”هەندێك لایەن هەوڵیاندا كێشەی دەیان ساڵەو نەهامەتییەكانی خەڵك، بكەن بە كەرەستەی بانگەشەو ململانێی سیاسی”
زارى کرمانجى-سۆران:
ئەمڕۆ یەکشەممە ٨ى ئەیلوولى ٢٠٢٤، مەسرور بارزانی، سەرۆكی حكوومەتی هەرێمی كوردستان، بەردی بناغەی پڕۆژەی فریاگوزاریی خێرای گەیاندنی ئاوى بۆ شاری هەولێر دانا.
سەرۆکى حکوومەتى هەرێمى کوردستان، لە وتارێکدا ڕایگەیاند، لە نزیكەوە بەدواداچوونم بۆ كێشەی كەمئاوی لە چەند گەڕەكێكی شاری هەولێر كردووە، هەولێری پایتەخت چەندان ساڵە لە وەرزی هاویندا كێشەی كەمئاوی هەیە، چەندان ساڵ بوو بڕیار بوو كۆمپانیایەكی بیانی، پڕۆژەی ئیفراز چوار جێبەجێ بكات، بەڵام تا ئێستە ئەو كۆمپانیایە نەیتوانیوە بەپێی گرێبەست هەنگاوی كردەیی بۆ دەستپێكردنی پڕۆژەكە بنێت
لە بەشێکى دیکەى قسەکانیدا گوتی: ” لەم دوو ساڵەی دوای پەتای كۆرۆنا، وێڕای هەموو گرفت و كۆسپەكان و دۆخی سەختی ئابووری، داودەزگا پێوندیدارەكانم ڕاسپارد، بە زووترین كات ڕێگەچارەیەك بۆ ئەم دۆخە بدۆزنەوە، بۆیە بڕیارمدا ئەم بابەتە چیتر دوا نەكەوێت و داوام كرد ئەم پڕۆژەیەی ئێستە وەك پڕۆژەیەكی فریاگوزاریی خێرا، بۆ چارەسەری كێشەی كەمئاوی پایتەخت دەست پێ بكەن”.
سەرۆكوەزیرانی هەرێمی كوردستان ئاماژەى بەوەشکرد، لە نزیكەوە بەدواداچوونم بۆ كێشەی كەمئاوی لە چەند گەڕەكێكی شاری هەولێر كردوودوەو لایەنە پێوەندیدارەكانم ڕاسپاردووە كێشەكە چارەسەر بكەن، بەڵام بەداخەوە هەندێك لایەن هەوڵیاندا كێشەی دەیان ساڵەو نەهامەتییەكانی خەڵك، بكەن بە كەرەستەی بانگەشەو ململانێی سیاسی .
هەروەها گووتیشى: ”كێشەی كەمئاوی بە چەند تانكەرێكی ئاو چارەسەر ناكرێت، بەڵكو پێویستە پڕۆژەیەكی وەك ئەمە بخرێتەگەڕ كە ئاوی زێی گەورە بگەیەنێتە شاری هەولێر”.
پڕۆژەی فریاگوزاریی خێرای گەیاندنی ئاو بۆ شاری هەولێر، بە بڕی 479 ملیۆن دۆلار لەسەر بودجەی حكوومەتی هەرێمی كوردستان جێبەجێ دەكرێت، بە ڕێژەی 100٪ـی كێشەی كەمئاوی لە سنووری پارێزگای هەولێر چارەسەر دەكات، پڕۆژەكە لە ماوەی 550 ڕۆژ لەلایەن کۆمپانیاى هێمن گرووپ جێبەجێ دەكرێت.
