د. نەدا مێرگەسۆری
مایەی خۆشحاڵییە پارتە سیاسییەكانی باشوور ، یان بە دەستووریانە بڵێین (هەرێمی كوردستان) كرانەوەیەكی باشیان هەبووە بە ئامانجی زێدەكردنی ڕۆڵی ڕەگەزی مێ لە كایەی سیاسی و بەشداری پێكردنیان لە كاری حیزبی و دانانیان لە پۆست و پلەی حیزبی و شتی دیكە.
گومانی تێدا نییە كە بەشێكی بچووكی ئەو ئافرەتانەی هاتوونەتە پێشەوە، بە هەوڵ و ماندووبوونی خۆیان هاتوونەتە پێش و ژمارەیەكی دیكەش بە هۆی پشتگیری ئەم و ئەو و ژمارەیەكی دیكەشیان بە وراسە بۆیان بەجێ ماوە، چونكە كچی فلان و فلانن بۆيه هێنراونەتە پێش و هەندێكیشیان نانی چانس و ئەو شوێنە دەخۆن كە لێی بوون و ئیشیان لێكردووە.
هەر سێ كۆمەڵەی دووەم و سێیەم و چوارەم چانسی بەردەوام بوونیان لە هی یەكەم زیاترە، چونكە ئەو فاكتەرەی یارمەتییان دەدات، فاكتەرێكی بەهێزتر و كاریگەرترە لە ئێستای كۆمەڵگەكەمان، جا گرنگ نییە ئەوەی بە توانای خۆی دێتە پێشەوە چەندە ماندوو دەبێت و چەندە شایستەیە!
ئەمە ڕاستییەكە و هەر كەسێك بڵێت وا نییە، دیارە ئاشنای كۆمەڵگەی ڕۆژهەڵاتی ناوەڕاست و عێراق و كوردستان نییە (هیوادارم كەسیش دڵی لەم قسەی من نەڕەنجێت، ئەمە حەقیقەتێكە و بووەتە شتێكی سروشتی).
ئیتر بە هەر جۆرێك ڕەگەزی مێ بێتە پێشەوە، گرنگ ئەوەیە یەكەم جار خزمەتی خاك و ئاو و ئاسمانی وڵاتەكەی بكات و دواتریش بەخیل نەبێت لە ڕێگا خۆش كردن بۆ هاوڕەگەزی خۆی و هانی هاتنە پێشەوەی ئافرەتی بەهێز و شایستە بدات، نەك هانی ئافرەتی لاواز و ناشایستە بدات.
ڕاستە بەشداری سیاسییانەی ڕەگەزی مێ و پاراستنی مافی سیاسی ئەوان گرنگە، بەڵام لەو گرنگتر پاراستنی مافی مەدەنی و كۆمەڵایەتی ڕەگەزی مێ و ڕێزگرتنی ئافرەتە وەك مرۆڤ.
لە ئەمریكای وڵاتی دیموكراسی و مافی مرۆڤ، هێشتاش دوو دڵن لەوەی ئایا ژنێك دەتوانێت ببێتە سەرۆكی وڵات یان نە، كەواتە بۆ ناساندنی توانای ئافرەت چەندەی فەرهەنگ سازی بكرێت بۆ دەستەبەركردنی مافە شارستانی و كۆمەڵایەتییەكانیان هێندە وەرگرتنی مافی سیاسیش ئاسانتر دەبێت.
هێشتاش ڕەگەزی مێ ڕووبەڕووی پێشێلكاری مافە بنەڕەتییەكانی دەبێتەوە. هێشتاش ئەو خانەوادانە هەن كە ڕێگە بە خوێندنی كچانیان نادەن، هەن ئەو خانەوادانەی كچەكانیان بە زۆر بەشوو دەدەن و هێشتاش هەن ئەو خێزانانەی بە چاوێكی زۆر كەم سەیری ئافرەت دەكەن و زۆر شتی دیكەش.
