غیاس خالد زێباری
پشتی وەغەرا داویێ یا رەحمەتی مام جەلال تالەبانی سكرتێرێ گشتی یێ ئێكەتیا نشتیمانیا كوردستانێ، ئەڤ حزبە تۆشتی بیڤەلەرزەكا ناڤخۆیی بوو، چونكی پشتی وەفاتا سكرتێرێ گشتی سەركردایەتی و مەكتەبا سیاسی یا وێ حزبێ وەكی ئۆڕگان و سازی نەمان، سیاسەت و ئارمانجێن وێ یێن ناڤخۆیی و دەرڤە و ئیراقی لسەر سەمت و ئاراستەیەكا دیاركری یا نشتیمانی و نەتەوەیی نەما و بەرەڤ ئاراستەیێ كۆمپانیێن بازرگانی و میلیشیایێن چەكداری و ملیتاریێن پاراستنا بەرژەوەندێن تایبەت چوو .
ژلایێ رێكخستن و پرنسیپان ژی چ ڕەنگ و سیما تێدا نەمان، بتایبەت پشتێ هەلبژارتنا شێوازێ هەڤسەرۆكیێ .
ئەگەر بەرێكڤەدانەكا كۆرت و بلەز یا رەفتار و سەرەدەریێن ئێكەتیا نشتیمانیا كوردستانێ یا سەردەمێ رەحمەتی مام جەلال تالەبانی و پشتی وی بكەین، دێ خۆیا دبیت كۆ ب وەغەرا مام جەلال تالەبانی بیڤەلەرزێ لڤێ حزبێ دایە و هەتا نهۆ رۆژ بۆ رۆژێ پلێن ریختەرێن بیڤەلەرزا ئێكەتیێ بلندتر دبن و كاریگەریێن وێ ژی مەزنتر و زیان بەخشتر دبن، پیلانا خیانەتا پشكەكا سەركردێن ئێكەتیێ و هەڤسەرۆكێن وێ یا رادەستكرنا كەركووكێ و پشكەكا دەڤەرێن كوردستانی یێن دەرڤەی ئیدارا هەرێما كوردستانێ ل ١٦ ێ ئكتۆبەرا ساڵا ٢٠١٧ ێ ئێك بوو ژ پێلێن بهێزێن بیڤەلەرزا ئێكەتیێ.
بیڤەلەرز بوو چونكی بەرێ ئێكەتیا نشتیمانیا كوردستانێ ل ئاراستەیێ نشتیمانیبوون و كوردایەی و نەتەوایەتیێ و ئێكرێزیێ و وەڵات پارێزیێ لادا، بۆ ئاراستەیا خیانەتەكا رێكخستی و بجهئینانا مەڕام و ئەجندایێن نەیار و داگیركرێن كوردستانێ كۆ دژی هیڤی و ئارمانجێن خەلكێ كوردستانێ و بزاڤا رزگاریخوازیا كوردستانی بوون .
پێداگیریا سەركردایەتیا ئێكەتیێ لسەر ( بەرهەم سالح ) ی وەكی نوونەرێ خەلكێ كوردستانێ بۆ سەرۆك كۆمارێ ئیراقێ، پێلەكا دیترا بیڤەلەرزا دناڤ ئێكەتیێ دا بوو چونكی سەرۆك كۆمار پشكا خەلكێ كوردستانێ یە نەك حزبەكێ .
ناكۆكیێن دناڤ سەركردایەتیێ ژی دا كۆ ئەڤرۆ پەرت و بەڵاڤ بوونە و هەر ئێك ب شێوازەكی داخۆیانیا ددەت و ژمارەكا وان ژی هاتینە دەرئێخستن و لادان، ئەڤە ژی بۆ ناڤخۆیێ ئێكەتیێ بیڤەلەرزەكا دژوارە ونیشانێن حیبەتیێ و پسیارێ دئێخنە سەر ئێكەتیێ وەكی حزبەكا نشتیمانی.
ئەڤە ڕامانا وێ چەندێ ناگەهینیت كۆ ئێكەتیا نشتیمانیا كوردستانێ لسەردەمێ مام جەلالێ رەحمەتی نەشیایە سەركردێن نشتیمان پەروەر و رێكخستنەكا لسەر بنەمایێ ڤیانا وەڵاتی و مللەتی پەروەردە نەكرینە، لێ ب وەغەرە مام جەلالێ رەحمەتێ ، ب فەڕامۆشكرنا رۆلێ سەركردێن دێرین و نشتیمانپەرێن دناڤ ئێكەتیێ دا، زابوونا هندەك كەسایەتیێن بێ ئەزمۆن د وارێ سیاسەت و رێكخستنێ دا لسەر بریارا ئێكەتیێ، ئەڤ بیڤەلەرزە درست كر ، بەردەوام بوونا ئێكەتیێ لدەستێ ڤان بێ ئەزمۆناندا رۆژ بۆ رۆژ ژلایێ جەماوەری و سیاسی پێگەهێ ئێكەتیێ دێ لاواز بیت و ئەو ئكەتیا مایی ژ ئەنجامێ هەبوونا هێزێن چەكداری و ئێمناهی یە لبن فەرمانا سەرۆك و سەركردایەتیا نهۆ یا ئێكەتیێ دا . ڤەگەڕیانا ئێكەتیێ بۆ سیاسەت و ڕەووشتێ مام جەلالێ رەحمەتی تاكە سیستەمێ ڕاگرتنا ڤێ بیڤەلەرزا دەست كردە ئەوا ئێكەتیێ دهەژینیت .
بەردەوامیدانا ئێكەتیێ لسەر شێوازێ نهۆ دهێتە پەیڕەوكرن ، پێلێن بیڤەلەرزێ دێ بهێزتر بن و ئیفلاسا ئێكەتیێ ل دەمەكێ زوو دێ هێتە ڕاگەهاندن، دۆر نیە پاشمایێن وێ ئەوێن پشتا خۆ ب هێزێن خۆ یێن ئەمنی و چەكداری گرێددەت، بۆ مانەڤا خۆ پەنایێ ببەنە بەر كارێن تیرۆرستی، هەر وەكی ئەڤرۆ بهێزا چەكی و درۆنا گەفا ل كادر و فەرماندێن لایەنەكێ دیاركری دكەن لسنوورێ دەستهەڵاتا خۆ و تیرۆركرنا فەرماندەكێ دژە تیرۆرا خۆ پێش چاڤێن خێزان و زارۆكێن وی ل هەولێرا پایتەخت ، نیشانێن وێ چەندێ ، دۆر نیە ب بەردەوامیا ڤان كارێن تیرۆرستی ئێكەتیا نشتیمانی بكەڤیتە دناڤ لیستا تیرۆرا جیهانی دا .
