پازدەی ئۆكتۆبەر چی روویدا

زاری كرمانجی – رۆژی 15ی ئۆكتۆبەر، چەكدارانی حەشد لە خورماتوو بارەگای كۆمیتەی یەكێتییان سووتاند و بە كردەوە دەستیان بە پەلامارەكانیان كرد بۆ سەر سەنگەرەكانی پێشمەرگە.
ئێوارەی 15ی ئۆكتۆبەر، مەكتەبی سیاسی پارتی و یەكێتی لە راگەیەندراوێكی هاوبەشدا جەختیان لەسەر چارەسەركردنی كێشەكانی هەولێر و بەغدا بە رێگەی گفتوگۆ كردەوە.
هەر هەمان رۆژ حكومەتی عەبادی كوردی بە هێنانی چەكدارانی پەكەكە بۆ كەركووك تۆمەتبار كرد و لە بەیاننامەیەكیشدا حكومەتی هەرێم وەڵامی دایەوە. ئەم هەوڵەی عەبادی وەك پەیامێك بۆ توركیا هەژمار كرا بەو پێیەی توركیا چاوپۆشی لە لەشكركێشییەكانی بۆ سەر كەركووك بكات بە بیانووی لەناوبردنی پەكەكە لە شارەكە.
درەنگانی شەوی 15ی ئۆكتۆبەر، میلیشیاكانی حەشد و سوپا بەرەو كەركووك جووڵەیان پێكراوە.
هەر ئەو شەوە، نەجمەدین كەریم پارێزگاری كەركووك پەیامێكی بەپەلەی بڵاوكردەوە و داوای لە خەڵكی كەركووك كرد ئەوەی توانای چەك هەڵگرتنی هەیە ئامادە بێت بۆ بەرگری لە شارەكەی.
كات 10:30ی شەو ئەنجوومەنی ئاسایشی هەرێمی كوردستان لە راگەیەندراوێكدا رایگەیاند، میلیشیاكانی حەشد بەرەو كەركووك جوڵەیان پێكراوە.
دوای ئەو هۆشداریانە هەزاران گەنجی كەركووك بە چەكەوە هاتنە سەر شەقامە سەرەكییەكانی شارەكە.
هاوكات فڕۆكەكانی هاوپەیمانی دژی داعش چەند جارێك بە ئاسمانی شارەكە سووڕانەوە.
سەرۆك لەسەر هێڵ بوو
نیوەشەوی 15ی ئۆكتۆبەر، سەرۆك بارزانی وەك فەرماندەی گشتیی هێزە چەكدارەكانی هەرێمی كوردستان فەرمانێكی بەپەلەی دەركرد و تێیدا داوای بەرگری لە هێزی پێشمەرگە كرد.
وەزارەتی بەرگری ئەمەریكا، لە دەستپێكی رووداوەكاندا داوای راگرتنی ئۆپراسیۆنە سەربازییەكان و شەڕی كرد.
خـــــــــیـــانـــەت
بە فەرمانی سەرووی خۆیان هێزەكانی یەكێتی پاشەكشێیان لە سەنگەرەكانیان كرد و بۆ پڕكردنەوەی بۆشایی ئەو هێزانە، هێزێكی زێڕەڤانی بەرەو پێشەوەی شەڕ جوڵێنرا و خۆبەخشەكانیش گەیشتنە سەنگەرەكانی پێشەوە. بەڵام رێككەوتنی ژێر بەژێری یەكێتی لەگەڵ بەرپرسانی حەشد و سوپا بە سەرپەرشتی قاسم سولەیمانی رێگر بوو لە سەركەوتنی بەرگری پێشمەرگە.
هێزەكانی یەكێتی لە 12ی ئۆكتۆبەرەوە بە بیانووی تاكتیكی لە چەندین قۆڵ و میحوەرەوە پاشەكشێیان كردبوو. كە فەرماندەكانیان پاساویان بۆ دەهێنایەوە و رەتیان دەكردەوە، پاشەكشێیان بە رێككەوتن بووبێت.
میلیشیاكانی حەشد و سوپا بە پێشڕەوی هێزەكانی یەكێتی لە رێی دەروازە سەرەكییەكانی كەركووكەوە بەرەو ناو شارەكە پێشڕەوییان دەكرد و پشتی زۆرێك لە سەنگەرەكانی پێشمەرگەیان گرت و ناچار هێزی پێشمەرگە بۆ پاراستنی ریزەكانی پاشەكشەی كرد.
بەهۆی هەڕەشەی میلیشیاكانی حەشد و سوپاوە، دەیان هەزار هاووڵاتی كوردی كەركووك بەرەو سلێمانی و هەولێر ئاوارە بوون.
بارەگای سەرجەم پارتە كوردییەكان داخرا و هەڵمەتێكی چڕ و پڕ بۆ سڕینەوەی مۆركی كوردیی لە كەركووك دەستیپێكرد، كە تا ئەمڕۆش بەردەوامە.
سەرۆك بارزانی: پیلانەكە زۆر پێش ریفراندۆم دانرابوو
سەرۆك بارزانی لە وتارێكدا كە دوای رووداوەكانی شازدەی ئۆكتۆبەر پێشكەشی كرد، گوتی: پیلانی داگیركردنی كەركووك زۆر پێش ریفراندۆم داڕێژرا بوو، بەڵام هیچ كات پێشبینیمان نەدەكرد، خیانەتمان لێبكرێت.
دوای رادەستكردنی شارەكە، ناوەندە رەسمی و میلیشیاییەكانی عێراق ستایش و سوپاسی بنەماڵەی تاڵەبانی و هێزەكانی یەكێتییان كرد كە شەڕیان نەكردوو و بوونە چاوساغی سوپا و حەشد بۆ گێڕانەوەی كەركووك بۆ ژێر دەسەڵاتی بەغدا.