات بۆ ئەوەی زۆر باشتر و خێراتر و كاراتر ، خزمەتگوزارییەكان پێشكەشی هاووڵاتییان و دانیشتووانی هەرێمی كوردستان بكەن. هەنگاوێكی زۆر گرنگیشە بەرەو برەودان بە ڕوونی و شەفافیەت و نەهێشتنی بیرۆكراسی و ڕێگەگرتن لە گەندەڵی و بەهەردەردانی سامانی گشتی.
لە داهاتوویەكی نزیكدا و وەك بەشێك لە پرۆسەی بەدیجیتەڵكردنی خزمەتگوزارییە گشتییەكان، سیستەمێكی نوێی تۆماركردنی كۆمپانیاكان ڕادەكەیەنین، كە بە شێوەیەكی زۆر ئاسانتر و خێراتر و هەرزانتریش ، خاوەنكار و وەبەرهێنەران و خاوەن كۆمپانیاكان، دەتوانن كۆمپانیاكانیان تۆمار بكەن، ئەمەش كاریگەری باشی لە بواری گەشەپێدانی وەبەرهێنان لە هەرێمی كوردستان دەبێت.
پڕۆژەیەكی دیكەمان لە بواری دیجیتاڵی، كە بڕیارە لە مانگی داهاتوودا بخرێتەكار، سیتسەمی ( ڤیزای ئەلیكترۆنی E-visa) یە كە كارئاسانییەكی باش دەكات بۆ گەشتییاران و هاتنی خەڵكی بیانی بۆ هەرێمی كوردستان.
جارێكی دیكەش دەستخۆشی لە فەرمانگەی تەكنەلۆجیای زانیاری و بەڕێز هیوا ئەفەندی و تیمەكەی و هەموو ئەوانە دەكەم كە هاوكار و یارمەتیدەر بوون بۆ دروستكردنی ئەم ستراتیجییە .
لێرەدا پابەندبوونی خۆمان بە بەردەوامی كاركردن لە پرۆسەی بەئەلیكترۆنیكردنی حكومەت دووپات دەكەینەوە، كە یەكێكە لە كارە لە پێشینەكانی كابینەی نۆیەم.
بەڕێزان:
ئەم كارەی كە دەكرێ ماندووبوونێكی زۆری پێویست بووە و ئێمە زۆر جار كە باس دەكەین دەمانەوێ ژێرخانێكی بەهێزی ئابووری دروست بكەین، ئەمە ئەو ژێرخانەیە بۆ یارمەتیدانی هەموو كەرتەكانی حكومەت تاكو بتوانین بە شێوەیەكی باشتر ئەم ژێرخانە دروست بكەین و جێی متمانەی خەڵك بێت و خێراتریش بتوانێت بەرەو ئاییندەیەكی گەشتر و ڕووناكتر هەنگاو بنێت.
لەوانەیە زۆر خەڵك ئێستا بۆیان بەدیار نەكەوێت گرنگی ئەم پڕۆژەیە چییە . ڕاستە وەكو باڵاخانەیەك نییە لەبەرچاو بێت خەڵك بیبینێت ، بەڵام دڵنیام دوای ماوەیەكی كەم ، هەست بەوە دەكەن كە ئەم پڕۆژەیە چەند گرنگە لە پێشكەشكردنی خزمەتگوزارییەكان بۆ هەموو هاووڵاتییانی كوردستان. لە ئەنجامدا ، ئامانجی ئێمە ئەوەیە كە بتوانین بە شێوەیەكی باشتر وخێراتر خزمەتی هەموو هاووڵاتییان و دانیشتووانی هەرێمی كوردستان بكەین .
