زاری كرمانجی – سۆران :
دوای ئەوەی ئەنتۆنی بلینكن ڕەزامەندی دەربڕی لەسەر فرۆشتنی فڕۆكەی جەنگی و چەكی دیكەی سەربازی بە ئیسرائیل بە بەهای زیاتر لە ٢٠ ملیار دۆلار، وەزیری بەرگری ئیسرائیل ئەو كارەی ئەمریكای بە “پەیامێكی ڕوونی پابەندبوون بە ئاسایشی ئیسرائیل” وەسف كرد.
پنتاگۆن لە بەیاننامەیەكدا ڕایگەیاند، وەزیری دەرەوەی ئەمریكا بلینكن ڕەزامەندی دەربڕیوە لەسەر ئەگەری فرۆشتنی 50 فڕۆكەی جەنگی ئێف 15 و كەرەستەی سەربازی دیكە كە بەهای نزیكەی 19 ملیار دۆلارە.
لە بەیاننامەكەی وەزارەتی بەرگری ئەمریكادا هاتووە، جگە لە فڕۆكەی جەنگی، ئەگەری فرۆشتنی 33 هەزار گوللەی تانك و 50 هەزار گوللە هاوەن بە بەهای نزیكەی 774 ملیۆن دۆلار و ئۆتۆمبێلی سوپاش بە بەهای 583 ملیۆن دۆلار ڕێككەوتن كراوە.
بەگوێرەی ڕۆژنامەی تایمزی ئیسرائیل، گوللەی تانكەكان دەستبەجێ بەردەست دەبن بۆ گەیاندن، بەڵام فڕۆكە جەنگییەكانی ئێف 15 كە كۆمپانیای بۆینگ دروستی دەكات، لە ساڵی 2029ەوە ڕادەستدەكرێت.
