سەرپەرشتیاری ئیدارەی سۆران بەڵێنی كردنەوەی شوێنەكەی داوە
دیدار – رۆژان قیاس
لە دیمانەیەكی هەفتەنامەی زاری كرمانجیدا، مقەدەم بژار مستەفا، بەڕێوەبەری بەرەنگار بوونەوەی توندوتیژی دژی ئافرەتان و خێزانی سۆران، بۆ زاری كرمانجی باس لە گرنگی هەبوونی شوێنی تایبەت بە داڵدەدانی ئافرەتان لە سۆران دەكات.
لەدەستپێكی قسەكانیدا، بەڕێوەبەری بەرەنگار بوونەوەی توندوتژی دژی ئافرەتان و خێزانی سۆران، گووتی:” ئەو ئافرەتانەی كە كێشەی كۆمەڵایەتییان هەیە بەهۆی بابەتی ئەخڵاقی و ناپاكی هاوسەری و یا بڵاوبوونەوەی وێنە و ڤیدیۆكانییان لە تۆڕە كۆمەڵایەتییەكان، كێشەكانیان گەورە دەبن و دەبێتە مەترسی لەسەر ژیانی ئافرەتەكە، بۆیە پێویستە شەڵتەرێك و شوێنێك بۆ داڵدەدان و پاراستنییان هەبێت.
زیاتر گووتی:” زۆر گرنگە شوێنێكی گونجاو هەبێت بۆ ئەو ئافرەتانەی هەڕەشەیان لە لایەن كۆمەڵگەوە لەسەرە، یا ئەوانەی جێگەی حەوانەوەیان نییە یا بێ كەس و كارن، پێویستە شوێنی داڵدەدانی ئافرەتان لە هەر قەزا و پارێزگایەك هەبێت بۆ پاراستنی گیانی ئەو ئافرەتانەی كێشەی كۆمەڵایەتییان هەیە، بە داخەوە تا ئێستا لە سۆران دووای بە ئیدارەكردنیشی، هیچ شوێنێكی تایبەت بە ئافرەتانی نییە، ئەمەش بۆتە بەربەست و گرفت بۆ پاراستنی ئەو ئافرەتانەی پێویستیان بە شوێنە هەیە.
بەگووتەی بەڕێوەبەری بەرەنگار بوونەوەی توندوتیژی دژی ئافرەتان و خێزانی سۆران، چەندین ئافرەت لە سۆران هەن كە كێشە كۆمەڵایەتییان هەیە و بەهۆی نەبوونی شوێن لە سۆران گواستراونەتەوە بۆ شەڵتەرەكانی هەولێر لەوێ دەمێننەوە، دەڵێت:” زۆرێك لەو كێشانەی دێنە لامان لە سنوری بەڕێوەبەرایەتیەكەمان كاتێك گیانی ئافرەتێك لە مەترسیدا بێت، بە بڕیاری دادوەری لێكۆڵینەوە لە بەشی پۆلیسی گرتن و گواستنەوەی سۆران بە شێوەیەكی كاتی دەمێننەوە و دواتر دەگوازرێنەوە هەولێر”.
لە درێژەی قسەكانیدا روونیكردەوە” هۆكاری نەبوونی شوێنی داڵدەدانی ئافرەتان لە سۆران دەگەڕیتەوە بۆ نەبوونی بینایەكی تایبەت و سەربەخۆ بە هەموو پێداویستییەكانییەوە، هاوكات نەبوونی كارمەند و توێژەری دەروونی و كۆمەڵایەتی، پێویستە بەڕێوەبەرایەتی چاودێری و گەشەپێدانی كۆمەڵایەتی سۆران هۆكاری دروست نەكردنی بخاتەڕوو، چونكە شوێنی داڵدەدانی ئافرەتانی هەڕەشەلێكراو سەربە وەزارەتی كاروباری كۆمەڵایەتییە، تەنها لە رووی پاراستنی ئەمنییەوە سەر بە وەزارەتی ناوخۆیە”.
لە كۆتایی قسەكانیدا، مقەدەم بژار مستەفا، گووتیشی” لەو كاتەوەی وەك بەڕێوەبەری بەڕێوەبەرایەتی بەرنگار بوونەوەی توندوتیژی دژی ئافرەتان و خێزانی سۆران دەست بەكار بووم، چەندین جار هەوڵمداوە لەگەڵ لایەنی پەیوەندیدار بۆ دەستەبەر كردنی شەڵتەر، بە نوسراوی فەرمی ئیدارەی سەربەخۆی سۆران و بەڕێوەبەرایەتی گشتی بەرنگار بوونەوەی توندوتیژی دژی ئافرەتان و بەڕێوەبەرایەتی كارو گەشەپێدانی كۆمەڵایەتی سۆرانم ئاگادار كردونەتەوە، لە پێویستی بوونی شوێنی داڵدەدانی ئافرەتان، هەروەها نووسراوی فەرمیمان كردوە بۆ وەزارەتی كارو باری كۆمەڵایەتی هەرێم بۆدروست كردنی شەڵتەر، لە لایەكی دیكەشەوە هەڵگورد شێخ نەجیب سەرپەرشتیاری ئیدارەی سۆران، بەڵێنی داوە و هەوڵی جدیشی داوە بۆ كردنەوەی شەڵتەر لە سۆران، ئێمە چاوەڕێین و ئومێد دەكەین بخرێتە بەرنامەی كار و دروست بكرێت”.
