زاری كرمانجی – سۆران:
بەڕێوەبەری نەوت و كانزاكانی ئیدارەی سۆران، رایگەیاد” لەچەند رۆژی داهاتوو دەست بە دابەشكردنی نەوتی سپی بۆ ماڵان دەكرێت”.
ئەمیر سەلیم بە زاری كرمانجی راگەیاند” نرخی هەر بەرمیلێك نەوت 102500 دینار دەبێت، لەبەر ئەوەی حكومەتی ناوەندی تا ئێستا ئەو نەوتەی نەناردووە كە بڕیار بوو بینێرێت ، بۆیە حكومەتی هەرێم بەخۆی ئەو نەوتەی دابینكردووە و ناچارە بەو بڕە پارەیە بداتە هاووڵاتییان”.
زیاتر گووتی ” هەر كاتێ نەوتی حكومەتی ناوەندی نێردرا بۆ كوردستان بێ گومان ئەو كات ئەو نەوتەش دابەش دەكرێت ، بەو نرخەی كە لە بەغداوە دێت و رەنگە تەنها كرێ گواستنەوەی بچێتە سەر، واتە ئەگەری دابەشكردنی دوو بەرمیل نەوت هەیە “.
مەغدید عەریف ئەحمەد، قائیمقامی قەزای نادەندی سۆران بە زاری كرمانجی گووت ” ئەو نەوتەی دابەش دەكرێت هیچ پەیوەندی بە بەغداوە نییە، لەبەر ئەوەی بەرەو سەرماش دەچین و رەنگە نەوتی حكومەتی ناوەندی درەنگ بگات، حكومەت هەرێمی كوردستان ئەو نەوتەی دابین كردووەو لە جیاتی ئەوەی هاووڵاتییان لە بازاڕی رەش بە 275 هەزار دینار بكرن، بە 102500 دینار حكومەت بۆیان دابین دەكات، هەر كاتێ نەوتی بەغداش گەیشت ئەوكات ئەویش دابەش دەكرێت بەو نرخەی كە بۆی دیاری دەكرێت”.
ئەمە لە كاتێكدایە كە وەزارەتی سامانە سروشتییەكانی حكومەتی هەرێمی كوردستان روونكردنەوەیەكی سەبارەت بە نرخی نەوتی سپی بڵاوكردەوە، هاوكات وادەی دەستپێكردنی دابەشكردنی دیاریكرد.
لە بەیاننامەیەكدا هاتووە ” حكومەتی هەرێم نەوتی سپی بە پاڵپشتی حكومەتی فیدڕاڵ بەسەر هاووڵاتیاندا دابەش دەكات بە نرخی 100 هەزار دینار بۆ هەر (200) لیترێك”.
ئاماژەی بەوەشكردووە” لەسەدا 65 ی ئەو بڕە پارەیە لەلایەن حكومەتەوە پاڵپشتی دەكرێت و هاوڵاتی لەسەدا 35ی بڕە پارەكە دەدات.
لە ڕاگەیەندراوەكەدا ئەوەش هاتووە” لە كاتی ناردنی پشكی نەوتی سپی لە لایەن حكومەتی فیدراڵەوە، بەو نرخە دەدرێتە هاووڵاتیان كە لەلایەن حكومەتی فیدراڵەوە دیاری دەكرێت.
جەختیشیكردەوە” دابەشكردنی نەوتی سپی لە 20ی تشرینی یەكەم دەستپێدەكات و قۆناغی یەكەم لە ناوچە شاخاوییەكان دەبێت”.
پێشتر وەزارەتی سامانە سروشتییەكان سەرەتای مانگی 10ی دیاریكردبوو بۆ دەستپێكردنی دابەشكردنی نەوتی سپی بەسەر هاوڵاتیاندا، كە بریتی دەبێت لە دابەشكردنی نەوت بەسەر ناوچە شاخاوییەكان لە قۆناغی یەكەمدا.
