مەهدی محەممەد – زاری كرمانجی :
ئومێد كوردستانی، سكاڵای لەسەر ئیلۆن ماسك تۆمار كرد و داوای 20 ملیۆن دۆلار قەرەبووی لێ دەكات .
كوردستانی، سەرۆكی ئەنجوومەنی بەڕێوەبەرایەتی پێشووی تۆڕی كۆمەڵایەتی تویتەر، سكاڵای لەسەر ئیلۆن ماسك بەڕێوەبەری جێبەجێكاری كۆمپانیای ئێكس (تویتەر)ی پێشوو تۆمار كرد، بەوەی ناوبراو ڕەتی كردووەتەوە 20 ملیۆن دۆلار وەك خاوەنی پشك بداتە ئەو .
بە پێی ڕاپۆرتێكی (ناشناڵ تەكنۆلۆژی نیووز –National Technology News )، كوردستانی ؛ لە نێوان ساڵانی ٢٠١٥ بۆ ٢٠٢٠ وەك بەڕێوەبەری جێبەجێكاری كۆمپانیای تویتەر كاری كردووە. پاشان بۆ ماوەی دوو ساڵی دیكە لە دەستەی كارگێڕی كۆمپانیاكەدا مایەوە تاوەكوو ماسك بە بڕی ٤٤ ملیار دۆلار كۆمپانیا زەبەلاحەكەی سۆشیاڵ میدیای كڕی.
لە ڕاپۆرتەكەی (ناشناڵ تەكنۆلۆژی نیووز) باس لەوە كراوە بڕیار بووە لە ماوەی چەند ڕۆژێك دوای ئەوەی ماسك ببێتە خاوەنی تویتەر ئەو پارەیە بە كوردستانی بدرێت، بەڵام سەرۆكی ئێكس بە بیانووی جیاواز خۆی دزیوەتەوە لە پێدانی پارەكە.
كوردستانی لە داواكارییەكەی دەڵێ “پۆستێكی قازانجاوی لە گووگڵ بەجێهێشتووە و ٥٠ هەزار دۆلاری پێدراوە كاتێك لەلایەن تویتەرەوە دامەزرا – كە زیاتر لە ٥٠ هەزار دۆلارە بۆ كارگێڕێكی تەكنۆلۆژیا لە ئەمریكا یەكێكە لە گەورەترین پلاتفۆرمەكانی سۆشیاڵ میدیا لەوێ بڕە پارەیەكی تا ڕادەیەك كەمە – و زۆربەی مووچەكەی لە شێوەی پشكدایە.”
ئەوەش هاتووە “كۆمپانیای ئێكس هەوڵ دەدات حەوت ساڵ خزمەتی كوردستانی لە تویتەر بقۆزێتەوە بەبێ ئەوەی پارەی پێ بدات، سەرەڕای ئەوەی زمانی ڕاشكاوی گرێبەستەكەی ئێكس داوا دەكات ئەو كارە بكات.”
كوردستانی، سەرۆكی ئەنجوومەنی پێشووی تویتەر خاوەنی ٨٠٠ هەزار پشكە و ٣ ملیۆن دۆلاری دیكەی پاداشتە جگە لەو ٢٠ ملیۆن دۆلارەی كە بانگەشەی ئەوە دەكات ماسك و كۆمپانیای ئێكس قەرزدارە.
ناشناڵ تەكنۆلۆژی نیووز ئاشكراشی دەكات، كوردستانی تاكە كارگێڕی پێشووی تویتەر نییە كە سكاڵای لەسەر ماسك تۆمار كردبێت. هەروەها چوار بەڕێوەبەری پێشووی پێشووی كۆمپانیاكە، لەنێویاندا بەڕێوەبەری جێبەجێكاری پێشووی كۆمپانیاكە و بەڕێوەبەری پێشووی كۆمپانیاكە، سكاڵایان لەسەر ماسك تۆمار كردووە بەهۆی یارمەتییە نەدراوەكانی. هەروەها هەزاران كارمەندی پێشوو بەشدارییان لە داواكارییە چینایەتییەكان كردووە كە گوایە بە هەڵە كارەكانیان كۆتایی پێ هێنراوە یان یارمەتییەكانی جیابوونەوەیان نەداوە.
