مەهدی محەممەد – زاری كرمانجی :
ئاژانسی سپۆتینك-ی ڕووسیا بڵاوی كردەوە هێزەكانی ئەمەریكا بە فڕۆكە و چەك و تەقەمەنی، بنكە سەربازییەكانی خۆی لە باكووری خۆرهەڵاتی سووریا بەهێزتر كردووە .
ئاژانسی سپۆتینك لەسەر زاری سەرچاوەیەكی مەیدانیی لە سووریا بڵاوی كردەوە “ئەمەریكا 15 هەلیكۆپتەری جۆری ئەپاچی هێناوەتە بنكە سەربازییەكانی لە سووریا، هەروەها فڕۆكەیەكیش لە بنكەی سەربازی حەسەكە پڕ لە كەلوپەلی سەربازی لۆجستی و 25 سەربازی پێ بووە نیشتووەتەوە.”
پێشتریش وەزارەتی بەرگریی ئەمریكا لە ڕاگەیاندراوێكدا ئاشكرای كردبوو كە لوید ئۆستن، وەزیری بەرگری ڕاستەوخۆ سەرپەرشتیی بڵاوەپێكردنی هێزی زیاتر لە خۆرهەڵاتی ناوەڕاست دەكات .
چاودێرانی سیاسی و سەربازی لە سووریا پێیان وایە ئامانجی ئەمەریكا لە پتەوكردنی پێگەكانی خۆی لە باكووری خۆرهەڵاتی سووریا (ڕۆژئاوای كوردستان) بۆ بەرگری كردنە لە ئیسرائیل، بە تایبەت دوای كوژرانی ئیسماعیل هەنیە و ڕێگریكردن لە هێرشەكانی ئێران بۆ سەر ئیسرائیل.
