ئیسماعیل ئیبراهیم
هەر كەس و لایەنی سیاسی كاتێ بانگشەی هەڵبژاردن دەكات، بە راوێژكردن لەگەڵ كەسانی شارەزا و بیرمەند و سیاسی، دەستە واژە، رستە، شێوای جل و بەرگ، چۆنییەتی هەڵسووكەوتن كردن و پلانی داهاتوو دیار دەكەن، تا بتوانن زۆرترین كاریگەری لەسەر دەنگدەران درووستبكەن.
بە پێی هەموو توێژینە و لێكدانەوەكانیش كەسی یەكەمی لایەنێكی سیاسی لە كاتی بانگەشە چی بكات و چی بڵێت ئەوە سیاسەتی داهاتووی حزبەكە دەبێت.
بانگەشەی یەكێتی نیشتمانی كوردستان كە لەلایەن سەرۆكی یەكێتی و لە سلێمانی دەستی پێ كرد، خاڵی بوو لە هەر جۆرە پاشخانێكی سیاسی و پلانی داهاتوو بۆ گەشە پێ دانی وڵات، رەفتار و چۆنییەتی قسە، هاوار و هەڕەشە كردن و رستەی نالۆژیكی، هاندانی جەماوەر بۆ توندوتیژی و رەتكردن و قبوڵ نەكردنی ئەوی دیكە، بە تایبەتی كە دەڵێت( ئەمانە هیچ نین) كڕۆك و دەرخەری دیدگەی ئەو حزبەیە بۆ داهاتوو، دیدگەیەك جگە لە یەكێتی هیچ حزبێكی دیكە جێگەی لە هەرێمی كوردستان نابێتەوە، وێرای قسەی دوور لە ڕاستی، ویستی خۆ پەڕاندنەوەیەكی ناعەقڵانی لە هەموو ئەو كار و هەڵوێستە دژە نیشتمانییەی كردوویەتی بكات، شاردنەوەی گەندەڵی و نادادی كە حزبەكەی دەستی باڵای تێدا هەبووە رەهەندی پشت گووتارەكانی بوو.
بێ ئەوەی بیر بكاتەوە خاك فرۆشی دەداتە پاڵ لایەنەكان و دەیەوێت بە خیاڵی خۆی 16ی ئۆكتۆبەر لە بیر هاووڵاتییان بباتەوە، فرۆشتنی هەزاران پارچە زەوی لە ناو شاری سلێمانی بە هێزەكانی حەشدی شەعبی ، وێرانكردنی شاخی گوێژە بە بیانووی پڕۆژە، ئەگەر خاك فرۆشی نەبێت ناوی چی لێ دەندرێت.
باسی مووچەیەك دەكات كە ئەندامانی مەكتەبی سیاسی حزبەكەی بە رێنمایی خۆی و براكەی داوایان لە بەغدا كردووە بیبڕن بۆ ئەوەی هاووڵاتییان لە دژی لایەنێكی سیاسی پێ هان بدەن.
بردنی پارەی مووچەخۆران لە بانكەكان و دەست بەسەر داهاتی خاڵە سنوورییەكان داگرتن، درووستكردنی باند و مافیا بۆ كاری قاچاخی و نەدانی باج و گومروك بە حكومەت، كۆ كردنەوەی پارەی داهاتی ناوخۆ بەناوی حكومەت و نەناردنی بۆ وەزارەتی دارایی و دەستبەسەر داگرتنی.
بوونی سەدان هەزار ناوی دووبارە، بن دیوار و خانەنشینی نایاسایی لە لیستی كارمەندانی پاریزگای سلێمانی، دەیان راگەیاندنكار بە پلەی نەقیب، رائید و موقەدەم خانەنشینكراون، كە نازانن دەمانچە بەكار بێنن.
