رێبوار حەمەلاو شوانی
کاتێک باسی خاکی کوردستان و خەبات و تێکۆشان لە پێناو ئازادی و رزگاریخوازی دەکەین ، دوژمنان ونەیاران پارتی و بارزانی بە گەورەترین ئاستەنگ وکۆسپ لە بەردەم جێبەجێکردنی مەرام و پیلانگێرییەکانیان دەبینن ، بۆیە بەدرێژایی مێژووی خەبات گەلەکەمان بە پێشەنگایەتی پارتی هەمیشە نەیاران هەوڵیانداوە لێکترازان و دووبەرەکی و ناکۆکیی دروست بکرێت ئیتر بە هەر شێواز و پیلانێک بێت ، لە رابردووی شۆڕشی مەزنی ئەیلوول کە گەورەترین دەستکەوتی مێژووی بۆ نەتەوەی کورد بەدەستهێنا و لە ئامانجەرەواکانی نزیک بووە دوژمنان بەڕێگەی بەکارهێنانی گروپ وتاقمێک هەوڵیاندا لێکترازان و ئاشووب لە نێو پارتی دروست بکرێت تا کاروانی کوردایەتی کە بارزانی ئاڵاهەڵگری بوو بەلارێدا ببریت ، بەهەمان شێوە گەلەکۆمەکی و پیلانگێری 1975 و بەتایبەت لە سەر شۆڕش و کەرکووکی دڵی کوردستان کە پارتی و بارزانی ئامادە نەبوو سازشی لە نکۆڵیکردن لە کوردستانیبوونی بکات.
ئینجا لە دوای راپەڕین وتا دەگاتە پیلانگێری 2014 و هێنانی داعش بۆ کوردستان بەتایبەت هەوڵی داگیرکردنی کەرکووک و رێگریکردن پێشمەرگەی کوردستان بە رابەرایەتی بارزانی و پارێزگاریکردن لە سنوورێکی زیاتر لە 1100 کیلۆمەتر بە کەرکووکی دڵی کوردستانەوە ، دواتر پیلانگێری 16ی ئۆکتۆبەری 2017 کە درێژەپێدەری هەموو پیلانگێرییەکانی رابردوو لە پێناو دەستبەسەرداگرتنی کەرکووک بە پاساوی ئەنجامدانی رێفراندۆمی سەربەخۆیی ، لەگەڵ ئەوەشدا پارتی رێگەی نەدا شوناسی کوردستانبیوونی ئەو شاڕە بگۆڕێت ، سەرەرای ئەو خیانەتە گەورەیەی کە سەرکردایەتی یەکێتی بە سەر نیوەی کوردستانی هێنا و واژۆشی بۆ ئەو مەبەستە کۆکردبۆە کە گەورەترین شەرمەزاری مێژووییە ، بەڵام پارتی لە هەوڵە سیاسی ودیپلۆماسییەکانی لە سەر ئاستی نێوخۆی و نێودەوڵەتیی بۆ چارەسەرکردنی کێشەی کەرکووک و ڕێگریکردن لە پرۆسەی بە عەرەبکردن و زیانگەیاندن بەو شارە کوردستانییە پێکەوەژیانە بەردەوام بوو .
