زاری كرمانجی – سۆران :
وەزیری دارایی هەرێم ڕاگەیاند هەنگاو بە هەنگاو هاوتاكردن و یەكخستن و ڕێكخستنەوەی مووچە هەموو چین و توێژەكان دەگرێتەوە و لەبارەی “هەژماری منەوە”ش دەڵێت تا كۆتایی ئەمساڵ بەشی زۆری مووچەخۆران خۆیان لە (هەژماری من) تۆمار دەكەن.
ئاواتی شێخ جەناب وەزیری دارایی هەرێمی كوردستان لە لێدوانێكی ڕۆژنامەوانی ڕاگەیاند “هەنگاو بە هەنگاو، هاوتاكردن و یەكخستن و ڕێكخستنەوەی مووچە هەموو چین و توێژەكان دەگرێتەوە، ئەوە جگە لە ناونیشانی وەزیفی كە پێویستی بە پێداچوونەوە هەیە و جیاوازیمان هەیە لەگەڵ عێراق، چەندین جیاوازی تریش هەن لەوانە لەسەر ئاستی پەرلەمان و دادگا و تەمەنی خانەنشینی و پاداشتی كۆتایی خزمەت، ئەوانە هەمووی پێویستی بە ڕێكخستنەوە هەیە.”
وەزیری دارایی هەرێم لەبارەی هەژماری منەوە دەڵێت “حەملەیەكی ناڕەوا دژی پرۆژەی (هەژماری من) كرا، دەبووایە وا نەبووایە.”
دەشڵێت “لە ئێستادا نزیكەی (٥٠٠ هەزار) فەرمانبەر خۆیان لە سیستەمی (هەژماری من) تۆمار كردووە و ئەم مانگە (١٢٠ هەزار) كەس لەڕێی هەژماری منەوە مووچەیان وەرگرت، لە هەولێر ٩٦%و لە دهۆك لە ٩٢%و لە سلێمانی لە ٣٧% خۆیان تۆمار كردووە و چاوەڕێ دەكرێت تا كۆتایی ئەمساڵ بەشی زۆری مووچەخۆران خۆیان لە (هەژماری من) تۆمار بكەن.”
وەزیری دارایی ئاشكراشی دەكات “لەڕێی ئەم سیستەمەوە مووچەخۆر دەتوانێت لە ١٥ ملیۆن و زیاتر سولفە و قەرز وەربگرێت،” گوتیشی “ئێستا عێراق بەرەو ئەوە دەڕوات سیستەمێكی هاوشێوەی هەرێم دروست بكات، لەو تەوگینەی لە عێراق و بانكی ڕەشید و ڕافیدەین هەیە خزمەتگوزارییەكە وەك هەرێم پێشكەوتوو نییە.”
