ئەمڕۆ سێشەممە 2024/8/13، فەوزی هەریری، سەرۆكی دیوانی سەرۆكایەتیی هەرێمی كوردستان، پێشوازی لە كڵاوس شترایشه‌ر كونسوڵی گشتیی ئه‌ڵمانیا له هه‌رێمی كوردستان کرد.
لە كۆبوونەوەیەكدا، دۆخی ناوخۆی هەرێمی کوردستان و هەنگاوەکان بەرەو هەڵبژاردنی پەرلەمانی کوردستان باس کران. هەردوولا لەسەر گرنگیی بەڕێوەچوونی هەڵبژاردنێکی بێگەرد لە کەشێکی ئارام و دۆخێکی سەقامگیردا، هاوڕا بوون.
دۆخی گشتی و ئاڵۆزییە هەنووکەییەکانی ناوچەکە، تەوەرێکی دیکەی دیدارەکە بوو، تیایدا جەخت لە هێورکردنەوەی گرژییەکان کرایەوە، هه‌روه‌ها بیروڕا سەبارەت بە گۆڕانی ئاووهەوا، پەیوەندییە دووقۆڵییەکان و کارکردن بۆ پەرەپێدانیان، ئاڵوگۆڕ کرا.