ئەوەی جێگەی هەڵوەستەکردنە ئەوەیە کە سەرکردایەتی یەکێتی و بە پاڵپشتی هەندێک هێزی لە یاسا دەرچوون و دژە کەرکووک و کوردستانی جارێکی تر لە هەڵبژاردنێکی دیزاینکراو و ساختەکاریدا ، نەک هەر خیانەتێکی تریان بەرامبەر کەرکووک ئەنجامدا بەڵکو هەموو ئەو هەوڵانەی پارتی دیموکراتی کوردستان لە پێناو جێبەجێکردنی ماددەی 140 دەستووری هەمیشەیی یان تەنها بۆ بەدەسهێنانی پۆستێکی کاتی پارێزگا لەدەستدا ، لەگەڵ ئەوەشدا دەیان پۆستی گرنگی ئەو شارەیان رادەستی شۆڤێنییەکان و دژە کوردەکان کرد ، ئەوەش لە پێناو ئەوەی کە ئاستەنگ و کۆسپکی گەورە لە بەر گەڕانەوەی ئەو شارە بۆ باوەشکی کوردستانی دایک دروست بکرێت ، لێرە دا پرسیار ئەوەیە یەکێتی چ سەرکەوتنێکی بەدەستهێناوە کە ناتوانێت ئاڵای کوردستان بەرز بکاتەوە ، ناتوانێت هێزی پێشمەرگە و ئاسایشی کوردستان بگەڕێتەوە کەرکووک ، ناتوانێت ڕێگری لە بە عەرەبکردن و زیانگەیاندن بە کەرکووک بگرێت ، شاگەشەبوونی یەکێتیی نەک هەر سەرکەوتن نییە بۆ کوردستان بەڵکو سەرکەوتنێکی تر بۆ دوژمنان و نەیارانی کەرکووک ، چونکە ئیتر تەنها یەکێتی خاوەن پۆستێکی کارتۆنی پارێزگایە و گشت دەسەڵات و بریارەکان بەدەست عەرەبە شۆڤێنییەکانە ئەوانەی کە چەندین ساڵە و بەتایبەت لەماوەی 7 ساڵ داگیرکردن و خیانەتی 16ی ئۆکتۆبەری و رادەستکردنی لەلایەن یەکێتی بۆ نەیارانی کوردستان هیچ کارێکی تێکدەرانە و خراپ نەماوە دژی کورد و زەوی و موڵک و ماڵیان ئەنجامی نەدەن و لەگەڵ بەردەوامی پرۆسەی گۆڕینی دیموگرافیایی کەرکووک و هێنانی عەرەبی هاوردە .
لە ماوەی 20 ساڵی رابردوودا ، هیچ کات بە قەد ئێستا عەرەب و غەیرە کوردەکان پۆست و دەستکەوتیان لە کەرکووک بەدەست نەهێناوە و هێندەی ئێستاش کەرکووک تووشی نەهامەتی و لاوازی نەبووەتەوە ، کارەساتێک کە بەهۆی خۆپەرستی و سەرکردایەتیی یەکێتیی بە سەر کەرکووک و کەرکووکییەکان هاتووە ، لە کاتێکدا کاتێک سەرۆک بارزانی لەگەڵ گشت هێزولایەنەکانی نێو کەرکووک بە عەرەب وتورکمانەوە کۆبووە ، بەهیچ شێوەیەک رازی نەبوو کە ماوەی یەکەمی پارێزگار بۆ هیچ لایەنێک بێت جگە لە کورد ،سەرجەم پۆستەکانی تریش وەک مافی هەڵبژاردن لە دەست کورد دا دەمایەوە ، ئەوەش ئاماژەیە بەو راستییەیە کە چەندە پارتی و سەرۆک بارزانی لە پەرۆشی کەرکووک وکەرکووکییەکاندایە ، هەرگیزیش سازی لە سەر مافەرەکانی بەتایبەت کەرکووک نەکردووە لەگەڵ ڕێزگرتن لە مافی هەموو پێکهاتەکانی دیکە وەک تورکمان و عەرەب و مەسیحییەکان و هتد ..
سەرکردایەتیی یەکێتی بەو خیانەتە مێژووییە بەرامبەر پۆستێک دژ بە کەرکووک وکەرکووکییەکان جارێکی تر سەلماندی کە هەرگیز لە پەرۆشی کەرکووک و بەرژوەندییە باڵاکانی گەل و نیشتیمانەکەی نییە و گرنگ نییە کورد لاواز بێت ، بەڵام ئەوان بگەن بە بەرژوەندی تەسکی حزبی و کەسی ، بە پێچەوانەوە پارتی و بارزانی لە دوێنی و ئەمڕۆ و سبەیش سازشی لە سەر بستێک خاکی کوردستان وکەرکووک نەکردووە و هەرگیز ڕێگەنادات لەکوردستان جیابکرێتەوە ، لەگەڵ ئەوەی دوژمنان و نەیاران وبەکرێگیراوان هەمیشە خەونی نەزۆک بە سڕینەوەی شوناسی کوردستانبیبوونی کەرکووک دەبینن ، بەڵام دڵنییا بن کە ئەو رەوشە کاتییە و کەرکووک و هەر بستێکی خاکی کوردستان بە داگیرکراوە نامێنێتەوە دەگەرێتەوە باوەشی کوردستان و چونکە هەرگیز کوردستان بێ کەرکووکی دڵ ناژێت .
