موڕشید برادۆستی – زاری كرمانجی :
لە ماوەی ڕابردوو، حكوومەتی هەرێمی كوردستان بەسەرپەرشتی راستەوخۆی مەسرور بارزانی، هەوڵی ڕژدی دا بۆ زیادكردنی مووچەی خانەشنیانی كوردستان و هاوتاكردنی مووچەكانیان هاوشێوەی عێراق، لە مانگی رابردوو، مووچەی خانەنشینانی مەدەنی زیاد كراوە و لە هەوڵی هاوتاكردنی ئەوانەی سەربازیشن .
یەعقوب ئەحمەد بەڕێوەبەری خانەنشینی ئیدارەی سۆران، بە زاری كرمانجی ڕاگەیاند:” بەپێی یاسایی خانەنشینی عێراق ساڵی 2014 كە لە ساڵی 2019 هەمواركراوەتەوە، ئەو فەرمانبەرانەی لە خوار ساڵی 2014 خانەنشین بوونە و لە ژیاندا ماون، تێكرای مووچەكانیان بووەتە 500 هەزار و 100 هەزار دیناریش وەك هاندانێك بۆیان زیاد كراوە، واتە ساڵانی خزمەت و بڕوانامە و مووچەی بنەڕەتی نەبووەتە پێوەر و بەو گوێرەیە مووچە زیاد نەكراوە.
بەڕێوەبەری خانەنشینی سۆران، دووپاتی كردەوە، لە ساڵی 2014 بەسەرەوە بەپێی یاسایی بەغدا، ئەگەر فەرمانبەر خانەنشین بووبێت و لە ژیاندا مابێت، ئەوا ساڵانی خزمەت، بڕوانامە، مووچەی بنەڕەتی ئەژمار كراوە و بەو شێوەیە مووچەی بۆ زیاد كراوە، ئەمەش كاریگەری ڕاستەوخۆی لەسەر زیاد بوونی مووچەی خانەنشینی هەیە .
یەعقوب ئەحمەد، لەبارەی ئەو خانەنشینانەی كە لە ژیاندا نەماون، ڕوونكردنەوە دەدات و دەڵێت:” ئەو خانەنشینانەی لە ژیاندا نەماون، لە ساڵی 2014 بەسەرەوە بێت یان لەخوار ئەو ساڵە خانەنشین بووبێت، هیچ جیاوازیەكی نییە، بەپێی خزمەت و بڕوانامە و مووچەی بنەڕەتی مووچەیان زیاد نەكراوە .
دەشڵێت:” ئەگەر خانەنشین لە ژیان نەمابَت و سێ میراتگری هەبێت، مووچەكەی نابێت لە چوار سەد هەزار دینار كەمتربێت، ئەگەر دوو میراتگریشی هەبێت مووچەكەی دەبێتە 360 هەزار دینار، هەروەها یەك میراتگر دەبێتە 320 هەزار دینار، 100 هەزار دیناریشیان وەك هاندانێك بۆیان زیاد دەبێت .
