هەنگاوەكانی شۆڕشی خزمەت

هەژار حەكیم

ب. راگەیاندن و پەیوەندییەكانی ئیدارەی سەربەخۆی سۆران

كابینەی نۆیەمی حكومەتی هەرێمی كوردستان، لە ماوەی 5 پێنج ساڵی رابردوودا باشترین و جوانترین خزمەتی پێشكەشی هاووڵاتییانی كردووە
یەكێك لە ئەركەكانی سیستمی كارگێڕی، دابەشكاریی ئەركەكانی فەرمانبەرە، ئەمەش پێویستیی بە هەنگاوی زانستی و ووردبووونەوەیە لە پێشكەشكردنی باشترین كوالێتی خزمەت بە كاروبارەكان كە ئەكتەری سەرەكیی پرۆسەكەش هاووڵاتییان و سەردانكارانی دامودەزگا حكومەییەكانن، بۆ خزمەتكردنیان و پیادەكردنی ئەم هەنگاوە پێویستیی بە مێتودی زانستیانە هەیە.
ئیدارەی سەربەخۆی سۆران، لەگەڵ ئەوەی هێشتا لە رووی كارگێڕی و ئیدارییەوە، ئەگەر كامڵ نەبووبێت، بەڵام سەرەڕای ئەو بارزۆرییەی لە سەرێتی لە رووی سەردانكاران بۆ راییكردنی مامەڵە جۆراوجۆرەكان بە مەبەستی چارەسەركردنی گرفتەكانی (زەویوزار، كە بەر شەقامێك یان پڕۆژەیەك كەوتوون، تاپۆكردن، داواكاریی بۆ دروستكردنی قوتابخانە و نەخۆشخانە، دروستكردن و قیرتاوكردنی رێگای گوندو شار و شارۆچكەكان، راكێشانی تۆڕی ئاو و كارەبا و تادوایی… )، لەگەڵ ئەوەشدا بە پێی سیستم و میكانیزمێكی پێشكەوتوو شوێن و كاتی پێویست بۆ هاووڵاتییان دابین كراوە. ئەگەرچی رەنگە بۆ بەشیكی هاووڵاتییانمان (نۆرەگرتن) تاڕادەیەك ئەستەم و بێزاركەر بێت، بەڵام دەشبێ فێری پشوودرێژی ببین، ئەگەر وانەبێ بنەمای یەكسانی تێكدەچێ.
كابینەی نۆیەمی حكومەتی هەرێمی كوردستان، لە ماوەی 5 پێنج ساڵی رابردوودا باشترین و جوانترین خزمەتی پێشكەشی هاووڵاتییانی كردووە، ” بە پێداهەڵگوتن نا “، بەڵكو بە بەڵگە و داتاوە ئەوە سەلمێنراوە، كە خودی سەرۆكوەزیرانی كوردستان بەڕێز (مسرور بارزانی) لەو كاتەی لە نزیكەوە چاودێریی پرۆسەی پیشوازی هاووڵاتییان دەكات لە لایەن فەرمانبەرانی حكومەتەوە، لەوەشدا ئیدارەی سەربەخۆی سۆران یەكەمین سنووری دامەزراوەی حكومەتە كە دەستەواژەی (پرسگە)ی گۆڕی بۆ(پێشوازی) و بە بڕیاری سەرپرشتیاری ئیدارەی سەربەخۆی سۆران بودجەیەكی تایبەت بە دروستكردنی هۆڵەكان و دابینكردنی ساردكەرەوە و گەرمكەرەوە و پێداویستییەكانی دیكەوە بۆ هەردوو وەزری ساڵ تەرخانكرا، لە ماوەی تەمەنی ئەم ئیدارەیەشدا هۆڵەكانی پێشوازی لە: (سەرۆكایەتی شارەوانی سۆران، بەڕێوەبەرایەتی گشتی پەروەردەی سۆران، بانكی دیلمان و دادگای بەرایی سۆران، نەخۆشخانەكانی لەدایكبوون و ئاشتیی فیركاری، كە جگە لە هۆڵی پیشوازی بە مەبەستی چەسپاندنی یەكسانی سیستمێكی دیجیتاڵی نۆرەگرتنی نەخۆش لەو دوو نەخۆشخانەیە دانران.
