مەهدی محەممەد – زاری كرمانجی :
دوای 19 ڕۆژ لە دیار نەمانی نارین ى تەمەن 8 ساڵان، تەرمەكەی لە لێواری ڕووبارێكی نزیك كێڵگەیەكی گەنمەشامی دۆزرایەوە.
پارێزگاری ئامەد دوای دۆزینەوەی تەرمی ئارین، بە میدیاكانی توركیای ڕاگەیاند: “نارین دوای كوشتنی خراوەتە ناو توورەكەیەكەوە و بە بەرد و لق و پۆپی دار لە لێواری ڕووبارێك شاردراوەتەوە.”
نارین گوران تەمەن 8 ساڵان، دانیشتووی ئامەد ی باكووری كوردستان، ڕۆژی 21ی ئاب دوای گەڕانەوەی لە كۆرسی قورئان خوێندن بێسەروشوێن ببوو، برا گەورەكەی نارین كە تەمەنی 18 ساڵە بە هۆی نیشانەی گازگرتن لە سەر قۆڵی لە لایەن پۆلیسی ناوچەكە دەستگیركرا، دوای دۆزینەوەی تەرمی نارین، دایك و باوكی و دوو مامی و بەگشتی 24 كەس لەلایەن هێزە ئەمنییەكانی توركیا دەستگیركران و تا ئێستاش لێكۆڵینەوە لە كوشتنی كچە هەشت ساڵانەكەی ئامەد بەردەوامە و ژمارەی دەستگیركراوانی دۆسیەكەش بەردەوام بەرز دەبێتەوە.
ناهیت ئێرن، سەرۆكی سەندیكای پارێزەرانی دیاربەكر (ئامەد) زانیاری گرنگی سەبارەت بە ڕێكارەكانی پشكنینی جەستەی نارینی خستە ڕوو و ڕایگەیاند”پشكنینی جەستە بە وردی لەلایەن 14 پسپۆڕەوە بۆ ماوەی نزیكەی 8 كاتژمێر ئەنجامدراوە و بچووكترین نموونەكان بە وردی كۆ كراونەتەوە،” دەشڵێت “پرۆسەی كۆكردنەوەی بەڵگە ٢ كاتژمێر و نیو بۆ ٣ كاتژمێری خایاند.”
سەڵاحەدین دەمیرتاش، سیاسەتمەداری بەندكراوی كورد، لەسەر كوشتنی نارین لە تۆڕی كۆمەڵایەتی ئێكس پەیامێكی بڵاو كردەوە و ڕاگەیاند “خراپە كاری و بێڕەوشتیی سنووری نییە، ناسنامە، باوەڕ و نیشتمانی نییە، ئەگەرچی ڕۆیشتن بەو شێوەیە جیهان تاریكتر بكات، بەڵام خەباتمان لە پێناو ڕۆشناییدا بەردەوام دەبێت، هەموومان ببەخشە نارین.”
هاوكات یڵماز تونچ، وەزیری دادی توركیا لە ڕاگەیاندراوێكدا ئاشكرای كرد تاوەكوو درەنگانی شەوی یەكشەممە، 24 گومانلێكراو لەسەر كوشتنی نارین دەستگیركراون و دەشڵێت “ئەو كەسانەی كۆتاییان بە ژیانی نارین هێناوە لە سزاكەیان ڕزگاریان نابێت و ئەم دۆسیەیە ڕوون دەكەنەوە.”