ماسك لە بەرگریكردن لە خۆی لە بەرامبەر ئەو داوایانە دەڵێت “ئەو كارمەند و كارگێڕانەی كە لە كارەكانیان دوورخستووەتەوە، كەمتەرخەمییەكی گەورە و هەڵسوكەوتی نادروستی بە ئەنقەستیان ئەنجام داوە.”
دوای گواستنەوەی خاوەندارێتی تویتەر بۆ ماسك، كۆمپانیاكە گۆڕانكاری ڕیشەیی لە ستافدا بە خۆییەوە بینی، زۆرێك لە كارگێڕان و كارمەندەكانی دەركران، گۆڕانكاری لە كاركردندا كرا و زۆرێك لە ڕێكلامكەرانیش بەكۆمەڵ پلاتفۆرمەكەیان بەجێ هێشت.
ئومێد كوردستانی، دوای جیابوونەوەی لە گووگڵ، كە ماوەی چەندان ساڵ بوو ناوی ئومێد كوردستانی بەو كۆمپانیا زەبەلاحەوە بەسترابوو، كۆمپانیا هەرە گەورەكانی بواری تەكنۆلۆژیا هەوڵی بەدەست گەیشتنی تواناكانی كوردستانییان دا، ناوبراو دواجار بڕیاری دا بچێتە تۆڕی كۆمەڵایەتی تویتەر و لەوێ پۆستی سەرۆكی ئەنجوومەنی بەڕێوەبەرایەتی تویتەری پێ درا.
هەفتەی ڕابردوو لە دادگای باڵای ویلایەتی كالیفۆرنیا لە سانفرانسیسكۆ سكاڵای تۆمار كرد و چاوەڕێ دانیشتنەكانی دادگا دەكات بۆ وەرگرتنەوەی مافی خۆی .
ئومێد كوردستانی لە دایك و باوكێكی كوردی پیرانشاری ڕۆژهەڵاتی كوردستان، لە ساڵی 1963 لە شاری تاران لەدایكبووە.
لە تەمەنی 14 ساڵی لەگەڵ خێزانەكەی ڕوویان كردووەتە ئەمەریكا و لە ویلایەتی كالیفۆرنیا نیشتەجێ بووە .
ناوبراو بڕوانامەی ئەندازیاری كارەبای لە ساڵی 1984 لە زانكۆی سن خوزە وەرگرتووە و ساڵی 1991 بڕوانامەی ئیم بی ئەی لە زانكۆی سیتیین فۆرد وەرگرتووە.
كوردستانی، ئەزموونی زیاتر لە 15 ساڵی لە بواری تەكنۆلۆژیا باڵای لە كۆمپانیا پێشڕەوكانی بواری ئینتەرنێت و لەوانە (نیت سكایپی) هەیە، وەك جێگری سەرۆكی بەشی گەشەی پیشە و فرۆشی لەم كۆمپانیایەدا توانی لە ماوەی 18 مانگدا 88 ملیۆن دۆلار داهات بۆ كۆمپانیاكە دەستەبەر كرد، بۆ ساڵی داهاتوو داهاتەكەی گەیاندە 200 ملیۆن دۆلار .
ئومێد لە ساڵی 2006 لەلایەن گۆڤاری (تایم) ەوە وەك یەكێك لە 100 كەسایەتی گرنگی جیهان هەڵبژێررا .
بە پێی گۆڤاری (سان جوز) ئومێد بە یەكێك لە دەوڵەمەندترین كەسەكانی كالیفۆرنیای باكوور ناو بردووە كە سامانەكەی زیاتر لە 2 ملیار دۆلار بووە، هاوكات گۆڤاری (فۆربس) كوردستانی بە دووەمین گەورە دەوڵەمەندی ئێران لە جیهان هەژماركردووە.