باسی ناكۆكی لە نێو لایەنە سیاسییەكان دەكات، پێیوایە دەركردنی ئامۆزكانی، فریدۆن عەبدوڵقادر، مەلا بەختیار، سالار عەزیز لە بیر هاووڵاتییان چۆتەوە، پێیوایە خەڵك نازانێت ئێستا د. بەرهەم ساڵح لە كوێیە و بۆ چی لە هیچ بۆنەیەكی یەكێتی بەشدار نابێت، پێیوایە خەڵك لە بیری دەچێتەوە كە ئامۆزاكەی دوای بانگەشە گووتی ( ئەمڕۆ لە مەلعەبەكە…… ).
دەڵێت لە سلێمانی هەموو شوێنە خراپەكانمان داخست و روخاندمان، چ شوێنێكی خراپ لە شارەكانی دیكە هەیە و لە سلێمانی نییە؟، خۆزگە لە هیچ شوێنێكی كوردستان نەبوونایە.
ئەم دەربڕینانەی سەرۆكی یەكێتی لە ئاست شاری هەولێر تەنها چاو پێهەڵنەهاتنی بوو لە باڵا گرتنی هەولێر، ئەو شارەی سەركردەكانی پێشووتری یەكێتی بە گوندێكی گەورەیان دەشووبهاند، ئێستا بۆتە پایتەختی هەرێمی كوردستان و ناوەندی بڕیاری سیاسی و ئابووری و وەبەرهێنان، رۆژ لە دوای رۆژ گەشە دەكات و دەگاتە ئاستی شارە هەرە پێشكەوتووەكانی وڵاتانی ناوچەكە و هەندێك وڵاتی جیهانی، لە بەرامبەردا لە سایەی سیاسەتی حزبەكەی بافل سلێمانی بەرەو دواوە گەڕاوەتەوە و هەر پڕۆژەیەكیش سەرۆكی حكومەت بەردی بناغەی دانابێت بە فیتی ئەوانەوە بەردی بناغەی دەشكێنن و رێگری لە ئەنجامدانی دەكرێت، دواتریش دەنووزێنەوە كە سەرۆكی حكومەت خزمەتی سلێمانی ناكات، واتە دانیشتووان و هەموو شارەیان كردۆتە قوربانی ویستی خۆپەرستی چەند گرووپێك، ئەگەر لە هەولێر گەندەڵی هەبێت، پڕۆژەش هەیە، پارەخواردن هەبێت جادەی 150 و 120 مەتریش هەیە، رێگاكانی دەرەوەی هەولێر بەرەو بادینان و سۆران بە دوو سائید كراون، خۆزگە ئێوەش واتان كردبایە نەك رێگەی دەربەندیخان چەندین جار پارەی بۆ تەرخان بكرێت و پارەكەی بخورێت، نەك رێگەی 100 مەتری دوای چەندین ساڵ كۆتایی نێت لە كاتێكدا تێچووەكەی بۆ تەرخانكراوە و ئێوە ناهێڵن تەواو بكرێت.
دەچییە گەرمان، چەمچەماڵ، پێنچوێن، شارەزوور و راپەڕین بەزەیت بەو خەڵكەدا دێت، بەڵام سەردانێكی شەقڵاوە، سۆران، ئاكرێ و زاخۆ بكە دەبینی چ گەشانەوەیەكی جۆری روویداوە.
بە هەموو پێوەرەكان ئەو حزبانەی سەرۆكی یەكێتی بە (هیچ) ناوی بردن زۆر رووسپیترن لە حزبەكەی، بۆیە ئەگەر بڕیار بێت پێوەری (هیچ) بۆ لایەنێكی سیاسی دابنرێت ئەوە یەكێتی هیچترینیانە، لەبەر ئەوەی هەموو دەستەڵاتەكان لە سنووری پارێزگای سلێمانی و هەڵەبجە بەدەست ئەوانە كە رۆژ لە دوای رۆژ وێران دەبن و یەكێتی هۆكارە بۆ نەهێشتنی ئینتیما بۆ گەنجان و هاووڵاتییان، ئەوە حزبەكەی بافڵ بوو مامۆستا و كارمەندانی هاندەدا بۆ بایكۆت و لە ژێرەوەش سەفەقاتی سیاسی و حزبی لەگەڵ لایەنە عێراقییەكان هەبوو.