ئەمە جگە لەوەی كە بەدیجیتاڵكردنی دامەزراوەكان بەشێكە لە كارنامەی حكومەت، لە ساڵی رابردوودا (بەڕێوەبەرایەتی هاتووچۆ و پاسپۆرت) لە ئیدارەی سەربەخۆی سۆران بە دیجیتاڵ كراون.
لە راستیدا ئەو ئەركەی دەبوو لە ماوەیەكی زیاتر بەجێ بگەیەندرێت لە ماوەی تەمەنی ئەم كابینەیەدا زووتر خرانە خزمەتی هاووڵاتییان… ئەو ماوە كەمە و بەشنەكردنی كات بۆ جێبەجێكردنی پڕۆژەی زیاتر وایكرد، زێدەكاریی لە دەوامی فەرمیدا بكرێ، لەوەشدا كەمكات هەبووە سەرپەرشتیاری ئیدارەی سەربەخۆی سۆران (هەڵگور شێخ نەجیب) و ئێمە وەكو ستافی نووسینگەی ئیدارەكە كە (راگەیاندن و پەیوەندییەكان) بەشێكە لە نووسینگەكە، تا كاتژمێر 5 بۆ 6 هەندێكاتیش تا 10ی شەو لە ئەركی فەرمانبەریدا بوویین، ئەمە جگە لەو رۆژانەی پشووی فەرمین و لە ئەركدا بووین.
هەر بۆ ئەم مەبەستە بە بڕیاری سەرپەرشتیار، رۆژانی: (دووشەممە و چوارشەممە)ی هەر هەفتەیەك هاووڵاتییان دەتوانن دیداری راستەوخۆیان لەگەڵ كەسی یەكەمی ئیدارەكە هەبێت، هاوكات ئەم یەكتر دیتنە بە پێی سیستەمێكی رێكخراو بە یەكسانی لە رێی ستافێكی تایبەتەوە بەڕێوەدەبرێت و حاڵەتی زۆر پێویست نەبێت كەس ناتوانێت مافی ئەوەی تر بخوات. هاوكات دوو ژمارە تەلەفۆنی هێڵی گەرم :
07507000401، 07507000501، بەردەست كران بۆ ئەو كەسانەی دەیانەوێ زووتر دەنگیان بگاتە سەرپەرشتیاری ئیدارە بە نامە و تەلەفۆن، لەو رێگەیەشەوە سەدان گرفت چارەسەر كراون و داواكاریان گەیشتووەتە جێی مەبەست.
هاوكات بۆ ئەوەی لەو ماوە كەمەدا، تەمەنی ئەرك و كارەكانی حكومەت درێژتر ببێت، لەوەشدا پەیڕەوی سیستمی (یەك پەنجەرەیی) كرا، ئیدارەی سەربەخۆی سۆران یەكەمین دامەزراوەی حكومیی كابینەی نۆ بوو، كە لە (بەڕیوەبەرایەتیی گشتی شەهیدان و ئەنفالكراوان، گواستنەوە و گەیاندن) لە ئیدارەی سەربەخۆی سۆران پەیڕەو كرد، بە ئامانجی ئەوەی لە یەك كاتژمێردا مامەڵەی هاووڵاتی رایی بكرێت.
پرۆسەی خزمەت، لەم كابینەیەدا لە ئیدارەی سەربەخۆی سۆران و تەواوی كوردستان بە پاڵپشتی سەرۆكوەزیرانی خۆڕاگر، لەپێناو حكومەت و كوردستانێكی بەهێزتر، بۆ وڵاتێكی پێشكەوتووتر بەردەوام دەبێت.