ڕووسیا سەركەوتوو نەبوو لە هێوركردنەوەی بارودۆخی ڕۆژهەڵاتی فورات

هێزەكانی سووریای دیموكرات پێشڕەوی دەكات و چەكدارانی نزیك لە ئێران و هۆزە عەرەبەكانی لایەنگری حكومەتی دیمەشق پاشەكشە دەكەن

مەهدی محەممەد – زاری كرمانجی :

گرژییەكان و شەڕ و پێكدادانی نێوان هێزەكانی سووریای دیموكرات و هێزە چەكدارەكانی نزیك لە ئێران و هۆزە عەرەبەكانی لایەنگری حكومەتی دیمەشق، لە گوندەكانی (دێرەزوور) بەردەوامی هەیە و ڕووسیاش شكستی خوارد لە هێوركردنەوەی بارودۆخی ناوچەكە .
“هێزەكانی سووریای دیموكرات (هەسەدە)”، لە ڕاگەیاندراوێكدا هۆزە عەرەبەكانی ناوچەكە تۆمەتبار دەكەن بە وەرگرتنی پشتیوانی لە هێزەكانی حكومەتی سووریا و لایەنە دڵسۆزەكانی ئێران، بۆ تێكدانی ڕەوشی ئەمنی باكووری ڕۆژهەڵاتی سووریا، دوای ڕاگەیاندراوەكەی هەسەدە، هۆزە عەرەبەكان هێرشیان كردە سەر چەند خاڵێكی پشكنینی هەسەدە و دواتر بە چڕی بۆردوومانی چەند ناوچەیەكی دێرەزووریان كرد و 14 هاووڵاتیی كە ژن و منداڵن بوونە قوربانی، دوای ئەوەش بە درۆن و مووشەك هێرش كرایە سەر بنكەی سەربازیی هێزەكانی ئەمەریكا لە ڕومایلان لە باكووری حەسەكە.
دوای ئەوە هێزەكانی سووریای دیموكرات هێرشیان كردە سەر چەند گوندێكی دێرەزوور و دەستیان بەسەرداگرت بە تایبەت گوندی موجیبرایان لە باكووری حەسەكە كە لەژێر كۆنترۆڵی هێزەكانی حكومەتی سووریا دابوو، هاوكات هێزەكانی هەسەدە دەستیان بەسەر خاڵە ئەمنییەكانی حكومەتی سووریا لە حەسەكە و قامشلۆ داگرت، بە بیانووی ڕاگرتنی پشتیوانییەكانیانی حكومەتی سووریا بۆ هۆزەكان.
خێرا پێشڕەوی كردنی هێزەكانی سووریای دیموكرات و پەرتەوازەبوونی سەربازانی ئەسەد، ڕووسیای تەنگە تاو كرد و بۆیە بەزوویی ژەنەراڵ سێردیۆكۆڤی نارد بۆ فڕۆكەخانەی قامشلۆ بۆ نێوانگیری لە نێوان هێزەكانی سووریای دیموكرات و سوپای سووریا بكات تا كۆتایی بە گرژییەكان بهێنرێت و پەرەسەندنی ململانێكان دوای ئەو هێرشەی كە سوپای خێڵەكی دەستیپێكرد لەسەر خاڵەكانی SDF لە ڕۆژهەڵاتی فورات زیاتر نەبێت.
بەڵام سەرچاوەكانی ئۆپۆزیسیۆنی سووریا بڵاویان كردەوە، نێوانگیرییەكەی سێردیكۆڤ شكستی هێنا، بۆیە لەگەڵ كۆمەڵێك ئەفسەری ڕووسی دوای كۆبوونەوەیەكی دوو كاتژمێری لەگەڵ سەركردەكانی هێزەكانی هەسەدە، فڕۆكەخانەی قامشلۆیان بەجێ هێشت.
هاوكات هێزەكانی ئەمەریكا، بە پشتیوانی ئاسمانی هاوكاری هێزەكانی سووریای دیموكرات دەكات لە كاتی هێرشەكانی دا.
چاودێرانی سیاسیی و سەربازی پێیان وایە “ئەگەر بارودۆخەكە كۆنترۆڵ نەكرێت، ڕەنگە گەشە بكات بۆ ململانێیەك كە لێكەوتەی پێشبینی نەكراوی هەبێت.
هاوكات باس لەوەش دەكرێت، كە سەركردایەتی سوپای پاسدارانی ئێران پێداچوونەوەیان بە بڕیارەكەیدا كردووە بۆ پشتیوانیكردنی هۆزەكان لە هێرشی ئێستایاندا، پێیان باشترە ئارامی بگەڕێتەوە ناوچەكە، بە تایبەتی لە شاری ئەلبوكەماڵە،
لە ڕاپۆرتێكی ماڵپەڕی فورات پۆست هاتووە “حاجی مەیسەم ئەلئێرانی بەرپرسی كەرتی ئەلبوكەماڵە، كۆبوونەوەیەكی لەگەڵ بەرپرسی ئەمنی سەربازی و بەرپرسی لیژنەی ئەمنی لە بینای ئەمنی سەربازی لە گەڕەكی ئەلجەمیعەت لە ئەل- بوكەمال، بۆ تاوتوێكردنی پێشهاتەكانی ڕووداوەكانی گوندەوارەكانی ڕۆژهەڵاتی دێرەزوور كراوە و بڕیار دراوە ڕێگری بكرێت لە ئەنجامدانی ئۆپەراسیۆنی سەربازیی “سوپای خێڵەكی” دژی پێگەكانی “هەسەدە” لە لادێكانی ئەلبوكەمال، بەهۆی هەستیاری ناوچەكە، و لە ترسی كاردانەوەی “هەسەدە”، كە لەوانەیە ئەنجامەكەی خراپ بشكێتەوە بە تایبەت بۆردوومانی بێ جیاوازی خەڵكی مەدەنی، یان شوێنەكانی ئێران بكرێنە ئامانج.”