بافڵ باسی پەیوەندی نێودەوڵەتی و عێراقی دەكات كە گوایە پارتی دیموكراتی كوردستان لەم بوارەوە زۆر لاواز بووە.
ئەم رستەیە دەرخەری ئەوەیە جەنابیان نەخۆشی بیرچوونەوەی هەیە، دەنا لە بیری دەما چەند مانگێك پێش ئێستا لە ئەمریكا چۆن لە ئاستی باڵا پێشوازی لە سەرۆكی حكومەتی هەرێم مەسرور بارزانی كرا، لەوێشەوە رایگەیاند ساڵی 2024 ساڵی گۆڕانكارییە مەزنەكانە.
پێشوازی رابەرانی ئێران، توركیا، عێراق و تەواوی وڵاتانی عەرەبی و ئوروپی بیرچۆتەوە كە لە سەركردەكانی باڵای پارتی كرا و دەشكرێت.
گەورەترین كۆسپ بۆ رێكخستنەوەی هێزەكانی پێشمەرگە لە یەك سوپای كوردستانی بافڵ و یەكێتی بوونە، ئێستاش رێگە نادەن، كە بەپێی دواین زانیارییەكان ئەو كۆسپ دروستكردنە لەسەر خواست و گوشاری ئێران و گرووپەكانی حەشدی شەعبی بووە و تا ئێستاش بەردەوامە.
فرمێسكی تیمساحانە بۆ نیشتمان، لەو هات و هاورەی كە بافل تاڵەبانی لەكاتی دەست پێكردنی بانگەشە كردی و زوو زوو دەیگووت ئەم وڵاتە زۆر جوانە و بەهشتە، ئەگەر هەندە خۆش و جوانە و بەهشتە، خێرە جەنابت یەك شەو لە یەك بەرەی بەرگری كردن لەم نیشتمانە ئامادەیت نەبووە هەر لە شارە خۆشەكانی ئوروپا و كابارەكان كاتت بەسەر دەبرد و نەبوویە پشت و پەنای مام جەلالی رەحمەتی.
دەبوایە راوێژكارەكانت بیانزانیبایە كاتی ئەم قسە بێ بنەمایانە كۆتایی هاتووە، خەڵك داهاتووی دەوێت كە بە پَی قسەكانی جەنابت بێت هیچ داهاتوویەكی جوانت پێ نییە بۆ وڵات، تەنها شەڕ و ئاژاوە نەبێت، كە پێ دەچێت بەرژەوەندی حزبەكەت ئەو دۆخە بخوازێت.
جێگەی داخە مێژووی گەشی سلێمانی لە هەموو روویەكەوە، بكەوێتە ژێر هەیمەنەی ناشیرینی دونیا بینینێكی ئاوادا، تەنها رێگە چارەش ئەوەیە، لە 20-10-2024 ووشە ناشیرینەكەی خۆت لە ئاستت بەكار بێنن و تەنها نیو كاتژمێری كاتی خۆیان تەرخان بكەن و پێت بڵێن (لۆ مارێ).
ئەم نووسنەی من واتەی ئەوەیە نییە حزبەكانی دیكە بێ خەوش بن بە تایبەتی پارتی دیموكراتی كوردستان، بەڵام كاتێ سەیری قوورسایی بانگەشەی پارتی و سەرۆكی پارتیم كرد، كاتی پلانی ئەوانم بۆ داهاتووی حكومڕانی بیست، تێگەیشتم تاكە حزبە پشتی پێ ببەستی و هیوای لەسەر بنیاد بنێی.
باشیش تێگەیشتم كە قسەكانی بافڵ تاڵەبانی لە كاتی بانگەشە چەندە خزمەتی پارتی دیموكراتی كوردستان و ئایندەی نیشتمانی كرد، تەنها هاووڵاتییان ژیرانە بڕیار بدەن ئیتر كۆتایی بە مافیا گەرایی دێت.
زۆر سوپاس كە بەرچاوت روونكردنەوە بۆ داهاتوو دەنگ بە لیستەكەت نەدەن بۆ ئەوەی بەرەو گەشانەوەی زیاتر هەنگاو بنێین.
