مەهدی محەممەد – زاری كرمانجی :
لەگەڵ نزیكبوونەوەی دووەمین ساڵیادی گیان بەختكردنی ژینا ئەمینی و هەڵگیرسانی شۆڕشی (ژن ژیان ئازادی) لە ڕۆژهەڵاتی كوردستان و ئێران، تا ئێستا 142 هاووڵاتی كورد كە لە نێویاندا 15 منداڵ هەن گیانیان لەدەستداوە.
ڕێكخراوی مافی مرۆڤی هەنگاو ڕاپۆرتێكی لەبارەی قوربانیانی شۆڕشەكەوە بڵاو كردەوە و لە ڕاپۆرتەكە هاتووە “لە ڕەوتی بزووتنەوەی “ژن ژیان ئازادی”، لانی كەم ١٤٢ هاووڵاتیی كورد گیانیانیان لەدەست داوە، 45 كەسیان خێزاندار و 2 یان دەزگیراندار و 95 كەسیان سەڵت بوونە و كە 16 یان منداڵن.”
بەپێی ڕاپۆرتەكەی هەنگاو 90 كەس لە لایەن هێزە ئەمنییەكانی كۆماری ئیسلامی ئێران بە چەكی جەنگی كوژراون و 14 یان دوای دەستگیركردنیان، لەژێر ئەشكەنجەدا گیانیان لەدەست داوە و دوو بەندكراویش لە سێدارە دراون، هەروەها كەسێك بە چەكی قەناسە و 4 دیكەش بە چەكی دۆشكە كوژراون.
زۆرترین قوربانی لە شاری سنە بووە كە 22 كەس بوونە و 17 یان لە بۆكان و 15 هاووڵاتی تریش لە مەهاباد بوونە و لە سەر ئاستی پارێزگاكانی ڕۆژهەڵاتی كوردستانیش زیاترین ژمارەی گیان بەختكردووانی كورد لە ڕەوتی بزووتنەوەی «ژن ژیان ئازادی» لە پارێزگای ورمێ بە ٥٧ حاڵەتەوە تۆمار كراون. لە پارێزگای سنە ٤٨ حاڵەت، كرماشان ٣٣ حاڵەت و پارێزگاكانی ئیلام و خوراسانی ڕەزەوی هەر یەك ٢ حاڵەت لە گیان بەختكردنی هاووڵاتییان تۆمار كراوە.
ژینا ئەمینی تەمەن 22 ساڵ، كچە كوردی سەقزی ڕۆژهەڵاتی كوردستان، لە 16ی ئەیلوولی 2022 لە ڕووداوێكی گوماناویدا لە ژێردەستی پۆلیسی ئاكار گیانی لەدەستدا. ئەگەرچی ئەو كات دەسەڵاتدارانی كۆماری ئیسلامی ئێران ڕایانگەیاند كە مردنی ژینا بەهۆی جەڵتەی دڵەوە بووە، بەڵام هەر زوو خێزانەكەی ژینا ڕەتیان كردەوە كچەكەیان بە هۆی جەڵتەی دڵەوە گیانی لە دەست دابێت و گوتیان ژینا لەژێر ئەشكەنجە و لێدانی پۆلیسی ئێران كوژراوە. دوابەدوای بڵاوبوونەوەی هەواڵی مەرگی ژینا، شەپۆلی ناڕەزایی دەربڕین لە زۆربەی ناوچەكانی ڕۆژهەڵاتی كوردستان و ئێراندا دەستیان پێ كرد، ناڕەزایی دەربڕینێك جیاواز لە هەموو ناڕەزایییەكانی چل ساڵی ڕابردووی ئێران، كە هاوشێوەی نەبووە.
