زاری كرمانجی – سۆران :
ڕۆژنامەنووسێكی كورد، ئاشكرای دەكات كە دەزگای زانیاری چەند كارمەندێكی كەناڵ 8 یان دەستگیركردووە كە بە ڕەگەز پاكستانین و كاری سیخوڕییان بۆ وڵاتەكەیان كردووە .
بەپێی ڕاپۆرتێكی ئەو ڕۆژنامەنووسە كوردە كە ناوەكەی لای ئێمە پارێزراوە، ماوەی چەند مانگێك بوو، سێ كارمەندی كەناڵ 8 كە بە ڕەگەز پاكستانین، بەردەوام سەردانی سنووری هەورامان، قەڵادزێ، شارباژێڕ، مەرزەكانی شۆشمێ، سەیران بەن، قندۆڵ و قاسمە ڕەش و چەند شوێنی دیكەیان كردووە، ئەمەش وای كردووە كە دەزگای زانیاری گومانیان لێ بكات و دوای چاودێریكردنیان، دەردەكەوێت لە كەناڵ 8 كارمەندن لە بەشی ئای تی و تەكنیك و لەپاڵیشدا تۆڕی هەواڵگری موخابەراتیان بۆ پاكستان دروست كردووە.
ئەو ڕۆژنامەنووسە كوردە ئاشكراشی دەكات كە چەند كارمەندێكی كەناڵەكەش كاریان لەگەڵ كردوون، بەڕێوەبەری بەش، هەواڵساز، بەشەكانی دیكە و تا دەگاتە كار گوزارەكان بە پارەیەكی مانگانە بوونەتە كارمەندی موخابەراتی و زانیاریان لەبارەی سنووری سلێمانی و ناوچەكە، هێزەكانی كۆمەڵە، دیموكرات، هێزەكانی پەك.ەكە و نزیك لەپەك.ەكە بۆ پاكستانیەكان كۆ كردووەتەوە.
دەشڵێت “دوو ڕۆژنامەوانی ڕۆژئاوای كوردستان كە پێشتر لە ڕۆژئاوا بوون و لە میدیای پەك*ەكە كاریان دەكرد و ئێستا بۆ كەناڵ ۸ كار دەكەن، ئەوانیش تێوەگلاون و زانیاریان لەبارەی هێزەكانی ڕۆژئاوای كوردستان داوە بە پاكستانیەكان.”
لە ڕاپۆرتەكەدا ئەوەش هاتووە “لە شەوێكی كۆتایی مانگی ڕابردوو، هێزێكی دەزگای زانیاری هەڵدەكوتنە سەر ماڵی سێ پاكستانیەكە لە گاردن سیتی و دەردەكەوێت هەریەكە و سێ مۆبایلیان پێیە و ژووری تایبەت و لاپتۆپی دیكە و كۆمەڵێك كامێرای جیاجیا و دوای چێككردنی دەبینن دیمەنی سەدان شوێنی جیاجیای سنووری سلێمانی تێدایە، بۆیە دەزگای زانیاری بۆی دەردەكەوێت كە ئەو تیمە سیخوڕییە سەر بە دەزگای هەواڵگری پاكستانن و كار لەگەڵ دەزگایەكی دیار و بەناوبانگی وڵاتێكی دراوسێ دەكەن و زانیاریان بۆ كۆ دەكەنەوە. هاوكات لە مۆبایلەكانی ئەو سێ پاكستانیە ئەو كەسانەش ئاشكرا دەبن كە لەناو كەناڵ 8 كاریان لەگەڵ دەكەن و دواتر دەردەكەوێت نزیكەی بیست پاكستانی هێنراونەتە سلێمانی و خەریكی كاری موخابەراتین.”
ئەو سێ پاكستانیە بە سوود وەرگرتن لە باجی كەناڵ 8 و ئیقامەكەیان توانیویانە بگەنە زۆربەی ناوچەكانی سنووری نێوان هەرێم و ئێران و تەنانەت ناوچەكانی دیكەی عێراق چەند بنكە و بارەگایەكی سەربازی پێشمەرگە و یەكێتی، هاوكات تیمە پاكستانیەكە چەند جارێك چوونەتە ناوچەكانی بناری قەندیل، قەڵادزێ و پشدەر، ڤیدیۆ و وێنە و زانیاریان لەسەر ناوچەكە و جموجۆڵەكانی هێزەكانی ئەوێ كۆ كردووەتەوە .
بە پێی قسەی ئەو ڕۆژنامەنووسە كوردە بێت، ئێستا بەرپرسی ئەو پاكستانیانە لەلای دەزگای زانیارییە و لێكۆڵینەوەی لەگەڵ دەكرێت و دووی دیكەش براون و كارمەندەكانیش ئەوانەی كە لینكیان هەبووە لەگەڵیان ۱۳ كەس بوون و لە كەناڵەكە دەركراون .
ئاشكراشی دەكات كە دەزگای زانیاری لێكۆڵینەوەی نهێنی لەگەڵ ۷ كارمەندی كەناڵ 8 كە بەڕێوەبەری بەش و كارمەندن و دوانیان كوردی ڕۆژئاوان دەستپێكردووە و بەڵام لەسەر داوای بەڕێوەبەری كەناڵەكە، بۆ ئەوەی كەناڵەكە پەخشی نەوەستێت تا بەدیلیان بۆ دەدۆزنەوە ڕێگەیان داون ڕۆژانە كار بكەن لەژێر چاودێری ئەوان و ناتوانن لە سلێمانی دەربچن.
لە لێكۆڵینەوەكەدا دەركەوتووە ئەو پاكستانیانە، لەلایەن كەسێكی دیكەی پاكستانیەوە هێنراون بۆ سلێمانی كە عەرەبی و كوردییەكی باش دەزانێت و هاوكات پێشینەی هەیە لە هەرێمی كوردستان .
