هونەرمەند پێویستە لە رووی كەسایەتییەوە لە ئاستێكی بەرزدا بێت
رۆژان قیاس-سۆران:
مەولود دڵشاد، پێشمەرگە و گۆرانیبێژی میلی سۆران، لە سەرەتای قسەكانی دەڵێ” من پێشمەرگەم لە هەمان كاتدا گرنگی بە كاری هونەری دەدەم، هەر لە منداڵییەوە دەستم بە گۆرانی گوتن كردووە، لە نێو خێزان و هاوڕێكانمدا، بەڵام وەكو چالاكی و هاتنم بۆ نێو ئەم بوارە پێنج ساڵ دەبێت.
ئەو گۆرانیبێژە، دەڵێ:” بە هاندان و پاڵپشتی خێزان و هاوڕێكانم دەستم پێ كرد، هەر چەندە سەرەتای كارەكەم ترسێكم هەبوو لە موزیك و جەماوەر، بەڵام بەرە بەرە ئاشنا بووم بە دنیای هونەر و ئەو ترسەم نەما، من زیاتر لە ئاهەنگەكان گۆرانی دەڵێم، چەند بەرهەمێكم هەیە، بەڵام تا ئێستا نەم توانیوە كلیپێك دروست بكەم.
ئەم گۆرانیبێژە جەخت لەسەر كەسایەتی هونەرمەند دەكاتەوە و گوتی:” هونەری كوردی هونەرێكی دەوڵەمەندە، دەتوانین بە هونەرەكەمان كلتور و كوردایەتیمان پیشانی جیهان بدەین و زیاتر پێش بكەوین، بۆیە هونەرمەند پێویستە لە رووی كەسایەتییەوە لە ئاستێكی بەرزدا بێت، ئەو گۆرانیانەی پێشكەش دەكات گونجاو بێت بۆ هەموو تەمەنێك، زۆرجار لە ئاهەنگێك دوو هونەرمەند بانگێشت دەكرێن، دەبینین جۆرێك ركابەری لە نێوان دوو هونەرمەندەكە دروست دەبێت، كە پێموایە ئەو ركابەرییەی نێوانیان ئەنجامی باشی نابێت لەبەر ئەوەی جۆرێك لە شكاندنی هونەرمەندی بەرامبەر دروست دەبێت.
مەولود دلشاد، لە درێژەی قسەكانی ئاماژەی بەوەشكرد:” لەگەڵ باوكم زۆر هاوڕێم، پاڵپشتییەكی گەورەیە بۆ كارە هونەریەكانم، ئەو كاتەی دەستم بە كاری هونەری كرد باوكم ئامێرێكی سازی بە دیاری بۆم هێنا ئەمە هاندانێكی زۆر گەورە بوو بۆ من، خێزانەكەم بە گشتی هاوكارن لەگەڵم، هاوڕێكانم لە كاری موزیك و ئاواز زۆر هاوكاریم دەكەن.
مەولود دڵشاد، پێشمەرگە و گۆرانیبێژی میلی سۆران، دەشڵێ:” جگە لە كاری هونەری، بەرپرسی بەشی رۆشنبیری هونەر و موزیكم لە تۆڕی رێكخراوە ناحكوومیەكانی سۆران، لە سۆران بەهرەمەندی زۆر باشمان هەیە، دەنگخۆشی زۆرمان هەیە كە توانای هونەری باشیان هەیە، بەڵام پێویستیان بە پاڵپشتی كردن هەیە پێویستە هەمووان كۆ بكرێنەوە و دەستیان بگیرێت و گرنگی پێ بدرێت، بۆ ئەوەی بەدیار بكەون و پێش بكەون، من وەك بەرپرسی بەشی هونەری، پلانی ئەوەم لەگەڵ ئیدارەی سۆران باس كردووە، بۆ زیاتر گرنگیدان بەو بەهرەمەندە گەنجانە، بۆ ئەوەی خولی تایبەتیان بۆ بكەینەوە”.
